Read Dagbani Ɛzɛkiɛl 34 Bible Online

Ɛzɛkiɛl 34 - Dagbani bible

Ɛzɛkiɛl 34

¹Yawɛ daa yɛli ma,

²“Daadam tɔɣisim’ anabitali yɛtɔɣa jɛndi Izraɛl piɛguliba. Tɔɣisim’ anabitali yɛtɔɣa yɛli ba, ‘Piɛguliba, Yawɛ ŋun nyɛ ti Duuma ŋɔ ni yɛli shɛm m-bɔŋɔ: Yinim’ Izraɛl piɛguliba bɛn kul dihirila bɛmaŋ’ ŋɔ, pa piɛguliba n-dihiri piɛri?

³Yi nyuri piɛri maa bihim, ka yɛri bɛ ni zaŋ piɛri kɔbiri wuɣi situr’ shɛŋa, ka kɔriti biŋkɔb’ pola bɛn mali kpam. Amaa yi bi dihiri piɛri.

⁴Yi bi kpaŋsiri bɛn ka yaa la, yi bi tibiri bɛn biɛri la, yi bi niŋdi tana lɔri bɛn nya dansi la, yi bi taɣiri bɛn yirigi la na, yi mi bi bo bɛn bɔrigi la shee. Amaa yi zaŋla kiŋkansi mini ninkuunsi su ba.

⁵ Dinzuɣu ka bɛ wurim kpe yɔɣu maa, bɛ leela mɔɣu ni biŋkɔbiri zaa bindirigu.

⁶M piɛri maa daa wurim kpe yɔɣu nti be zoya zaa mini daboli kam zuɣu dari ginda. M piɛri maa daa wurim kpe yɔɣu m-be dunia ŋɔ luɣilikam ni, ka so kani ŋun ni lihi bo bɛ shee.

⁷Dinzuɣu yinim’ piɛguliba, wummiya Yawɛ ni yɛli shɛm:

⁸Yawɛ ŋun nyɛ ti Duuma ŋɔ yɛliya: Mani ŋun be ŋɔ zuɣu, m piɛri leela biŋgbahira ni gbahiri shɛba, ka leei mɔɣu ni biŋkɔbiri bindirigu, piɛgul’ ni kani zuɣu. M piɛguliba maa bi bo m piɛri maa shee, amaa ka lee dihirila bɛmaŋa ka bi dihiri m piɛri maa.

⁹Dinzuɣu piɛguliba, wummiya Yawɛ ni yɛli shɛm:

¹⁰Yawɛ ŋun nyɛ ti Duuma ŋɔ ni yɛli shɛm m-bɔŋɔ: M bi lan ʒe piɛguliba maa nyaaŋa. N ni deei m piɛri bɛ sani, ka bɛ ku lan dihi piɛri maa, ka piɛguliba maa ku lan dihi bɛmaŋa yaha. N ni fa m piɛri bɛ noya ni, ka bɛ ku lan nyɛ bɛ bindirigu.’ ”

¹¹Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Mmaŋmaŋ’ ni vihi bo m piɛri, n shiri ni bo bɛ shee.

¹²Kaman piɛguliba ni vihiri bɔri bɛ piɛri shee shɛm saha shɛli bɛ yi ti wurim kpe yɔɣu la, lala ka n yɛn bo m piɛri maa shee. Sagbani mini zibisim titali dali, n ni lihi bo ba bɛ ni daa wurim kpe yɔɣu m-be luɣ’ shɛlikam zaa n-tiligi ba.

¹³N ni yihi ba zuliya shɛb’ ni na, ka yihi ba tiŋgbɔn’ shɛŋa ni laɣim taba n-zaŋ ba tahi bɛmaŋmaŋ’ tiŋgbɔŋ ni. N ni ti dihiri ba Izraɛl zoya zuɣu mini kom ni be luɣ’ shɛŋa ni ni niriba ni be luɣ’ shɛŋa zaa ni tiŋgbɔŋ maa ni.

¹⁴N ni ti zaŋ bindiri’ viɛla dihiri ba. Izraɛl zoya zuɣu nti yɛn nyɛ bɛ mɔri ŋubbu shee. Nimaani ka bɛ ni ti do momah’ viɛla tiŋgban’ ni, ka bɛ ti ŋubiri mo’ viɛla Izraɛl zoya zuɣu.

¹⁵Mani, mmaŋmaŋ’ ni ti guli m piɛri maa, ka n ni ti chɛ ka bɛ dɔni. Yawɛ ŋun nyɛ ti Duuma ŋɔ n-yɛli lala maa.

¹⁶N ni bo bɛn bɔrigi la shee, ka taɣi bɛn yirigi la labisina, ka zaŋ tana lo bɛn nya dansi la, ka kpaŋsi bɛn gbarigi la. Amaa bɛn bara, ka mali yaa la, n ni ku ba. N ni zaŋ din tuhi dihi ba.

¹⁷Amaa yinim’ bɛn nyɛ m piɛri ŋɔ, Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni ti kari saria wuhi din be piɛɣu min’ o kpee sunsuuni, ka wuhi din be piɛlahi mini buhi sunsuuni.

¹⁸Yi ni ŋubiri mo’ viɛla ŋɔ di bi saɣi? Ka wula ka yi lan nɔri mo’ shɛŋa din kpalim ŋɔ sɔŋdi tiŋa? Yi yi nyu ko’ viɛlli, di lan kpami ni yi zaŋ yi naba saɣim ko’ shɛli din kpalim?

¹⁹Ka daɣila m piɛri maa yɛn ŋubila yi ni no mo’ shɛŋa sɔŋ maa, ka nyu yi ni zaŋ yi naba saɣim ko’ shɛli maa?

²⁰Dinzuɣu Yawɛ ŋun nyɛ ti Duuma ŋɔ ni yɛli ba shɛm m-bɔŋɔ: Mmaŋmaŋ’ ni kari saria wuhi din be piɛ’ titali mini piɛ’ kɔɣu sunsuuni.

²¹Dama yi zaŋ yi nyɔri mini yi bɔɣusapima ni yi yila daai biŋkɔb’ shɛb’ bɛn ka yaa la zaa hal ti wurim ba kpɛhi yɔɣu katiŋa.

²²N ni tiligi m biŋkɔbiri maa, ka so ku lan nahim ba. Ka n ti woligi binshɛli din be piɛɣu min’ o kpee sunsuuni.

²³ N ni ti chɛ ka piɛgula yino ŋun nyɛ n dabili Dauda guli ba ka dihiri ba. O ni ti dihiri ba ka nyɛ bɛ piɛgula.

²⁴ Man’ Yawɛ ni ti nyɛ bɛ Naawuni, ka n dabili Dauda ti nyɛ bɛ naa be bɛ sunsuuni. Man’ Yawɛ n-yɛli lala maa.

²⁵N ni ti lo ba suhudoo alikauli, ka kari mɔɣu ni biŋkɔb’ biɛri zaa tiŋgbɔŋ maa ni din ni chɛ ka bɛ ti be mɔɣu maa ni, ka gbɛri nimaani ka barina shɛli kani.

²⁶N ni niŋ alibarika niŋ bɛ mini yaɣ’ shɛli din gili n zoli ŋɔ ni, ka chɛ ka saa miri ba saa mibu saha. Di ni ti nyɛla alibarika saa.

²⁷Bɛ puri ni tihi ni ti wali wala, ka tiŋgbani ni bindira niŋ. Bɛ ni ti be bɛ tiŋgbɔŋ maa ni ni alaafee. N yi kabisi dapuhi din pa bɛ nyiŋgoya zuɣu la, ka fa ba ninvuɣ’ shɛb’ bɛn zaŋ ba leei daba nuu ni bahi, bɛ ni baŋ ni mani n-nyɛ Yawɛ.

²⁸Zuliya shɛb’ ku lan kana ti ŋme ba tɔbu ka di bɛ nɛma, ka tiŋgbɔŋ maa ni biŋkɔbiri ku lan gbahi ba. Bɛ ni ti beni ni alaafee ka so ku lan kpɛhi ba dabiɛm.

²⁹N ni ti ti ba tiŋgban’ shɛli din mali atam viɛnyɛliŋga, ka bɛ ku lan kpi kum tiŋgbɔŋ maa ni yaha. Ka zuliya shɛb’ ku lan tu ba yaha.

³⁰Bɛ ni ti baŋ ni man’ Yawɛ ŋun nyɛ bɛ Naawuni ŋɔ be bɛ sani. Ka bɛn’ Izraɛlnim’ nyɛ n niriba, Yawɛ ŋun nyɛ ti Duuma ŋɔ n-yɛli lala maa.”

³¹Yawɛ ŋun nyɛ ti Duuma ŋɔ yɛliya, “Yi nyɛla n ni dihiri m piɛ’ shɛba, ka n nyɛ yi Naawuni.”