Read Dagbani Ɛzɛkiɛl 39 Bible Online

Ɛzɛkiɛl 39 - Dagbani bible

Ɛzɛkiɛl 39

¹“Nyin’ daadam, tɔɣisim’ anabitali yɛtɔɣa n-jɛndi Gɔg yɛli, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Nyini Gɔg ŋun nyɛ Mɛshɛk mini Tubal nazuɣu ŋɔ, m bi ʒe a nyaaŋa.

²N ni ŋmalig’ a gili n-voog’ a yihi nuzaa polo maa katiŋ’ na n-kar’ a tahi Izraɛl zoya ni.

³N ni ti ŋme a tɔbu a nuzaa ni bahi, ka a piɛma yi a nudirigu ni lu.

⁴A min’ a tɔbbihi ni ninvuɣ’ shɛb’ bɛn be a sani zaa ni ti lu Izraɛl zoya maa ni. Ka n ti zaŋ ya ti juri balibu kam mini mɔɣu ni biŋkɔbiri ka bɛ di.

⁵A ni ti lula palɔni, dama man’ Yawɛ ŋun nyɛ yi Duuma ŋɔ n-yɛli lala maa.

⁶N ni ti chɛ ka buɣim di Magɔg mini ninvuɣ’ shɛb’ bɛn ʒi teeku noli ni alaafee la, ka bɛ baŋ ni mani n-nyɛ Yawɛ.

⁷N ni ti chɛ ka n niriba Izraɛlnim’ baŋ n yuli din be kasi ŋɔ, ka n ku lan chɛ ka bɛ saɣim n yuli din be kasi maa yaha. Ka zuliya kam ti baŋ ni mani n-nyɛ Yawɛ, Izraɛlnim’ Naawuni ŋun be kasi.’ ”

⁸Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Di kana, di niŋya. Dabisili ŋɔ yɛla ka n daa yɛl’ la.

⁹Di saha ka ninvuɣ’ shɛb’ bɛn be Izraɛl fɔntinsi ni ni ti yina m-mali buɣim nyo bidibbina. Bɛ ni ti va nyɔtaɣiri bihi mini zaɣ’ kara ni tɔbiri ni piɛma ni kpana n-zaŋ li nyo buɣim yuma ayopɔin.

¹⁰Bɛ ti ku lan chaŋ mɔɣu ni ni bɛ ti kabi dari bee n-chaŋ yɔɣu ni ni bɛ ti ŋmahi tihi, dama bɛ ni ti malila bidibbina maa maani buɣim. Ninvuɣ’ shɛb’ bɛn ŋme ba tɔbu ka di bɛ nɛma, bɛ gba ni ti ŋme ba tɔbu ka di bɛ nɛma. Ka ninvuɣ’ shɛb’ bɛn fa bɛ nɛma, bɛ gba ni ti fa bɛ nɛma. Yawɛ ŋun nyɛ ti Duuma ŋɔ n-yɛli lala maa.”

¹¹Dindali maa n ni ti Gɔg luɣ’ shɛli bɛ ni yɛn sɔɣ’ o Izraɛl tiŋgbɔŋ ni. Dina n-nyɛ Sochandiba Vinvamli din be teeku wulimpuhili polo la, di ni ti ŋari sochandiba soli, dama nimaani ka bɛ ni ti sɔɣi Gɔg min’ o tɔbbihi zaa. Bɛ ni ti booni nimaani la Hamɔngɔg.[13]

¹²Izraɛlnim’ ni ti zaŋla chira ayopɔin sɔɣi ba din ni chɛ ka bɛ tiŋgbɔŋ maa mali.

¹³Tiŋgbɔŋ maa ni ti sɔɣi ba din ni chɛ ka bɛ nya jilima dahin’ shɛli n ni ti yɛn wuhi ba n jilima ni nyɛ shɛm maa. Yawɛ ŋun nyɛ ti Duuma ŋɔ n-yɛli lala maa.

¹⁴Bɛ ni ti pii dɔbba zali ka bɛ gindi bɛ tiŋgbɔŋ maa ni sahakam n-sɔɣiri bɛn daa kana ti liri ba maa kpiimba bɛn kpalim be tiŋgbɔŋ maa ni, ka di zuɣu chɛ ka bɛ mali bɛ tiŋgbɔŋ maa. Bɛ ni ti zaŋla chira ayopɔin vihi.

¹⁵Vihiriba maa yi ti gindi tiŋgbɔŋ maa ni, ka so ti nya ninsal’ kɔba luɣ’ shɛli, ŋun’ bom’ bini dalim nimaani hal ka kasiɣiriba ti kana ti zaŋ li sɔɣi Hamɔngɔg.

¹⁶(Tɔbbihi maa gba tiŋ’ beni.) Bɛ ni ti yɛn niŋ shɛm mali tiŋgbɔŋ maa m-bala.

¹⁷Nyin’ daadam, Yawɛ ŋun nyɛ yi Duuma ŋɔ ni yɛli shɛm m-bɔŋɔ: Yɛlim’ noonsi balibu kam mini mɔɣu ni biŋkɔbiri zaa. Laɣimmiya tab’ kana, yimiya luɣilikam n-laɣim ka sara maligu chu’ shɛli shili n ni maani ni n tin ya ŋɔ ni na. Di nyɛla sara maligu chu’ titali Izraɛl zoya zuɣu, yi ni ti ŋubi nimdi, ka nyu ʒim.

¹⁸Yi ni ŋubi wɔɣira nimdi, ka nyu dunia ŋɔ nanim’ ʒim mini piɛlahi ʒim ni piɛnyama ʒim ni buhi ʒim ni naɣilahi ʒim, bɛ zaa nyɛla Bashan biŋkɔb’ kpaba.

¹⁹Yi ni ti di biŋkpam hal ti tiɣi, ka nyu ʒim hal ti buɣi sara maligu chu’ shɛli shili n ni maani tiri ya maa ni.

²⁰ Yi ni ti ŋubi yuri mini chɛchɛbumbariba ni tɔbutuhiriba ni tɔbbihi balibu kam n yiŋa. Yawɛ ŋun nyɛ yi Duuma ŋɔ n-yɛli lala maa.

²¹N ni ti yihi n jilima palo ni zuliya kam sani, ka zuliya kam ti nya n ni kari saria shɛli ŋɔ mini n ni darigi bɛ tibili shɛm maa.

²²Dindali zaŋ chana Izraɛlnim’ ni ti baŋ ni man’ Yawɛ n-nyɛ bɛ Naawuni.

²³Ka zuliya kam nim’ maa ti baŋ ni Izraɛlnim’ tuumbiɛri zuɣu ka bɛ gbahi ba leei daba chaŋ maa, dama bɛ daa nyɛla bɛn bi ʒe yim n sani, dinzuɣu ka n daa ŋmaligi n nini bahi kpaŋa, ka zaŋ ba niŋ bɛ dimnim’ nuu ni ka bɛ daa zaŋ takɔbiri ku bɛ zaa.

²⁴N daa darigi bɛ tibili ka di dolila bɛ daɣiri mini bɛ biriginsim ni nyɛ shɛm, ka daa ŋmaligi n nini bahi kpaŋa ka chɛ ba.

²⁵Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: Pumpɔŋɔ n ni labisi Yaakubu zuliya daazichi ti ba, ka zo Izraɛlnim’ zaa nambɔɣu. Ka n ni ti zabi nyuli n yuli din be kasi ŋɔ zuɣu.

²⁶Bɛ ni ti be tiŋgbani maa ni ni alaafee, ka so lan kani ŋun ni kpɛhi ba dabiɛm, bɛ ni tam bɛ vi mini bɛ ni daa bi ʒe ma yim la yɛla.

²⁷N ni daa yihi ba zuliya shɛb’ ni, ka yihi ba bɛ dimnim’ tiŋgbana ni na nti chɛ ka n kasitali yi palo bɛ zuɣu ka zuliya kam nya li la.

²⁸Di saha bɛ ni ti baŋ ni man’ Yawɛ n-nyɛ bɛ Naawuni, n ni daa chɛ ka bɛ gbahi ba chaŋ, ka n lan zaŋ ba labisi bɛmaŋmaŋ’ tiŋgbɔŋ ni na la zuɣu. N ku chɛ bɛ ni so bahi.

²⁹N ni ti chɛ ka n shia siɣi Izraɛlnim’ zuɣu na, ka n ku lan ŋmaligi n nini bahi kpaŋa ka chɛ ba. Yawɛ ŋun nyɛ yi Duuma ŋɔ n-yɛli lala maa.”