Read Dagbani Ɛzɛkiɛl 40 Bible Online

Ɛzɛkiɛl 40 - Dagbani bible

Ɛzɛkiɛl 40

¹Bɛ ni daa gbahi ti chaŋ ka di ti paai yuun’ pisinaanu piligu ni goli biɛɣu pia dali. Bɛ ni daa wurim tiŋ’ maa ka di ti paai yuun’ pinaanahi saha shɛli, ka Yawɛ nuu daa pa n zuɣu, ka o daa zaŋ ma chaŋ Izraɛl tiŋgbɔŋ ni.

² Naawuni ʒiinim’ maa puuni ka o daa zaŋ ma chaŋ nimaani nti tam zoli din du pam zuɣu, ka binshɛli daa ʒe zoli maa zuɣu nudirigu polo m-be kaman fɔntiŋ’ la.

³ O ni daa zaŋ ma paai nimaani, do’ so daa be nimaani ka o niŋgbuŋ daa nyɛlisira kaman daanya la. O daa gbibila mi piɛlli mini bɛ ni zaŋdi binshɛli buɣisiri binyara la o nuu ni. O daa ʒiɛla dunɔdali gbini.

⁴Ka doo maa daa yɛli ma, “Daadam, lihimi viɛnyɛliŋga, ka gbilisi tibili viɛnyɛliŋga, ka zaŋ a zaɣa niŋ n ni yɛn wuh’ a binshɛŋa ŋɔ zaa ni. Dama n zaŋ a mi ka kpe na ni n ti wuh’ a li. Yɛlim’ Izraɛlnim’ a ni nya shɛli maa zaa.”

⁵ Bɛ daa mɛla gooni gili Naawuni jɛmbu duu maa zaa. Doo maa ni daa gbibi bimbuɣisirigu shɛli o nuu ni maa wɔɣilim daa nyɛla mita ata. Ka o daa zaŋ li buɣisi gooni maa barilim mini di dubu. Di dubu daa nyɛla mita ata, ka di barilim gba nyɛ mita ata.

⁶Di nyaaŋa ka o daa chaŋ dunɔdal’ shɛli din daa kpa wulimpuhili polo la nti du dunɔdura maa m-buɣisi li di dunɔbia zaŋ kpe puuni, ka di nyɛ mita ata.

⁷Du’ bihi shɛŋa daa be di ni, ka du’ bil’ yini kam yɛliŋ daa nyɛ mita ata, ka di wɔɣilim gba nyɛ mita ata. Ka goma din daa be du’ bihi maa sunsuuni barilim daa nyɛ mita ayi ni pirigili. Ka zɔŋ duno’ shɛli bɛ ni daa doli kpɛri puuni ha dunɔbia nyɛ mita ata.

⁸Di nyaaŋa ka o daa buɣisi dunɔdali shee zɔntua, ka di nyɛ mita anahi.

⁹Di nyaaŋa ka o daa buɣisi zɔŋ din daa be dunɔdali shee, ka di daa nyɛ mita anahi. Ka di daantalisi nyɛ mita yiniyini, ka zɔntua maa daa be puuni ha tariga.

¹⁰Du’ bihi atata n-daa be wulimpuhili polo dunɔdali maa yaɣa ayi zaa. Du’ bihi atata maa zaa galisim daa nyɛla yim, ka di daantalisi din be di luɣa zuɣu zaa barilim nyɛ yim.

¹¹Di nyaaŋa ka o daa buɣisi dunɔdali maa yɛliŋ, ka di nyɛ mita anu. Ka o daa buɣisi foliŋga din kpe dunɔdali maa ni, ka di yɛliŋ nyɛ mita ayɔbu ni pirigili.

¹²Ka bɛ daa me goon’ ŋmaa zali du’ bila kam tooni, ka di dubu nyɛ sɛntimita pihinu, ka di barilim nyɛ sɛntimita pihinu di yaɣa zaa, ka dubihi buɣisibu nyɛ mita atata di yaɣa zaa.

¹³Di nyaaŋa ka o daa zani dubil’ yini nyaaŋa m-buɣisi dunɔdali zaŋ ti paai dubil’ din’ la nyaaŋa, ka di yɛliŋ nyɛ mita pinaayi ni pirigili zaŋ goon’ yini hal ti paai goon’ dini la.

¹⁴O daa lan buɣisi zɔŋ la mini dunɔdali din daa baɣi daantalisi la ni dundɔŋ ni luɣilikam, ka di yɛliŋ nyɛ mita pia.

¹⁵Dunɔdali maa tooni zaŋ hal ti paai zɔntua puuni dunoli maa ni, di yɛliŋ daa nyɛla mita pisinaanu.

¹⁶Dubihi maa mini di pilanim’ daa malila takɔriti, ka dunoyɔriti daa kul be dubihi maa tooni mini di nyaaŋa, ka di daa be dunɔdali maa puuni ti gili. Ka zɔntuhi maa gba puuni zaa daa malila takɔriti gili. Ka bɛ daa ŋmɛnŋme abie tihi pa di dukpina maa zuɣu.

¹⁷Di nyaaŋa ka o daa zaŋ ma yi dundɔŋ ni, duri daa be nimaani ka bɛ zaŋ kuɣa ŋme m-malimali gili di dundɔŋ maa zaa. Duri pihita n-daa be bɛ ni zaŋ kuɣa ŋme m-malimali luɣ’ shɛli maa tooni.

¹⁸Bɛ daa kul sɔŋ la kuɣa maa dolisi dundɔŋ maa n-zaŋ hal ti paai dunɔdaya maa wɔɣilim tariga. Dimbɔŋɔ daa nyɛla bɛ ni sɔŋ kuɣ’ shɛŋa tiŋli.

¹⁹Di saha ka o buɣisi dundɔŋ ni dunɔdali puuni tooni din be tiŋli polo la tooni zaŋ hal ni sambani dunɔdali gbini, ka di wɔɣilim nyɛ mita pihinu.

²⁰Dimbɔŋɔ nyaaŋa ka o daa buɣisi dunɔdali din be dundɔn titali ni zaŋ labi nuzaa polo la ziliŋ mini di yɛliŋ.

²¹Di dubihi atata din be di yaɣa ayi la mini di pilanima ni di zɔntua zaa galisim daa nyɛla yim, ka di ziliŋ daa nyɛ mita pisinaanu, ka di yɛliŋ nyɛ mita pinaayi ni pirigili.

²²Di takɔriti mini di zɔntua ni di abie tihi kɔtomsi daa bemi kaman dunɔdali din be wulimpuhili polo la dina ni daa be shɛm. Di daa malila dunɔdura ayopɔin zaŋ chaŋ dunɔdali maa gbini, ka di zɔŋ be di puuni.

²³Nuzaa polo dunɔdali maa tooni, dunoli daa beni kpɛri dundɔŋ ni kaman di ni daa be shɛm wulimpuhili polo la. Ka o daa buɣisi dunoli zaŋ ti kpa dunoli, ka di wɔɣilim nyɛ mita pihinu.

²⁴Dimbɔŋɔ nyaaŋa ka o daa zaŋ ma kpa nudirigu polo, ka dunɔdali daa be nudirigu polo maa, ka o daa buɣisi di pilanima’ mini di zɔntua, ka di mini dunɔda’ dina la zaa nyɛ yim.

²⁵Di daa kul malila takɔriti di puuni zaa gili ni di zɔntua ni kaman dimbalanim’ takɔriti ni daa be shɛm la. Di ziliŋ daa nyɛla mita pisinaanu, ka di yɛliŋ nyɛ mita pinaayi ni pirigili.

²⁶Di daa malila dunɔdura ayopɔin, ka di zɔntua be di puuni. Bɛ daa ŋmɛla abie tihi pa di pilanim’ maa zaa zuɣu. Yaɣili kam daa malila zaɣ’ yiniyini.

²⁷Dunɔdali daa be dundombil’ ni nudirigu polo. Ka o daa buɣisi dunɔdali zaŋ ti kpa dunɔdali din be nudirigu polo, ka di nyɛ mita pihinu.

²⁸Di nyaaŋa ka o daa zaŋ ma doli nudirigu polo dunɔdali n-kpe dundombil’ ni nti buɣisi nudirigu polo dunɔdali maa, ka di mini dunɔda’ dina la zaa kul nyɛ yim.

²⁹Di dubihi mini di pilanim’ ni di zɔntua mini dina la daa nyɛla yim, ka takɔriti be di ni zaa gili ni di zɔntua maa ni. Di wɔɣilim daa nyɛla mita pisinaanu, ka di yɛliŋ nyɛ mita pinaayi ni pirigili.

³⁰Zɔntuhi daa kul gilila di luɣilikam, ka di wɔɣilim nyɛ mita pinaayi ni pirigili, ka di yɛliŋ nyɛ mita ayi ni pirigili.

³¹Di zɔntua maa daa kpala dundɔntitali polo, ka bɛ ŋme abie tihi pa di pilanim’ zuɣu. Ka di daa mali dunɔdura anii zaŋ chaŋ dunɔdali gbini.

³²Di nyaaŋa ka o daa zaŋ ma kpe dundombila din be wulimpuhili polo ni nti buɣisi dunɔdali, ka di mini dina la zaa nyɛ yim.

³³Di dubihi mini di pilanim’ ni di zɔŋ mini dina la zaa daa nyɛla yim, ka takɔriti be di puuni zaa gili ni di zɔntua ni. Di ziliŋ daa nyɛla mita pisinaanu, ka di yɛliŋ nyɛ mita pinaayi ni pirigili.

³⁴Di zɔntua maa daa kpala dundɔntitali polo, ka bɛ ŋme abie tihi pa di pilanim’ zuɣu di yaɣa zaa, ka di daa mali dunɔdura anii zaŋ chaŋ dunɔdali gbini.

³⁵Di nyaaŋa ka o daa lan zaŋ ma chaŋ nuzaa polo dunɔdali ni nti buɣisi li. Ka di mini dina la zaa nyɛ yim.

³⁶Di dubihi mini di pilanim’ ni di zɔntuhi mini dina la zaa daa nyɛla yim. Ka takɔriti be di ni zaa gili. Di ziliŋ daa nyɛla mita pisinaanu, ka di yɛliŋ nyɛ mita pinaayi ni pirigili.

³⁷Di zɔntua daa kpala dundɔntitali polo. Ka bɛ daa ŋme abie tihi pa di pilanim’ zuɣu di yaɣili kam. Ka di daa mali dunɔdura anii zaŋ chaŋ dunɔdali maa gbini.

³⁸Duu daa beni ka di dunoli be dunɔdali zɔntua puuni, nimaani ka bɛ daa paɣiri bɛ ni yɛn zaŋ sara shɛli nyo buɣim.

³⁹Dunɔdali zɔntua maa ni, teebuya ayi daa ʒiɛla yaɣ’ yini polo ka teebuya ayi ʒe yaɣ’ din’ la polo. Di zuɣu ka bɛ daa yɛn kɔriti biŋkɔb’ shɛb’ bɛ ni zaŋdi maani sara shɛli bɛ ni zaŋdi nyɔri buɣim la min’ alahichi sara ni alahichi sanyoo sara la.

⁴⁰Teebuya ayi n-daa ʒe zɔntua maa samban’ ni dunɔdali nuzaa polo, ka teebuya ayi ʒe zɔntua maa dunɔdali yaɣ’ din’ la polo.

⁴¹Teebuya anahi n-daa ʒe di puuni, ka diba anahi ʒe samban’ ni dunɔdali yaɣili. Teebuya anii n-daa nyɛ li, ka bɛ kɔriti sara maligu biŋkɔbiri di zuɣu.

⁴²Kuɣ’ kpɛra teebuya anahi daa beni ka nyɛ bɛ ni zaŋdi sara shɛli nyɔri buɣim la teebuya. Di wɔɣilim daa nyɛla sɛntimita pisopɔinnaanu, ka di yɛliŋ nyɛ sɛntimita pisopɔinnaanu, ka di dubu nyɛ sɛntimita pihinu, ka bɛ daa zaŋdi neen’ shɛŋa bɛ ni mali kɔrigiri bɛ ni zaŋdi sara shɛli nyɔri buɣim la biŋkɔbiri mini sara shɛŋa biŋkɔbiri la pari di zuɣu.

⁴³Ka bɛ zaŋ kpahi din wɔɣilim nyɛ milimita pisopɔinnaanu n-kpahi gili di puuni zaa. Teebuya maa zuɣu ka bɛ daa yɛn zaŋdi sara maligu nimdi para.

⁴⁴Dundombil’ ni dunɔdali samban’ ni, duri daa beni din nyɛ baansi duri. Yini daa bela nuzaa polo dunɔdali shee, ka di dunoli kpa nudirigu polo, ka zaɣ’ yini mi ʒe nudirigu polo dunɔdali shee, ka di dunoli kpa nuzaa polo.

⁴⁵Ka o daa yɛli ma, “Du’ shɛli din dunoli kpa nudirigu polo ŋɔ nyɛla maligumaana ŋun su Naawuni jɛmbu duu maa fukumsi duu.

⁴⁶Ka du’ shɛli din dunoli kpa nuzaa polo ŋɔ nyɛ maligumaana ŋun su sara maligu bimbini fukumsi duu. Bɛ nyɛla bɛn yi Zadok zuliya ni na. Bɛ kɔŋko m-mali soli Lɛvi zuliya niriba sunsuuni ni bɛ miri Yawɛ sani nti tum o tuma.”

⁴⁷Di nyaaŋa ka o daa buɣisi dundɔŋ maa. Di wɔɣilim daa nyɛla mita pihinu, ka di yɛliŋ gba nyɛ mita pihinu. Di daa nyɛla mɔɣumɔɣu, ka sara maligu bimbini be Naawuni jɛmbu duu maa tooni.

⁴⁸Dimbɔŋɔ nyaaŋa ka o daa zaŋ ma kpe Naawuni jɛmbu duu zɔŋ ni nti buɣisi zɔŋ maa pilanima, ka pila yini yaɣili kam nyɛ mita ayi ni pirigili. Ka dunɔdali maa yɛliŋ daa nyɛ mita ayopɔin. Ka dunɔdali maa luɣa ni goma daa nyɛ mita yini ni pirigili di yaɣa zaa.

⁴⁹Zɔŋ maa ziliŋ daa nyɛla mita pia, ka di yɛliŋ nyɛ mita ayɔbu, ka di daa mali dunɔdura pia din kpɛri di ni. Ka daantalisi daa be di yaɣa ayi zuɣu m-pahi pilanim’ zuɣu.