Read Dagbani Ɛzɛkiɛl 42 Bible Online

Ɛzɛkiɛl 42 - Dagbani bible

Ɛzɛkiɛl 42

¹Dimbɔŋɔ nyaaŋa ka o daa zaŋ ma yi dundɔntitali ni zaŋ kpa nuzaa polo nti zaŋ ma kpe du’ shɛŋa din daa be Naawuni jɛmbu duu sambani tooni polo mini du’ shɛli din daa be nuzaa polo tooni.

²Du’ shɛli din daa be nuzaa polo maa wɔɣilim daa nyɛla mita pihinu, ka di yɛliŋ nyɛ mita pisinaanu.

³Zaŋ kpa pal’ shɛli din daa do dundɔŋ ni ka di wɔɣilim nyɛ mita pia la ni zaŋ kpa bɛ ni daa zaŋ kuɣa mali samban’ ni luɣ’ shɛli polo la, duri maa daa mɛmi tam taba buta zuɣu, ka yaɣ’ yini labi nyaaŋa ka chɛ din’ la tiŋli.

⁴Duri maa tooni, so’ shɛli daa beni kpɛri dundɔŋ puuni. Di yɛliŋ daa nyɛla mita anu, ka di wɔɣilim nyɛ mita pihinu, ka di dunoya daa be nuzaa polo.

⁵Dinzuɣu zuɣusaa duri maa daa nyɛla zaɣ’ muɣilinsi, dama folinsi maa daa di palo pam zuɣusaa n-gari sunsuuni mini tiŋ’ duri la.

⁶Dama di daa nyɛla jirambisa tambu buta. Di daa ka pilanima kaman dundɔntitali ni pilanim’ la. Lala zuɣu du’ shɛŋa din daa be zuɣusaa maa daa labi nyaaŋa n-gari tiŋ’ mini sunsuuni dina la.

⁷Bɛ daa mɛla gooni zali duri maa tooni zaŋ labi dundɔntitali polo, ka di wɔɣilim nyɛ mita pisinaanu.

⁸Dama du’ shɛŋa din daa be dundɔntitali maa ni wɔɣilim daa nyɛla mita pisinaanu, ka din mi daa be Naawuni jɛmbu duu tooni la wɔɣilim nyɛ mita pihinu.

⁹So’ shɛli daa be duri maa tiŋa, ka nira ni tooi yi dundɔntitali ni wulimpuhili polo n-dol’ li kpe duri maa ni.

¹⁰Soli maa yɛliŋ daa chaŋ ti gbaala dundɔntitali maa gooni la. Nudirigu polo zaŋ labi palo din daa doya la tooni, duri daa lan beni,

¹¹ka soli be di tooni. Duri maa daa bemi kaman nuzaa polo duri la. Di wɔɣilim mini di yɛliŋ zaa daa kul nyɛla yim. Ka niriba ni yɛn doli luɣ’ shɛŋa yira mini di mɛbu ni di dunoya zaa kul nyɛ yim.

¹²Dinzuɣu nira daa yi yɛn kpe duri maa nudirigu polo dunoya maa ni, a ni dolila duu maa tariga so’ shɛli din baɣisiri gooni maa wulimpuhili polo.

¹³Di saha ka o daa yɛli ma, “Nuzaa polo mini nudirigu polo duri din be palo la tooni maa nyɛla duri din be kasi. Di puuni ka maligumaaniba bɛn chani Yawɛ tooni la yɛn diri bɛ sara maligu shɛŋa din be kasi zaa la. Di puuni ka bɛ yɛn zaŋdi maligu shɛŋa din be kasi zaa la niŋda. Dina n-nyɛ: chi mini kawana sara ni alahichi sanyoo sara ni taali sanyoo sara. Dama nimaani nyɛla din be kasi.

¹⁴Maligumaaniba yi ti kpe luɣ’ kasi shee maa, di bi simdi ka bɛ zaŋ bɛ ni ye neen shɛŋa tumdi tuma maa yi dundɔntitali ni, naɣila bɛ yeei li mi sɔŋ duu maa puuni. Dama di nyɛla neen’ shɛŋa din be kasi. Di simdi ka bɛ zaŋ neen’ shɛŋa ye pɔi ka naanyi yi niriba sani samban’ ni.”

¹⁵O ni daa buɣisi Naawuni jɛmbu duu maa puuni naai, o daa zaŋ ma mi doli duno’ shɛli din be wulimpuhili polo la yi nti buɣisi Naawuni jɛmbu duu maa palo zaa gili.

¹⁶O daa zaŋla din buɣisiri maa buɣisi wulimpuhili polo, ka di buɣisibu nyɛ mita kɔbisiyi ni pihinu.

¹⁷Di nyaaŋa ka o ŋmaligi zaŋ din buɣisiri maa m-buɣisi nuzaa polo, ka di buɣisibu nyɛ mita kɔbisiyi ni pihinu.

¹⁸Di nyaaŋa ka o ŋmaligi zaŋ din buɣisiri maa buɣisi nudirigu polo, ka di buɣisibu nyɛ mita kɔbisiyi ni pihinu.

¹⁹Di nyaaŋa ka o ŋmaligi wulinluhili polo m-buɣisi li, ka di buɣisibu nyɛ mita kɔbisiyi ni pihinu.

²⁰ O daa buɣisi li la di luɣa anahi zuɣu. Bɛ daa mɛla gooni gil’ li, ka di wɔɣilim nyɛ mita kɔbisiyi ni pihinu, ka di yɛliŋ nyɛ mita kɔbisiyi ni pihinu, ka di woligi din be kasi ka chɛ din bi be kasi.