Read Dagbani Ɛzɛkiɛl 45 Bible Online

Ɛzɛkiɛl 45 - Dagbani bible

Ɛzɛkiɛl 45

¹“Yi yi yɛn pirigi tiŋgbɔŋ maa ka di leei yi ni su shɛli, yin’ yihimiya tiŋgbɔŋ maa luɣ’ shɛli ti Yawɛ, ka di leei luɣ’ kasi yaɣili. Di wɔɣilim ni ti nyɛla kilomita pinaayi ni pirigili, ka di yɛliŋ nyɛ kilomita pia. Di simdi ka di luɣilikam ti nyɛ din be kasi.

²Di simdi ka yi ti ŋmaai di puuni palo din nyɛ zaɣ’ mɔɣu, ka di leei Naawuni jɛmbu duu palo, ka di yaɣili kam wɔɣilim ti nyɛ mita kɔbisiyi ni pihinu. Ka yi ŋmaai palo din yɛliŋ nyɛ mita pisinaanu gili di zaa.

³Di simdi ka yi ti buɣisi pal’ yaɣu puuni luɣ’ shɛli polo, ka di wɔɣilim nyɛ kilomita pinaayi ni pirigili, ka di yɛliŋ nyɛ kilomita anu, ka Naawuni jɛmbu duu puuni luɣ’ kasi zaa kasi shee la ti be di ni.

⁴Di ni ti nyɛla tiŋgbɔŋ maa luɣ’ kasi shee. Di ni ti nyɛla maligumaaniba bɛn tumdi tuma Naawuni jɛmbu duu, ka nyɛ bɛn ni zaani Yawɛ tooni tumdi tuma la ni su shɛli. Di ni ti nyɛla luɣ’ shɛli bɛ ni yɛn me bɛ yiya, ka lan nyɛ Naawuni jɛmbu duu puuni luɣ’ kasi ni yɛn be shɛli.

⁵Di lan simdi ka yi ti ŋmaai palo shɛli din wɔɣilim nyɛ kilomita pinaayi ni pirigili, ka di yɛliŋ nyɛ kilomita anu n-ti Lɛvinim’ bɛn nyɛ Naawuni jɛmbu duu tumtumdiba la ka di nyɛ bɛ ni su shɛli, ka bɛ me bɛ fɔntinsi be di ni.

⁶Di lan simdi ka yi ŋmaai palo shɛli din dolisi luɣ’ kasi yaɣili la ti Izraɛlnima ka bɛ me bɛ fɔntiŋa. Di wɔɣilim ni ti nyɛla kilomita pinaayi ni pirigili, ka di yɛliŋ nyɛ kilomita ayi ni pirigili. Di ni ti nyɛla Izraɛlnim’ zaa ni su shɛli.

⁷Naa nti yɛn su tiŋgban’ shɛŋa din be luɣ’ kasi shee yaɣili polo la mini din be fɔntinsi maa yaɣili polo la. Zaŋ luɣ’ kasi shee yaɣili maa mini fɔntiŋ’ maa polo tariga wulinluhili polo mini wulimpuhili polo tintariga n-doli di wɔɣilim hal ni zuliya maa ni su tiŋgban’ shɛli tariga. Ka di lan zaŋ nimaani wulinluhili polo hal ti paai tiŋgbani maa wulimpuhili polo

⁸tiŋgbani maa tintariga; o ni yɛn su shɛli m-bala Izraɛl tiŋgbɔŋ ni. Ka n nanim’ maa ku lan muɣisi n niriba maa. Amaa bɛ ni ti chɛ ka Izraɛlnim’ su tiŋgbɔŋ maa kaman bɛ zuliya ni nyɛ shɛm.

⁹Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Izraɛl nanima, di saɣi lala. Chɛliya duŋtaabo mini niriba muɣisibu, ka tummiya din tuhi ka nyɛ yɛlimaŋli. Miriya ka yi lan kari n niriba maa yihi bɛ tiŋgbɔŋ maa ni. Yawɛ ŋun nyɛ ti Duuma ŋɔ n-yɛli lala maa.

¹⁰ Zaŋmiya sania maŋa mini kuruwa maŋa ni taha din nyɛ zaɣ’ maŋa n-zahindi binyara.

¹¹Di simdi ka yi ni yɛn zaŋ kuruwa shɛli zahindi biŋkuma mini yi ni yɛn zaŋ binshɛli zahindi binshɛŋa din nyɛ zaɣ’ kom saɣila taba. Kuruwa pia n-nyɛ tahili. Tahili n-nyɛ sokam ni yɛn zaŋdi shɛli zahindi binyara.

¹²Gɛra pisi n-yɛn nyɛ shɛkal yini. Shɛkal pihiyɔbu n-yɛn nyɛ mina zaɣ’ yini yi sani.

¹³Yi ni yɛn tiri Naawuni pina shɛm m-bɔŋɔ: Alikama tahili kam puuni, yi ni yihi kuruwa pirigibu buyɔbu puuni yim zuɣu ti. Chi tahili kam puuni, yi ni yihi kuruwa pirigibu buyɔbu puuni yim zuɣu ti.

¹⁴Yi ni yɛn tiri kpam mi shɛm m-bɔŋɔ: Kpa’ ŋmani kam puuni, yihimiya kuruwa pirigibu bupia puuni yim zuɣu ti. (Ŋmani maa kul bemi kaman tahili la, kuruwa pia n-kpɛri di ni.)

¹⁵Izraɛl tiŋgbɔŋ biŋkɔbbaligu kɔbisiyi kam puuni yihimiya piɛ’ yino. Dimbɔŋɔ ka yi yɛn zaŋ maani chi mini kawana sara maligunima ni bɛ ni zaŋdi sara shɛli nyɔri buɣim la ni suhudoo sara maligunima n-yɔri niriba daalahichi samli. Yawɛ ŋun nyɛ ti Duuma ŋɔ n-yɛli lala maa.

¹⁶Di simdi ka tiŋgbɔŋ maa ni niriba zaa pahi Izraɛl naa zuɣu ka bɛ mali sara maa.

¹⁷Amaa naa maa talahi tuma ni nyɛ shɛm zaŋ chaŋ bɛ ni zaŋdi sara shɛli nyɔri buɣim la mini chi ni kawana sara ni binnyura sara bɛ churi puhibu ni ni gol’ pala ni ni vuhim dabisa ni ni Izraɛlnim’ ni zali chuɣ’ shɛŋa puhibu ni zaa nyɛla: Ŋuna n-ni ti bo alahichi sanyoo sara mini chi ni kawana sara ni bɛ ni zaŋdi sara shɛli nyɔri buɣim la ni suhudoo sara binyara m-mali sara yo Izraɛlnim’ daalahichi samli.”

¹⁸Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Goli so ŋun daŋ tooni dahin yini dali, yin’ zaŋmiya naɣila’ polli ŋun ka daŋa m-mali sara Naawuni jɛmbu duu ka di niŋ kasi.

¹⁹Maligumaana ni ti zaŋ alahichi sanyoo sara maligu maa binʒim shɛli n-vie Naawuni jɛmbu duu maa dunɔpaɣira mini sara maligu bimbini naŋgbaŋkuɣila bunahi zuɣu ni dundombila dunɔdali dunɔpaɣira la.

²⁰Yi ni ti lan niŋ lala goli maa daba ayopɔin dali n-ti ŋunkam tum alahichi o chirimbu puuni bee o ʒilinsi puuni din ni chɛ ka yi mali Naawuni jɛmbu duu maa ka di niŋ kasi.

²¹ Goli so ŋun daŋ tooni maa biɛɣu pinaanahi dali, yin’ ti puhimiya Yaɣigari chuɣu, ka sokam ti ŋubi bɔrɔbɔro din ka dabindi hal ni daba ayopɔin.

²²Dindali maa, di simdi ka naa ti bo naɣila’ polli m-mali sara o mini tiŋgbɔŋ maa ni niriba zaa daalahichi zuɣu.

²³Daba ayopɔin ŋɔ puuni chuɣu ŋɔ puhibu saha, o bom’ naɣila’ pola ayopɔin mini piɛlahi ayopɔin bɛn ka dansi m-mali bɛ ni zaŋdi sara shɛli nyɔri buɣim la ti Yawɛ dahin yini kam, ka lan bo bulaa m-mali alahichi sanyoo sara dabisili kam.

²⁴Di simdi ka o zaŋ kawana lita pinaayopɔin ni pirigili pahi naɣilaa kam zuɣu, ka lan zaŋ kawana lita pinaayopɔin ni pirigili pahi piɛlaa kam zuɣu m-mali sara din nyɛ o chi min’ o kawana sara, ka bo kpam lita ata pahi kawaan’ tahili kam zuɣu.

²⁵ Gol’ so ŋun pahir’ ayopɔin biɛɣu pinaanu dali chuɣu maa puhibu daba ayopɔin puuni, di simdi ka o lan bo lala bina maa m-mali alahichi sanyoo sara mini bɛ ni zaŋdi sara shɛli nyɔri buɣim la ni chi mini kawana ni kpam sara.”