Read Dagbani Ɛzɛkiɛl 47 Bible Online

Ɛzɛkiɛl 47 - Dagbani bible

Ɛzɛkiɛl 47

¹ Ka o daa zaŋ ma labi Naawuni jɛmbu duu maa dunoli ni, ka kom daa zɔri yiri Naawuni jɛmbu duu maa dunɔbia lɔŋni n-zɔri kpari wulimpuhili polo (dama Naawuni jɛmbu duu maa tooni daa kpala wulimpuhili polo). Kom maa daa zɔri yirila Naawuni jɛmbu duu dunɔbia maa nudirigu polo tariga na zaŋ labi sara maligu bimbini nudirigu polo.

²Di nyaaŋa ka o daa lan zaŋ ma doli nuzaa polo dunɔdali yi n-gili samban’ ni n-chaŋ samban’ ni dunɔdali din kpa wulimpuhili polo la gbini, ka kom maa zɔri yiri nudirigu polo na.

³Ka doo maa daa gbibi binshɛli din buɣisiri la o nuu ni n-kpa wulimpuhili polo nti buɣisi mita kɔbisinu tariga, ka zaŋ ma siɣi kom maa ni, ka di ziliŋ nyɛ napɔŋkpuɣila tariga.

⁴Ka o daa lan buɣisi mita kɔbisinu, ka zaŋ ma siɣi kom maa ni, ka di ziliŋ nyɛ duna tariga. Ka o lan buɣisi mita kɔbisinu, ka zaŋ ma siɣi kom maa ni, ka di ziliŋ nyɛ shee tariga.

⁵Ka o lan buɣisi mita kɔbisinu, ka di nyɛla mɔɣ’ shɛli n ni ku lan tooi du, dama kom maa daa pahimi, di ziliŋ daa saɣiya ni nira duɣi li, di daa nyɛla mɔɣ’ shɛli nira ni ku tooi siɣi gari.

⁶Ka o daa yɛli ma, “Daadam, a nya dimbɔŋɔ?” Di nyaaŋa ka o daa lan zaŋ ma doli mɔɣili maa duli labi.

⁷N ni daa labi maa, ka n daa nya tihi pam mɔɣili maa duli yaɣa ayi.

⁸Ka o daa yɛli ma, “Kom ŋɔ zɔri kparila wulimpuhili polo yaɣili n-zɔri chani Araba vinvamli ni. Ka di yi zo nti lu teeku kom din bi zɔri ŋɔ ni, teeku kom maa ni niŋ ko’ nyaɣisili.

⁹Mɔɣili maa kom yi zo n-chaŋ luɣ’ shɛlikam, binnɛɔŋ kam ŋun gbamda ni niŋ nyɛvili, kom maa yi paai nimaani zahim pam ni beni. Di ni niŋ nyaɣisim. Ka mɔɣili maa kom yi paai luɣ’ shɛlikam binshɛɣukam ni niŋ nyɛvili.

¹⁰Niriba ni ʒe teeku noli n-gbahiri zahim zaŋ Ɛngɛdi hal ni Ɛnɛglaim. Di ni ti nyɛla lansi labbu shee. Ka zahim balibu pam ni ti be di ni kaman bɛ ni be Mɛditirɛniɛn Teeku ni shɛm la.

¹¹Amaa di bahi ni mini di biɛma ni kom din’ ti ku niŋ nyaɣisim. Din’ ti kul yɛn nyɛla din mali yalim.

¹² Mɔɣili maa duli yaɣa ayi zaa ni ti mali tihi din wandi wal’ shɛŋa bɛ ni dira. Di vari ti ku suura, ka di ku kɔŋ wala. Di ti yɛn wandila goli kam, dama kom din zɔri teeni li maa ti yɛn yirila Naawuni jɛmbu duu na. Di wala ni ti nyɛla bindirigu, ka di vari mi nyɛ din tibiri dɔro.”

¹³Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Yi ni yɛn pirigi tiŋgbɔŋ maa ti Izraɛl zuliya pinaayi la shɛm tarisi m-bɔŋɔ: Yisifu ni ti malila tarili buyi.

¹⁴Ka yi ti pirigi li ka di saɣisi taba. N daa poya ni n ni zaŋ li ti yi yaannima, ka tiŋgbɔŋ maa ti leei yi dini ni yi fali.

¹⁵Tiŋgbɔŋ maa tintariga ni yɛn nyɛ shɛm m-bɔŋɔ: Nuzaa polo, di ti yɛn zaŋla Mɛditirɛniɛn Teeku noli n-doli Hɛtilɔn nti gari Lɛbɔhamat n-zaŋ hal ni Zɛdad,

¹⁶n-zaŋ hal ni Bɛrɔta ni Sibiraim (din be Damaskus mini Hamat tintarisi sunsuuni la). N-zaŋ hal ni Hazɛrihatikɔn fɔntiŋ’ din be Hauran tintariga la.

¹⁷Dinzuɣu tintariga maa yɛn zaŋla teeku tariga hal ni Hazɛrɛnɔn din be Damaskus tintariga nuzaa polo, ka chɛ Hamat tintariga bahi nuzaa polo. Dina n-yɛn nyɛ nuzaa polo maa yaɣili.

¹⁸Wulimpuhili polo tintariga ni ti zaŋla Damaskus mini Hauran sunsuuni la m-baɣisi Jɔɔdɛn mɔɣili n-tim Giliad mini Izraɛl tiŋgbana sunsuuni gari n-zaŋ hal ni wulimpuhili polo teeku ni n-zaŋ hal ti paai Tama. Dina n-yɛn nyɛ wulimpuhili polo yaɣili.

¹⁹Nudirigu polo tintariga yɛn zaŋla Tama hal ni Mɛribatikadɛshi koma dooshee n-zaŋ nimaani hal ni Ijipti kulibɔŋ ni Mɛditirɛniɛn Teeku ni. Dimbɔŋɔ n-nyɛ nudirigu polo yaɣili.

²⁰Wulinluhili polo tintariga nti yɛn nyɛ Mɛditirɛniɛn Teeku noli zaŋ hal ti paai luɣ’ shɛli din be Lɛbɔhamat samban’ ni. Dimbɔŋɔ n-nyɛ wulinluhili polo yaɣili.

²¹Yi ni ti yɛn pirigi tiŋgbani maa ti Izraɛl zuliya maa shɛm m-bala.

²²Yi mini tinzunnim’ bɛn be yi sani ka nyɛ bɛn dɔɣi bihi ni ti pirigi li ti taba, ka di leei yi dini. Bɛ ni ti be yi sani kaman Izraɛl tiŋbihi n-nyɛ ba la. Bɛ ni ti mali tarili Izraɛl zuliya maa sani.

²³Tinzunnim’ yi be zuliya shɛb’ sani, yin’ tim’ ba bɛ tarili nimaani. Yawɛ ŋun nyɛ ti Duuma ŋɔ n-yɛli lala maa.”