Read Dagbani Ɛzɛkiɛl 5 Bible Online

Ɛzɛkiɛl 5 - Dagbani bible

Ɛzɛkiɛl 5

¹“Ka nyini Daadam, zaŋmi takɔbi shɛli din dira n-leei wanzam piliŋ n-zaŋ li pini a zabiri min’ a teeŋkɔbiri, ka zaŋ sania zahim li m-pirigi li.

²Ka zaŋ di pirigibu ʒiibuta puuni yim zuɣu n-nyo buɣim fɔŋ maa puuni teei gili dabisa maa yi ti naai. Ka zaŋ takɔbi maa chɛ ŋ-ŋmahiŋmahi pirigibu buta zuɣu yim bahi tiŋ’ maa puuni gili. Ka zaŋ pirigibu buta zuɣu yim la bahi ka pɔhim ʒe li chaŋ, ka n ŋooi n takɔbi kari doli li.

³Di saha ka a pii di biɛla gbini a binyɛrigu naŋgbambili.

⁴Ka a lan pii di shɛli niŋ buɣim ni n-nyo li. Ka buɣim maa yi nimaani na nti lu Izraɛlnim’ zaa zuɣu.”

⁵Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Jɛrusalɛm m-bɔŋɔ, mani n-zaŋ li zali zuliya pam sunsuuni, ka chɛ ka tiŋgbɔna pam gil’ li.

⁶Amaa di zaɣisi n zalikpana la mini n zaligu shɛŋa din pahi la, ka leei din bie n-gari zuliya shɛŋa mini tiŋgbɔn’ shɛŋa din gil’ li zaa ka zaɣisi n zalikpana la, ka bi doli n zaligu shɛŋa din pahi la.

⁷Dinzuɣu yi Duuma NAAWUNI ni yɛli shɛm m-bɔŋɔ: Yi ni nyɛ tipawumlinima n-gari zuliya shɛb’ bɛn gili ya niŋ sunsuuni, ka bi doli n zalikpana la bee n-gbibi n zaligu shɛŋa din pahi la, amaa ka dolila zuliya shɛb’ bɛn gili ya niŋ sunsuuni ŋɔ zaligunim’ la zuɣu,

⁸Yawɛ ŋun nyɛ yi Duuma ŋɔ ni yɛli shɛm m-bɔŋɔ: Mani, man’ maŋmaŋa kanimina ni n ti liri ya n-kari ya saria zuliya kam ninni.

⁹Yi ni tum din chihiri shɛŋa maa zaa zuɣu, n ni niŋ ya n ni na ʒi n-niŋ ya shɛm, ka mi ku lan niŋ di kpee yaha.

¹⁰ Biɛhiŋ kani, bihilaamba ni ti ŋubi bɛ bihi, ka bihi gba ti ŋubi bɛ laamba. N ni ti kari ya saria, ka wurim yi bɛn kpalim la dolisi pɔhim kam.

¹¹“Dinzuɣu Yawɛ ŋun nyɛ yi Duuma ŋɔ yɛliya, Mani ŋun be ŋɔ zuɣu, biɛhiŋ kani, yi ni zaŋ yi binyoya mini yi ni tum tuumbiɛri din chihiri shɛŋa zaa n-ta n-jɛmbu duu daɣiri la zuɣu, n ni kun ya, n ku yuli yaɣi so zuɣu, m mi ku zo so nambɔɣu.

¹²Alɔbo ni lu yi pirigibu buta puuni yim zuɣu bee ka kum ku ba yi sani. Ka bɛ zaŋ takɔbi n-ku yi pirigibu buta puuni yim zuɣu yi sani. Ka n wurim yi pirigibu buta puuni yim zuɣu mi dolisi pɔhim; ka ŋooi takɔbi kari doli ba.

¹³“N suhu ni ti yiɣisi pam. Ka n suhuyiɣisili maa ti lu bɛ zuɣu hal ka n nini ti tiɣi li. Ka bɛ baŋ ni man’ Yawɛ n-yɛli lala n nyuli zabbu puuni, n suhu yi ti yiɣisi bahi bɛ zuɣu.

¹⁴Din pahi nyɛla n ni chɛ ka a zani dabari, ka leei zuliya kam bɛn gil’ a ni yɛn maani so ansarisi bɛnkam gariti ninni.

¹⁵“A ni ti leei bɛ ni maani so ansarisi mini bɛ ni turi so, ka di leei saɣisigu mini dabiɛm zuliya shɛb’ bɛn gil’ a la sani saha shɛlikam, ka darigi a tibili pam. Man’ Yawɛ n-yɛli lala maa.

¹⁶N yi ti zaŋ bindiripooli din nyɛ m peenzala la to a, piɛma din kuri niriba ka n yɛn zaŋ to a ku a, ka chɛ ka bindiripooli kul luri a zuɣu mɔŋ a bindirigu.

¹⁷ N ni chɛ ka kum mini mɔɣu ni biŋkɔbiri lu a zuɣu n-ku a bihi. Alɔbo mini ninvuɣ’ kubo ni lu a zuɣu, ka chɛ ka bɛ zaŋ takɔbi lu a zuɣu. Man’ Yawɛ n-yɛli lala maa.”