Read Dagbani Ɛzɛkiɛl 7 Bible Online

Ɛzɛkiɛl 7 - Dagbani bible

Ɛzɛkiɛl 7

¹Ka Yawɛ daa yɛli ma,

²“Nyin’ daadam, Yawɛ ŋun nyɛ a Duuma ŋɔ ni yɛli Izraɛl tiŋgbɔŋ shɛm m-bɔŋɔ: ‘Bahigu!’ Tiŋgbɔŋ maa yaɣa anahi bahigu saha paaya.

³Pumpɔŋɔ, bahigu maa ʒila a zuɣu, ka n ni yiɣisi n suhu pam bahi a zuɣu. N ni kar’ a saria kaman a tuma ni nyɛ shɛm. N ni darig’ a tibili a ni tum din chihiri shɛŋa zaa zuɣu.

⁴N ku chɛ a bee n-zo a nambɔɣu, n ni darigi a tibili a tuma zuɣu saha shɛli a ni tum din chihiri shɛli ni na be a kɔbili ni maa.’ Di saha ka a baŋ ni mani n-nyɛ Yawɛ.”

⁵Yawɛ ŋun nyɛ ti Duuma ŋɔ yɛliya, “Ashaara niŋbu din doli taba, nyama, dina n-kanna ŋɔ.

⁶Bahigu maa paana. Di bahigu saha paaya. Di nyɛla din yiɣisi lu yi zuɣu. Nyama, di kanna.

⁷Nyin’ ŋun be tiŋgbɔŋ ŋɔ ni, a bahiyoli paag’ a, di saha paaya, di biɛɣu neeya, di ti yɛn nyɛla suhusaɣiŋgu dabisili, ka pa ni suhupiɛlli vuri yɔbu zoya zuɣu.

⁸“Pumpɔŋɔ n ni yiɣisi n suhu pam bahi yi zuɣu. N ni kari ya saria kaman yi tuma ni nyɛ shɛm, ka darigi yi tibili yi ni tum din chihiri shɛŋa zaa zuɣu.

⁹N ku chɛn ya, n ku zɔn ya nambɔɣu. N ni darigi yi tibili kaman yi tuma ni nyɛ shɛm saha shɛli yi ni tum din chihiri shɛli maa ni na be yi kɔbili ni maa. Di saha yi ni baŋ ni mani n-nyɛ Yawɛ ŋun darigiri niriba tibili.”

¹⁰Nyam’ dabisili maa! Nyama, di kanna, yi bahiyoli biɛɣu neeya. Tibidarigibo jaaŋgbee yirigi puma, ka karimbaani tiri.

¹¹Damli dambu zooya n-leei ninvuɣ’ biɛtali jaaŋgbee. Bɛ ni so ku kpalim, bɛ ninvuɣ’ gbaliŋ maa zaa mini bɛ daazichi ni bɛ jilima ku kpalim.

¹²Saha paaya, dabisili maa vu m-miri, ŋun dari miri ka o mali suhupiɛlli, ka ŋun kɔhiri miri ka o fabinda, dama suhuyiɣisili maa yɛn lula bɛ zaa zuɣu.

¹³Dama bɛ ni na be bɛ nyɛvili ni ŋɔ, ŋun kɔhi maa ku lan nya o ni kɔhi shɛli maa, dama ʒii maa yɛrila bɛ zaa yɛla, ka di mi ku vuui, bɛ tuumbiɛri maa zuɣu, bɛ ti ku lan mali bɛ nyɛviya.

¹⁴Bɛ piɛbi kikaa, ka mali binshɛɣukam shili, amaa so ku chaŋ tɔbu tuhibu, dama n suhuyiɣisili maa ni lu bɛ zaa zuɣu.

¹⁵Takɔbi ni ti be samban’ ni, ka alɔbo mini kum be tiŋ’ puuni, bɛ ni ti zaŋ takɔbi ku bɛn be sambani, ka kum min’ alɔbo mi lu bɛn be tiŋ’ puuni zuɣu.

¹⁶Ka bɛn ti zo n-tiligi ni ti bela zoya zuɣu kaman vinvamli ni ŋmana la. Ka bɛ zaa ti fabindi bɛ tuumbiɛri maa zuɣu.

¹⁷Bɛ nuhi zaa ni ti gbarigi, ka bɛ duna ni chɔɣisi.

¹⁸Bɛ ni ti zaŋ buri pili, ka dabiɛm gbahi ba. Vi ni ti be bɛ zaa nina ni, ka bɛ zuɣuri zaa ti nyɛ zuɣukpina.

¹⁹Bɛ ni ti zaŋ bɛ daanzinfa bahi solɔri zuɣu. Bɛ ni ti lihi bɛ salima kaman din bi viɛla. Bɛ daanzinfa mini bɛ salima ku tooi tiligi ba Yawɛ suhuyiɣisili dali. Di ku tooi kari bɛ kum bee m-pali bɛ puya. Dama dina n-daa nyɛ kuɣituurili din kpɛhi ba alahichi ni.

²⁰Bɛ daa zaŋ bɛ yɛri din viɛli, ka nyɛ bɛ ni mali shɛli nyuri bara la m-mali binnana din chihira ka nyɛ n ni je binshɛŋa la. Dinzuɣu n ni chɛ ka di leei binshɛli din nyɛ daɣiri bɛ sani.

²¹“N ni zaŋ li ti tinzunnima, ka bɛ zaŋ li ti dunia ŋɔ ninvuɣ’ biɛri, ka di leei bɛ ni ŋme n-di shɛli. Bɛ ni ti ta li daɣiri.

²²N ni ŋmaligi n nini ka chɛ ba ka bɛ ta n luɣ’ kasi shee ŋɔ daɣiri. Ŋmɛnditoya ni ti kpe di ni nti ta li daɣiri.

²³Malimiya zoligo! Dama ninvuɣ’ kubo kul palila tiŋgbɔŋ maa ni, ka damli dambu pali tiŋ’ puuni.

²⁴N ni zaŋ zuliya biɛri na ka bɛ ti deei bɛ yiya su. N ni chɛ ka bɛn mali yaa karimbaani naai, ka bɛ ta bɛ luɣ’ shɛŋa din be kasi daɣiri.

²⁵Biɛrim yi ti paai ba, bɛ ni bɔri suhudoo, amaa ka ku nya li.

²⁶Ashaaranim’ kul yɛn tuɣila taba, ka bɛ kul wumdi ŋumaŋuma luɣilikam. Bɛ ti kul yɛn bɔrila ʒii nyabu anabinim’ sani. Maligumaaniba wuhibu ni ti naai, ka ninkura kpamli yɛtɔɣa ti naai.

²⁷Naa ni ti fabili, ka nabia ti yihi tahima, ka bɛ tiŋgbɔŋ maa nim’ zaa bɔɣiri ti sɔhira. N ni ti yɛn niŋ ba kaman bɛ tuma ni nyɛ shɛm, ka kari ba saria kaman bɛ saria karibu ni nyɛ shɛm zuɣu. Ka bɛ ti baŋ ni mani n-nyɛ Yawɛ.”