Read Dagbani Daniɛl 10 Bible Online

Daniɛl 10 - Dagbani bible

Daniɛl 10

¹Naa Sairus ŋun daa nyɛ Pɛriʒia naa la ni daa di nam zaŋ chaŋ yuma ata saha, ka bɛ daa kahigi yɛligu shɛli n-wuhi Daniɛl ŋun yuli lan booni Bɛlitishaaza la. Ka yɛligu maa mi daa nyɛla yɛlimaŋli, amaa ka di baŋbu lee to. Ka o daa baŋ yɛligu maa, ka lan baŋ ʒii maa gba.

²Di saha maa man’ Daniɛl daa kul bela fabila ni zaŋ hal ti paai bakɔi muna ata.

³N daa bi di bindir’ nyaɣisili bee ŋ-ŋub’ nimdi bee n-chɛ ka wain to n noli, m mi daa bi niŋ kpam ʒe n ni hal ka bakɔi muna ata maa ti gari.

⁴Yuuni puuni gol’ so ŋun be tooni biɛɣ’ pisinaanahi dali ka n daa ʒe Tigiris Mɔɣ’ tital’ la duli,

⁵ ka daa ti kpuɣi n zuɣu lihi nya so ka o ye binyɛr’ piɛlli din mali shaara, ka lo salima din nyɛ alali shɛlɔrigu.

⁶O niŋgbuna daa nyɛlisirimi kaman kuɣ’ viɛlli, ka o ninni nyaɣisiri kaman saa nyaɣisibu neesim, ka o nina gba nyaɣisiri kaman buɣim la. O bɔɣiri min’ o bɛhi daa ŋmanila daanya shɛli bɛ ni so n-nyahi ka di neei, ka o kukoli mi vuri kaman salo n-yɔri vur’ la.

⁷Man’ Daniɛl kɔŋko n-daa nya ʒii maa. Ninvuɣ’ shɛb’ bɛn daa be n sani bɛn’ daa bi nya li, amaa ka dabiɛm lee gbahi ba pam ka bɛ zo nti sɔɣi.

⁸N kɔŋko n-daa kul kpalim be nimaani n-lihiri alahiziba ʒii maa. Ya’ buriginli daa lan ka n ni, ka n ninni biɛhigu taɣi hal ka so ku lan tooi baŋ ni mani m-bala gba.

⁹N ni daa wum o kukoli, n daa lu n-dɔn’ la tiŋa n-liɣi ka n nina kpa tiŋa.

¹⁰Di saha ka nu’ shɛli daa gbaai ma n-kpuɣi ma gbani n duna zuɣu ka n nuhi dihi tiŋa, ka n ni’ sɔhira.

¹¹Ka o daa yɛli ma, “Daniɛl, Naawuni yur’ a pam. Yiɣisim’ zani n-luɣ’ a tibili wum n ni yɛn yɛl’ a shɛm ŋɔ viɛnyɛliŋga; bɛ tim ma la a sanna.” O ni daa yɛli ma lala maa, ka n yiɣisi zani ka n ni’ na kul sɔhira.

¹²Di saha ka o daa yɛli ma, “Daniɛl, di zɔri dabiɛm. Naawuni pun deeg’ a suhigu dabisi’ shɛli dali a ni daa tɛhi baŋ ka siɣis’ amaŋa ni di chɛ ka a baŋ yɛla maa la. A suhigu maa deebu zuɣu ka n kana maa.

¹³ Pɛriʒia nabia n-daa taɣ’ ma zali sol’ ni biɛɣ’ pisiniyini. Amaa ka Maikil ŋun nyɛ malaikanim’ nabia la daa kana ti sɔŋ ma, ka n daa chɛ o mini Pɛriʒia nabia maa nimaani,

¹⁴ka kana ni nti chɛ ka a baŋ din ti yɛn niŋ a niriba dahin’ shɛli ha. Dahin shɛli ha yɛla ʒii m-bala.”

¹⁵O ni daa yɛli ma lala maa, ka n zaŋ n zuɣu ba tiŋa, ka kɔŋ yɛligu.

¹⁶Di saha ka binneen’ so ŋun daa ŋmani ninsala teeg’ o nuu na ti shihi n naŋgbampiba, ka n yɛl’ o, “N dana, n ni nya ʒii shɛli maa chɛmi ka n kɔba ni chɔɣisichɔɣisi.

¹⁷N ŋmanila dabili ŋun ʒe o dan’ tooni. Wula ka n ni tooi tɔɣisi n dan’ yɛtɔɣa? Ya’ buriginli bee vuhim lan ka n ni.”

¹⁸Ka binneen’ so ŋun daa ŋmani ninsal’ la lan zaŋ o nuu shihi ma, ka n nya ka yaa maan niŋ n niŋgbuna ni pahi.

¹⁹Ka o lan yɛli ma, “Naawuni tim’ a suhudoo! Naawuni yur’ a pam; di chɛ ka a suhu zɔhiri bee n-chɛ ka dabiɛm mal’ a shɛli zuɣu.” Saha shɛli o ni daa yɛli ma lala maa, ka n nya ka yaa lan niŋ n niŋgbuna ni pahi, ka n yɛli, “N dana, yɛlim’ ma a ni mali shɛli ni a yɛli ma, dama a chɛ ka n nya yaa.”

²⁰Ka o bɔhi ma, “A mi din chɛ ka n ka a sanna maa? N kamina ni n ti kahigi din sab’ be yɛlimaŋli litaafi ni la wuh’ a. To, pumpɔŋɔ n ni labi ka m mini Pɛriʒia nabia la ti kpe zabili ni. Di nyaaŋa Giriis nabia gba ni kana ka m min’ o ti zabi. Ka so mi kani n-sɔŋdi ma yɛla ŋɔ ni m-pahila Maikil ŋun nyɛ yi naa la.