Read Dagbani Hozia 1 Bible Online

Hozia 1 - Dagbani bible

Hozia 1

¹ Yawɛ ni daa zaŋ yɛtɔɣ’ shɛli yɛli Bɛri bia Hozia Naa Uzia mini Naa Jɔtam ni Naa Ahaz ni Naa Hɛzɛkia bɛn daa nyɛ Juda nanim’ la ni Jɔash bia Jɛrɔbɔam ŋun daa nyɛ Izraɛl naa la ʒiɛmana ni m-bɔŋɔ.

²Yawɛ ni daa yɛn tuui chɛ ka Hozia zaŋ yɛtɔɣa tɔɣisi Izraɛlnima, o daa yɛlila ŋun’ Hozia, “Cham’ ti kpuɣi pagɔrili n-dɔɣi pagɔrili bihi. Dama tiŋgbani ŋɔ nim’ tum yolimyolim pam ka zaɣisi man’ Yawɛ, ka bi ʒe ma yim.”

³Dinzuɣu ka o daa chaŋ ti kpuɣi Diblaim bipuɣiŋga Goma ka o daa niŋ pua n-dɔɣi bidibiga.

⁴ Ka Yawɛ daa yɛl’ o, “Bolim’ o yuli ‘Jɛziriil’,[1] dama di ku lan yuui, n ni darigi Jɛhu zuliya tibili o ni daa ku ninvuɣ’ shɛb’ Jɛziriil la ʒim yihibu zuɣu, ka chɛ ka Izraɛl nam zani tariga.

⁵Dindali maa n ni ti kabisi Izraɛlnim’ bidibbina zaa Jɛziriil Vinvamli ni.”

⁶Ka o daa lan niŋ pua n-dɔɣi bipuɣiŋga. Ka Yawɛ daa yɛl’ o, “Bolim’ o yuli ‘Kunyanambɔzɔbo’, dama n ku lan zo Izraɛlnim’ nambɔɣu, ka chɛ bɛ taali hal biɛla gba.

⁷Amaa n ni zo Juda zuliya nambɔɣu. Ka man’ Yawɛ ŋun nyɛ bɛ Naawuni ŋɔ ni fa ba bahi. M bi yɛn zaŋ tɔbiri bee takɔbi bee yuri bee wɔribariba fa ba bahi.”

⁸Kunyanambɔzɔbo ni daa ŋmaai bihili, ka o lan niŋ pua n-dɔɣi bidibiga yaha.

⁹Ka Yawɛ daa yɛl’ o, “Bolim’ o yuli ‘Panniriba’, dama yi pala n niriba, m mi pala yi Naawuni.”

¹⁰ Amaa Izraɛlnim’ galisim ni ti ŋmanila teeku duli bihigu din ku tooi buɣisi ka mi ku tooi kali ŋɔ. Ka luɣ’ shɛli di ni yɛli ba, “Yi pala n niriba ŋɔ,” di ni ti lan boli ba, “Naawuni ŋun be ŋɔ bidibisi.”

¹¹Ka Judanim’ mini Izraɛlnim’ ti laɣim taba, ka bɛ ni ti malila zuɣulaan’ yino, ka bɛ biɛhigu ti chaŋ tooni tiŋgbani maa ni, dama Jɛziriil[2] dabisili maa ni ti nyɛla dabisi’ titali.