Read Dagbani Hozia 10 Bible Online

Hozia 10 - Dagbani bible

Hozia 10

¹Izraɛlnim’ daa ŋmanila azichi wain ti’ shɛli din wali wala. Bɛ zuliya ni kul galisiri shɛm, lala ka bɛ gba kul mɛri maligu bimbina pahira. Bɛ tiŋgbɔŋ dariza ni kul pahiri shɛm, lala ka bɛ gba kul pahiri bɛ ni jɛmdi binwɔɣil’ shɛŋa la gba dariza.

²Bɛ suhuri ni palila ʒiŋmabo. Pumpɔŋɔ bɛ ni ʒi bɛ tuumbiɛri zambu. Naawuni ni ŋme ŋ-ŋma bɛ maligu bimbina maa, ka wurim bɛ binwɔɣila maa.

³Dama pumpɔŋɔ bɛ ni yɛli, “Ti lan ka naa, dama ti bi zɔri Yawɛ, ka bɔ ka naa lee yɛn niŋ ti ti?”

⁴Bɛ tɔɣisiri yɛtɔɣ’ yoya, ka lɔri alikauli, ka pɔri pɔri din ka buchi, dinzuɣu saria karibu tɔhi zanna kaman mɔ’ shɛŋa din nyɛ bɔchaa ni bili puu ni shɛm la.

⁵Samarianim’ suhuri zɔhirimi Bɛtavɛn naɣibil’ la zuɣu. Di niriba ni ti kum naɣibil’ maa zuɣu. Ka di tindaannim’ la ti kum di zuɣu pam. Bɛ ni ti kum pam di ni kɔŋ jilima shɛl’ la zuɣu.

⁶Yɛlimaŋli, bɛ ni ti zaŋ buɣili maa maŋmaŋ’ kuli Asiria nti zaŋ li ti na’ titali, ka di leei bɛ farigu yɔbu o sani. Bɛ ni ti dihi Ifriimnim’ vi, ka vi ti gbahi Izraɛlnim’ bɛ buɣili maa zuɣu.

⁷Samarianim’ naa ni ti bahi yoli kaman tipɔɣu din pa kom zuɣu la.

⁸ Bɛ ni ti saɣim buɣ’ jɛmbo luɣ’ shɛŋa din be Avɛn, ka nyɛ Izraɛlnim’ daalahichi la. Ka gɔhi mini suligunyinyaɣu ti bili di maligu bimbina maa zuɣu. Ka bɛ ti yɛli zoya, “Limsimiya ti.” Ka yɛli daboya, “Lumiya ti zuɣu na.”

⁹ Izraɛlnima, Gibia dal’ la ka yi daa tum alahichi. Nimaani ka bɛ daa dii gbaai alahichi tumbu. Dinzuɣu tɔbu ni lu bɛ zuɣu Gibia.

¹⁰N ni kana ti liri ninvuɣ’ shɛb’ bɛn nyɛ tipawumli nim’ ŋɔ n-fiɛb’ ba. Ka n yi ti fiɛb’ ba bɛ ni tum tuumbiɛri buyi maa zuɣu, zuliya shɛb’ ni laɣisi tab’ na ti liri ba.

¹¹Ifriimnim’ daa ŋmanila bɛ ni wuhi naɣisa’ so ka o bɔri ni bɛ zaŋ o bu chi, ka n daa bi zaŋ binshɛli pa o nyiŋgoli din viɛl’ la zuɣu. Amaa pumpɔŋɔ n ni zaŋ dapua n-ga Ifriimnim’ nyiŋgoya ni. Judanim’ ni jari, ka Yaakubu zuliya yɛbisi bɛmaŋmaŋ’ puu.

¹² Birimiya wuntitali ti yimaŋa, ka ti kpuɣi atam din nyɛ yurilim din ka ŋmali. Komiya yi tiŋgbani din doya ka bi ko la, dama saha paaya ni yi bo Yawɛ ka o kana ti tiligi ya.

¹³Yi birila ninvuɣ’ biɛtali, ka kpuɣi atam din bi doli yɛlimaŋli. Yi dila ʒiri tiwala. Yi ni niŋ yi chɛchɛbunsi mini yi tɔbbihi bɛn galisi ŋɔ naani la zuɣu,

¹⁴tɔbu ni lu yi zuɣu, ka yi birininim’ la zaa ti wurim. Di ni ti bemi kaman Naa Shaliman ni daa ŋme Bɛtaribɛlnim’ tɔbu, ka wurim li, ka zaŋ bihi mini bɛ manim’ tɔri taba n-kuri ba shɛm la.

¹⁵Di ni ti niŋ yinim’ Izraɛlnim’ lala, dama yi tuumbiɛri galisiya pam. Zaŋ chaŋ biɛkaali, bɛ ni ti ku Izraɛlnim’ naa.