Read Dagbani Hozia 11 Bible Online

Hozia 11 - Dagbani bible

Hozia 11

¹ Izraɛlnim’ ni daa pɔr’ la n daa yuri ba. N daa boli ba yihi Ijipti tiŋgbɔŋ ni na kaman m bidibisi la.

²Ka n ni kul booni ba waawaayili shɛm, lala ka bɛ kpɛri yɔɣu ka chɛri ma. Bɛ maanila buɣili Baalnima, ka tuɣindi tulaale zim niŋdi binnana.

³Amaa mani n-daa wuhi Ifriimnim’ chandi. Mani n-daa kpuɣi ba gbibi n nuhi ni. Amaa bɛ daa bi baŋ ni mani n-chɛ ka bɛ kpaŋ maa.

⁴N daa zaŋla nirilim mihi vo ba chaŋ. N daa zaŋla yurilim mihi niŋ ba, ka leei ŋun yihi bin’ tibisi shɛŋa din ga bɛ noya la, ka silim tiŋa n-dihi ba bindirigu.

⁵Bɛ ni zaɣisi ni bɛ ku labi n sanna maa zuɣu, bɛ ni labi Ijipti, ka Asiria naa ti leei bɛ naa.

⁶Bɛ ni ti zaŋ takɔbiri lu bɛ fɔntinsinim’ zuɣu ŋ-ŋme n-kabisi kur’ shɛŋa din kpari bɛ dunɔdaya la, ka ku ba bɛ birininim’ ni.

⁷N niriba maa kul kpɛrila yɔɣu ka chɛri ma, dinzuɣu ka n zali ba ni bɛ ʒi ʒi’ tibisa maa, ka so ku tooi yihi li.

⁸ Ifriimnima, wula ka n ni tooi zaɣisi ya? Izraɛlnima, wula ka n ni tooi chɛn ya bahi? Wula ka n ni niŋ ya kaman n ni daa niŋ Adimanim’ shɛm la? Ka wula ka n ni tooi niŋ ya kaman n ni daa niŋ Zɛbɔiimnim’ shɛm la? N suhu taɣiya, ka n nambɔzɔbo galisi.

⁹N ku niŋ n suhu ni yiɣisi ka n yɛn niŋ shɛm maa. N ku lan ku Ifriimnim’ yaha, dama m pala daadam, n nyɛla Naawuni. Mani ŋun be kasi ŋɔ be yi sunsuuni, ka n ku kana ni n ti ku niriba.

¹⁰Bɛ ni ti doli Yawɛ, ka o ti ŋum kaman gbuɣinli la; yɛlimaŋli, o shiri ni ti ŋum, ka o niriba ti yi wulinluhili polo na ka bɛ ni sɔhira.

¹¹Bɛ ni ti yi Ijipti kana ka bɛ ni’ sɔhiri kaman noombihi la. Ka shɛb’ ti yi Asiria kana kaman ŋmana la, ka n ti zaŋ ba labisi bɛ yinsi. Yawɛ n-yɛli lala maa.

¹²Ifriimnim’ zaŋla ʒiŋmabo gili ma niŋ sunsuuni, ka Izraɛlnim’ mi zaŋ yɔhiŋ gili ma. Amaa Naawuni na mi Judanim’ yɛla, ka bɛ nyɛ bɛn ʒe Ŋun be Kasi la yim.