Read Dagbani Hozia 12 Bible Online

Hozia 12 - Dagbani bible

Hozia 12

¹Ifriimnim’ taɣirila pɔhim chana, ka zɔri doli wulimpuhili polo pɔhim dabisili kam. Bɛ ʒiri mini bɛ suhuyiɣisili kul pahirimi. Ka bɛ mini Asirianim’ niŋdi daabiligu, ka bɛ tiri Ijiptinim’ kpam.

²Yawɛ galim Judanima. O ni darigi Yaakubu tibili ka di dol’ o biɛhigu ni nyɛ shɛm, ka yo o o tuma samli.

³ O ni daa be o ma pul’ ni, o daa gbaala o jabil’ kpee napɔŋkpaa; ka o ni daa ti bi doo, o daa vala Naawuni.

⁴ O daa va malaika n-nyaŋ o, ka kuhi niŋ o n-suh’ o bɔri sɔŋsim. Ka o daa ti nya Naawuni Bɛtɛl, ka Naawuni daa tɔɣis’ o yɛtɔɣa nimaani.

⁵Yawɛ ŋun nyɛ Tɔbbihi Naawuni ŋɔ, o yuli n-nyɛ Yawɛ.

⁶Dinzuɣu yinima, yi Naawuni sɔŋsim zuɣu, labimiya o sani. Gbibiya yurilim mini yɛlimaŋli, ka kul guhimiya yi Naawuni maa sahakam.

⁷Daabi’ so ŋun mali ʒiri kuruwa nyɛla ŋun bɔri niriba ŋaribu.

⁸Ifriimnim’ yɛliya, “Aa, ti mali buni, ti bo buni zali timaŋa!” Amaa bɛ buni maa zaa ku tooi yo bɛ ni tum tuumbiɛ’ shɛŋa maa samli.

⁹ Mani n-nyɛ Yawɛ ŋun nyɛ yi Naawuni ŋun daa yihi ya Ijipti tiŋgbɔŋ ni na la. N ni lan chɛ ka yi be suɣa ni yaha kaman yi ni daa pun be di ni shɛm yi chuɣu puhibu dabisa saha la.

¹⁰N daa tɔɣisi anabinim’ yɛtɔɣa ka chɛ ka bɛ nya ʒiinim’ pam. Mani n-daa chɛ ka anabinim’ maa ŋahi yɛtɔɣ’ ŋaha.

¹¹Giliadnim’ yi tum alahichi, biɛhiŋ kani, bɛ ni bahi yoli. Giligal tiŋgbɔŋ ni bɛ maanila maligu tiri naɣilahi. Lala zuɣu bɛ maligu bimbina maa ni ti ŋmanila kuɣa ka bɛ laɣisi duhi puu ni.

¹² Yaakubu daa zo n-kuli Mɛsopoteemia, nimaani ka o daa tum tuma paɣ’ zuɣu; o daa gulila biŋkɔbiri ni di yo o paɣ’ kpuɣibu samli.

¹³ Yawɛ daa chɛ ka anabi yihi Izraɛlnim’ Ijipti tiŋgbɔŋ ni na nti gbib’ ba.

¹⁴Ifriimnim’ tum tuun’ shɛli din tahi suhuyiɣisili pam na, dinzuɣu Yawɛ chɛ ka ninvuɣ’ kubo taali la ʒi bɛ zuɣu, ka o ni ti darigi bɛ tibili bɛ ni daa tur’ o la zuɣu.