Read Dagbani Hozia 13 Bible Online

Hozia 13 - Dagbani bible

Hozia 13

¹Ifriimnim’ daa yi tɔɣisi yɛtɔɣa, niriba niŋgbuna sɔhirimi, bɛ daa tibigi ba pam Izraɛl tiŋgbɔŋ ni. Amaa ka bɛ daa ti jɛmdi Baal, ka di zuɣu chɛ ka bɛ tum alahichi ka kpi.

²Ka pumpɔŋɔ bɛ na kul tumdila alahichi pahira. Bɛ zaŋ kuriti mali binnana, ka baŋsimnim’ dooi anzinfa mali buɣa, ka di zaa nyɛ machɛl’ ni mali shɛli, ka bɛ yɛri niriba, “Malimiya buɣa ŋɔ.” Ka ninsalinim’ jɛmdi naɣibihi.

³Dinzuɣu bɛ ni ti ŋmanila asiba paɣili bee maligim din kpahi lu bi to la bee bɛ ni yɛli kabɔɣili ni wurigu shɛli bahi la bee nyɔhi din yiri takɔro ni la.

⁴Mani n-nyɛ Yawɛ ŋun nyɛ yi Naawuni ŋun daa yihi ya Ijipti tiŋgbɔŋ ni na la. Yi daa bi mi Naawuni so, naɣila mani. Ka tiligira so kani pahi n zuɣu.

⁵Mani n-daa guli ya mɔɣu ni tiŋgban’ kuŋ ni.

⁶ Amaa bɛ ni daa ti di n-tiɣi, ka di wuhi ni bɛ tiɣiya ka bɛ daa zaŋ karimbaani kpɛhi bɛ suhuri ni, dinzuɣu ka bɛ tam n yɛla.

⁷Dinzuɣu n ni liri ba kaman gbuɣinli ni liriti binyara shɛm la, n ni dɔni sol’ naŋgban’ kpaŋ’ gu ba kaman jɛŋgbini ni doya gu binyara shɛm la.

⁸Kaman bɛ ni gbahi jɛŋgbini bihi ka o suhu yiɣisi shɛm la, lala ka n suhu ni yiɣisi bahi bɛ zuɣu. N ni dari tɔhi ba, ka ŋub’ ba kaman gbuɣinli la, kaman mɔɣu ni biŋkɔbiri ŋ-ŋub’ ba la.

⁹Yinim’ Izraɛlnima, n ni kun ya, ka ŋuni n-lee ni tooi sɔŋ ya?

¹⁰ Yi daa yɛliya, “Tim’ ti naa mini kpambaliba.” Yi naa maa lee be ya pumpɔŋɔ n-ni tooi tiligi ya? Yi kpambaliba maa lee be ya n-ni tooi zabi yi zuɣu?

¹¹ N daa je suli n-tin ya nanima, ka n suhu ti yiɣisi, ka n lan deei ba ka chɛn ya.

¹²N sabi Ifriimnim’ tuumbiɛri sɔŋ, n zaŋ bɛ daalahichi maa niŋ sɔɣisili shee.

¹³Biɛrim shɛli din mali ba ŋmanila paɣ’ ni yɛn dɔɣi ka biɛrim shɛli mal’ o la. Bɛ ŋmanila bi’ jɛrigu ŋun bi bɔri ni o yi o ma pul’ ni na.

¹⁴ N tiligim’ ba kpiimba biɛhigu shee chandi? N tiligim’ ba kum ni? Nyin’ kum, a daalɔbɔnim’ la lee be ya? Nyin’ kpiimba biɛhigu shee, a bahiyol’ la lee be ya? N nini bi lan zɔri nambɔɣu.

¹⁵Hal bɛ yi ti zoori kaman momaha la, Yawɛ pɔhim ni yi wulimpuhili polo mɔɣu ni na nti ʒe nyuui bɛ kɔbilnina, ka bɛ kɔzɔrima nyuui. Ka di ʒe bɛ tiŋgbani maa ni daazichi zaa chaŋ.

¹⁶Samarianim’ ni ti ʒi bɛ tuumbiɛri zambu, dama bɛ zaɣisi bɛ Naawuni. Bɛ ni ti zaŋ takɔbi ku ba, ka zaŋ bɛ biliɛri fiɛbi tiŋ’ chɛrisichɛrisi, ka karigi bɛ paɣipuhinim’ puya.