Read Dagbani Hozia 2 Bible Online

Hozia 2 - Dagbani bible

Hozia 2

¹Yɛlim’ a mabia ŋun nyɛ doo la, “N niriba.”[3] Ka yɛl’ a tizɔpaɣa, “O nya nambɔzɔbo.”[4]

²M mabihi, suhimiya sɔŋ yi ma, dama o lan pala m paɣa, m mi lan pala o yidana. Suhimiya ka o yihi pagɔrisigu o kɔbili ni ka yihi zina niŋbu o suhu ni.

³Di yi pa lala n ni pirig’ o ka chɛ o o zaɣim kaman bɛ ni daa dɔɣ’ o shɛm. N ni niŋ’ o kaman tiŋgban’ kuŋ din tam chaai la, ka chɛ ka kɔnyuri ku o.

⁴Ka n ku zo o bihi nambɔɣu, dama bɛ nyɛla pagɔrili bihi.

⁵Dama bɛ ma daa gɔrila pagɔrisigu; paɣ’ so ŋun daa tiɣi bɛ pua daa tumla vi tuma. Dama o daa yɛliya, “N ni chaŋ m mamanim’ bɛn tiri ma bindirigu mini kom ni ago ni atampanima ni kpam ni dam ŋɔ sani.”

⁶Dinzuɣu n ni sa gɔhi ŋar’ o soli, ka me gooni gu o soli, ka o ku lan tooi nya soli.

⁷O ni ti zo n-dol’ o mamanima, amaa ka ku paai ba. O ni ti bo bɛ shee, amaa ka ku nya ba. Di saha o ni ti yɛli, “N ni labi n yidaan’ taa la yiŋa; dama di daa so n zuɣu gari pumpɔŋɔ.”

⁸O daa bi baŋ ni mani n-tir’ o kawana mini wain ni kpam ni anzinfa ni salin’ shɛli bɛ ni mali jɛmdi Baal la.

⁹Dinzuɣu n ni deei n kawana, kawana ŋahibu saha, ka deei n wain, wain tɔɣibu saha, ka deei n daago mini atampa shɛli n ni daa zaŋ ti o ni o lir’ o gbin’ la.

¹⁰N ni pirig’ o ka chɛ o o zaɣim o mamanim’ maa ninni, ka so ti ku tooi fa o n nuu ni bahi.

¹¹N ni chɛ ka o suhupiɛlli min’ o churi puhibu ni o goli paliga churi puhibu ni o vuhim dabisa ni o ni zali chu’ shɛŋa zaa la zani tariga.

¹²N ni saɣim o wain tihi min’ o fiig tihi pu’ shɛli o ni yɛra, “M mamanim’ ni zaŋ shɛli yo ma samli m-bɔŋɔ la.” N ni zaŋ li leei yɔɣuni, ka yɔɣuni biŋkɔbiri ŋubi di zaa.

¹³N ni darig’ o tibili o ni daa tam n yɛla Baalnim’ chuɣu dabisa saha, ka tuɣindi ba tulaale zim, ka pir’ o nintua, ka ye salima n-zo n-dol’ o mamanim’ la zuɣu. Yawɛ n-yɛli lala maa.

¹⁴Dinzuɣu nyama, n ni niŋ’ o marisa n-zaŋ o ka tiŋgban’ nɛli ni na nti tɔɣis’ o yurilim yɛtɔɣa.

¹⁵ N ni zaŋ o wain tihi puu la labisi ti o, ka chɛ ka Akɔr Vinvamli[5] leei tahima dunoli. Nimaani o ni ti saɣi ti ma kaman o paɣisarilim saha la ni kaman o ni daa yi Ijipti tiŋgbɔŋ ni na saha shɛl’ la.

¹⁶Dindali maa o ni ti lan boli ma o yidana yaha, ka pa ni o Baal.[6]

¹⁷Dama n ni ti yihi Baalnim’ yuya o nol’ ni, ka o ku lan boli bɛ yuya yaha.

¹⁸“Dindali maa n ni ti lo mɔɣu ni biŋkɔbiri mini noonsi bɛn yiɣiri zuɣusaa ni biŋgbamda bɛn be tiŋgban’ ni alikauli tin ya, ka kpihim tɔbiri mini takɔbiri ni tɔb’ tuhibu tiŋgbani ŋɔ ni, ka chɛ ka yi dɔni ka barina shɛli kani.

¹⁹N ni ti lan zaŋ nyin’ Izraɛl leei m paɣa sahakam ni wuntizɔbo mini yɛlimaŋli ni yurilim pam ni nambɔzɔbo.

²⁰N ni ti gbib’ a ni ʒiɛyimtali, ka a baŋ man’ Yawɛ.

²¹Yawɛ yɛliya, “Dindali maa n ni ti garigi zuɣusaa ka di mi garigi tiŋgbani,

²²ka tiŋgbani mi ti saɣi ti kawana mini wain ni kpam, ka di mi ti saɣi ti Jɛziriil.[7]

²³ Ka mmaŋmaŋ’ ti zaŋ o ʒili tiŋgbani maa ni. Ka Kunyanambɔzɔbo[8] ni ti nya nambɔzɔbo n sani, ka n ni ti yɛli Panniriba,[9] ‘Yi nyɛla n niriba;’ ka bɛ mi ni ti yɛli, ‘Nyini n-nyɛ ti Naawuni.’ ”