Read Dagbani Hozia 4 Bible Online

Hozia 4 - Dagbani bible

Hozia 4

¹Yinim’ Izraɛlnima, wummiya Yawɛ ni yɛli shɛm, dama tiŋgbani ŋɔ nim’ mali galimi o sani. Ʒiɛyimtali lan kani, ka nirilim lan kani, ka so bi lan mi Naawuni tiŋgbɔŋ maa ni.

²Niriba kul pɔrila pɔri, ka ŋmari ʒiri, ka kuri niriba, ka zura, ka niŋdi zina. Bɛ baɣa lan ka shɛlikam ni, kubu n-naɣ’ kul beni.

³Dinzuɣu ka tiŋgbani fabinda, ka ŋunkam be di ni kɔba ni chɔɣisi. Ka mɔɣu ni biŋkɔbiri mini noonsi bɛn yiɣira ni teeku ni zahim gba ku lan beni.

⁴Amaa di ŋmɛriya tab’ naŋgbankpeeni, so mi di galim’ o kpee. Yinim’ maligumaaniba ŋɔ ka n galim.

⁵Yi ni ti tuuri wuntaŋ’ ni, ka anabinim’ pahi yi zuɣu ka yi tuuri yuŋ. N ni saɣim yi tiŋgbɔŋ ŋɔ.

⁶N niriba bahi yoli bɛ ʒilinsi zuɣu. Yi ni zaɣisi baŋsim zuɣu n gba zaɣisi ya, yi lan pala m maligumaaniba. Ka yi ni tam n zaligu yɛla zuɣu, n gba ni tam yi bihi yɛla.

⁷Bɛ ni kul galisi pam shɛm, lala ka bɛ tumdi alahichi pam n sani. N ni chɛ ka bɛ jilima nyabu leei vi.

⁸N niriba alahichi tumbu puuni ka bɛ nyari bindirigu, ka bɔri ni bɛ kul tumdi alahichi.

⁹N ni ti kul yɛn niŋ niriba maa shɛm, lala ka n yɛn niŋ maligumaaniba maa gba. N ni ti darigi bɛ tibili yo bɛ tuumbiɛri maa samli.

¹⁰Bɛ ni ti di, amaa ka ku tiɣi. Bɛ ni ti niŋ zina, amaa ka ku dɔɣi bihi, dama bɛ zaɣisi man’ Yawɛ ka jɛmdila buɣa.

¹¹Wain kurili mini wain palli niriba yɛm.

¹²N niriba bɔhiri dari binyara ni bɛ baŋ shɛli, ka bɛ jaaŋgbɛhi wuhiri ba binyara din ti yɛn niŋ. Dama zina niŋbu n-vo ba kpɛhi yɔɣu, ka bɛ chɛ Naawuni ka jɛmdila buɣa.

¹³Bɛ maani maligunim’ zoya zuɣu mini oki tihi ni ti’ shɛŋa bɛ ni booni pɔpila ni tɛribint la gbini, dama di mahim viɛla. Dinzuɣu ka yi bipuɣinsi gɔri pagɔrisigu, ka yi daamiliyanim’ niŋdi zina.

¹⁴Yi bipuɣinsi yi gɔri pagɔrisigu, m bi yɛn darigi bɛ tibili bee n-darigi yi bihi paɣiba tibili bɛ yi niŋ zina. Dama yi dɔbba maŋmaŋ’ gba chana ka bɛ mini buɣa ni pagɔra ti doona kaman buɣa maligu la. Ka ninvuɣ’ shɛb’ bɛn ka yɛm bahi yoli.

¹⁵Hal yinim’ Izraɛlnim’ ni tum bi ʒe yim tuma maa zaa yoli, di bi simdi ni di zuɣu chɛ ka Judanim’ gba kpe taali ni. Di kpɛnya Giligal tiŋ’ puuni bee n-kpɛnya Bɛtavɛn,[10] ka miriya ka yi po n-yɛli “Hal ka Yawɛ ŋun be ŋɔ zuɣu.”

¹⁶Izraɛlnim’ tipawumli ŋmanila naɣisaa tipawumli. Yawɛ ni tooi lan dihi ba kaman piɛbil’ ni be mɔri pam shee shɛm la?

¹⁷Ifriimnim’ gba kpɛla buɣ’ jɛmbo ni, chɛliya ba.

¹⁸Bɛ nyuri dam kuuna n-chani tumdi yolimyolim. Bɛ paɣila vidibo gari jilima nyabu.

¹⁹Pɔhim ni ʒe ba chaŋ, ka bɛ maligu bimbina zuɣu ti chɛ ka vi gbahi.