Read Dagbani Hozia 5 Bible Online

Hozia 5 - Dagbani bible

Hozia 5

¹Yinim’ maligumaaniba, wummiya! Yinim’ Izraɛlnima, gbilisimiya tibili! Yinim’ nayilinima, luɣimiya yi tiba wum! Saria karibu maa ʒila yi zuɣu, dama yi leela zana Mizipa, ka leei laŋa n-yɛrigi pa Tabo Zoli zuɣu,

²ka gbi bɔɣ’ zilinli sɔŋ Akasia fɔŋ ni. Amaa n ni fiɛb’ bɛ zaa.

³M mi Ifriim, ka Izraɛlnim’ pala bɛn ni sɔɣi ka n ku nya ba. Dama Ifriimnima, pumpɔŋɔ yi tum yolimyolim. Ka Izraɛlnim’ kpe daɣiri ni.

⁴Bɛ tuumbiɛri maa chɛ ka bɛ ku lan tooi ŋmaligi kpa bɛ Naawuni polo. Dama yolimyolim maa pun kpe bɛ kɔbili ni, ka bɛ bi lan mi Yawɛ.

⁵Izraɛlnim’ karimbaani yi zahira, ka bɛ nini nya li. Izraɛlnim’ ni ti tuui lu bɛ tuumbiɛri maa ni. Ka Judanim’ gba ni ti tuui lu m-pahi bɛ zuɣu.

⁶Bɛ ni ti zaŋ bɛ niɣi mini bɛ biŋkɔbbaligu n-chani bɔri Yawɛ shee, amaa bɛ ti ku nya o, dama o zo bɛ sani.

⁷Bɛ bi lan ʒe Yawɛ yim, dama bɛ dɔɣi tinzun bihi. Pumpɔŋɔ yi gol’ paliga churi puhibu nyɛla din ni chɛ ka yi mini yi puri zaa bahi yoli.

⁸Piɛbimiya gbɛri Gibia tiŋ’ puuni, ka piɛbiya kikahi Rama tiŋ’ puuni. Ŋmɛmiya tɔb’ chiriga Bɛtavɛn tiŋ’ puuni. Bɛnjamin zuliya, lumiya abirima.

⁹Tibidarigibo dabisili dali, Ifriim tiŋ’ ni ti kpalim dabari. Izraɛl zuliya ka n yɛri din shiri ti yɛn niŋ maa.

¹⁰Juda nanim’ ŋmanila ninvuɣ’ shɛb’ bɛn sɔɣi vuɣi tintariga kpahi. N suhuyiɣisili ni ti lu bɛ zuɣu kaman saa la.

¹¹Ifriimnim’ bela muɣisigu ni, ka diri wahala saria karibu ni, bɛ ni lo ni bɛ dolila binshɛŋa din ka buchi zuɣu.

¹²Dinzuɣu n ni be kaman zunzuya Ifriimnim’ sani ka be kaman bin’ pɔŋ Judanim’ sani.

¹³Ifriimnim’ ni daa nya bɛ dɔro maa, ka Judanim’ mi nya bɛ daŋ’ la, di saha ka Ifriimnim’ daa chaŋ Asiria natital’ la sani ti bo sɔŋsim. Amaa o ku tooi chɛ ka yi kpaŋ bee n-tibi yi daŋ’ maa.

¹⁴Dama n ni gbahi Ifriimnim’ kaman gbuɣinli ni gbahiri binyara shɛm la, ka gbahi Judanim’ kaman gbuɣimbil’ ni gbahiri binyara shɛm la. Hal mmaŋmaŋ’ ni dari tɔhi ba n-zaŋ ba chaŋ, ka so ku tooi fa ba bahi.

¹⁵“N ni lan labi ti be m biɛhigu shee hal ka bɛ ti saɣi ni bɛ tum taali, ka bo n shee. Bɛ yi ti be muɣisigu ni, bɛ ni bo n shee.”