Read Dagbani Hozia 7 Bible Online

Hozia 7 - Dagbani bible

Hozia 7

¹Amaa nyama, saha shɛli n yi ti yɛn tibi Izraɛlnima, Ifriimnim’ tuumbiɛri yirila palo, ka Samarianim’ ninvuɣ’ biɛtali yi zahira; dama bɛ ŋmari ʒiri, ka tayiɣisi kabiri yiya n-kpɛri ti zura, ka ninvuɣ’ fariba mi be samban’ ni fara.

²Amaa bɛ bi tɛhiri ni m mi bɛ tuumbiɛri maa. Ka pumpɔŋɔ bɛ tuumbiɛri maa gili ba niŋla sunsuuni, ka bɛ ʒe n tooni.

³Bɛ tuumbiɛri maa tirila naa suhupiɛlli, ka bɛ biɛriyoli maa tiri bɛ kpamba suhupiɛlli.

⁴Bɛ zaa nyɛla zinaniŋdiba. Bɛ ŋmanila bɔrɔbɔro du’ shɛli bɛ ni mali buɣim niŋ ka di bii, ka bɔrɔbɔromaana bi lan niŋ buɣim niŋ di ni bɔrɔbɔro ŋɔribu saha hal ti paai di dubu saha la.

⁵Ti Naa maa nam dibu chuɣu puhibu dabisili yi ti paai, o min’ o kpambaliba nyurila wain hal ti yɛli ni bo m-bala, ka laɣim maani niriba ansarisi.

⁶Dama bɛ suhuri kul palila nia biɛri n-diri kaman bɔrɔbɔro duu buɣim la. Yuŋ yi paai bɛ suhuyiɣisili ŋmanila wurigu buɣim doya, ka biɛɣu ti neei ka di taai kaman buɣim zibizibi la.

⁷Bɛ zaa kul tulimi kaman bɔrɔbɔro duu la, ka kuri bɛ nanima. Bɛ ku nanim’ zaa, ka bɛ so bi suhi ma ni n sɔŋ o.

⁸Ifriimnim’ zaŋla bɛmaŋ’ gari zuliya shɛb’ ni. Ifriimnim’ nyɛla bɛn dɔni yaɣ’ yini tabili, ka bɛ lɛbigi.

⁹Tinzunnim’ deei bɛ yaa zaa, ka bɛ bi baŋ lala. Bɛ bi mi ni bɛ kum saha bi lan waɣa.

¹⁰Izraɛlnim’ karimbaani di shɛhira jɛndi ba. Amaa ka bɛ bi ŋmaligi chaŋ Yawɛ ŋun nyɛ bɛ Naawuni sani bee n-suh’ o dimbɔŋɔnim’ zaa zuɣu.

¹¹Ifriimnim’ ŋmanila ŋmani. Bɛ jɛrigiya zaa, ka ka yɛm. Bɛ boonila Ijiptinim’ ni bɛ ti sɔŋ ba, ka lan booni Asirianim’ ni bɛ ti sɔŋ ba.

¹²N ni labi laŋ’ piri ba saha shɛli bɛ ni chani maa. N ni siɣisi ba tiŋ’ na kaman noombihi la. N ni fiɛb’ ba bɛ tuumbiɛri maa zuɣu.

¹³Mbusim be bɛ zuɣu, dama bɛ birigi n sani. Bahiyoli n-doli ba, dama bɛ zaɣisi ma. N naan tiligi ba, amaa ka bɛ beni ŋmarila ʒiri pari ma.

¹⁴Bɛ bi fabindi niŋdi ma ni bɛ suhuri zaa, amaa bɛ dola bɛ bindɔhi zuɣu kuhira. Dama bɛ zaŋ bini ŋma bɛmaŋa bɛ kawana mini bɛ wain zuɣu, ka zaɣisi ma.

¹⁵N ni kul wuhi ba ka ti ba yaa maa zaa yoli, bɛ bo soya n-tum tuumbiɛri jɛndi ma.

¹⁶Bɛ ŋmaligi jɛmdila buɣili Baal ka chɛ ma; bɛ ŋmanila tɔb’ shɛli din ka naani niŋbu. Bɛ ni zaŋ takɔbi ku bɛ kpamba zaa bɛ yɛtɔɣ’ yoya zuɣu. Ka dimbɔŋɔ ti leei bɛ daansarisi malibo Ijipti tiŋgbɔŋ ni.