Read Dagbani Joɛl 3 Bible Online

Joɛl 3 - Dagbani bible

Joɛl 3

¹Dama di dabisa maa ni mini di saha maa n yi ti chɛ ka Judanim’ mini Jɛrusalɛmnim’ lan tɔŋ,

²n ni ti laɣim zuliya kam zaa n-zaŋ ba ti zali Jɛhɔshafat Vinvamli ni. N ni ti kari ba saria nimaani bɛ ni daa niŋ n niriba Izraɛlnim’ shɛm la zuɣu. Dama bɛ nyɛla n ni su shɛba. Bɛ daa kari ba kpɛhi tinzun tinsi ni, ka pirigi n tiŋgbani ti taba.

³Bɛ daa pihila kuɣa sɔŋ ni bɛ lihi nya ŋun yɛn su n niriba; ka daa zaŋ bidibbihi n-kɔhi bo pagɔra, ka zaŋ bipuɣinsi mi n-kɔhi nyu wain.

⁴Taainim’ mini Sidɔnnim’ ni tin’ shɛŋa din zaa be Filistia tiŋgbɔŋ ni ŋɔ, bɔ ka yi lee bɔri ni yi niŋ ma maa? Yi bɔrimi ni yi bɔhi ma biɛri binshɛli zuɣu? Yi yi bɔrimi ni yi bɔhi ma biɛri, n ni chɛ ka yi tuma maa ŋmaligi lu yi zuɣu yomyom!

⁵Yinima n-kpuɣi n daanzinfa mini n salima; ka ʒi n daazichi nɛma nti niŋ yi wuna jɛmbu duri ni.

⁶Ka yi daa lan zaŋ Judanim’ mini Jɛrusalɛmnima n-kɔhi Giriikinim’ zuɣu, ka bɛ ʒi ba chaŋ katiŋ’ ka chɛ bɛmaŋmaŋ’ tiŋgbɔŋ.

⁷Amaa pumpɔŋɔ n ni yihi ba yi ni daa zaŋ ba kɔhi luɣ’ shɛŋa maa ni na. N ni chɛ ka yi tuma maa lab’ lu yi zuɣu.

⁸ N ni zaŋ yi bidibisi mini yi bipuɣinsi n-kɔhi Judanim’ zuɣu; ka bɛ mi zaŋ ba kɔhi Sabinim’ bɛn nyɛ zuliya shɛb’ bɛn be katiŋ’ la nim’ zuɣu. Man’ Yawɛ n-yɛli lala maa.

⁹Molimiya molo ŋɔ zuliya kam zaa ni n-yɛli ba: Malimiya shili n-tuhi tɔbu; bolimiya yi tɔbutuhiriba. Chɛliya ka tɔbutuhiriba zaa yina n-vu m-mirina!

¹⁰ Zaŋmiya yi kubiɛlima n-kuri takɔbiri, ka zaŋ yi su’ kara mi kuri kpana. Chɛliya ka ninvuɣ’ gbarima gba yɛli, “Ti nyɛla tɔbutuhiriba.”

¹¹Niŋmiya yomyom kana, yinim’ zuliya shɛb’ bɛn zaa gili luɣilikam maa, laɣimmiya nimaani. Yawɛ, timmi a tɔbbihi na!

¹²Zuliya kam zaa malim’ shili n-ka Jɛhɔshafat Vinvamli[1] ni na. Ka n ti ʒin’ nimaani n-kari zuliya kam bɛn gili luɣilikam zaa la saria.

¹³ Kpuɣimiya yi gɔriti dama atam kpuɣibu saha paaya. Kamiyana ti siɣi no, dama wain bɔɣili paliya. Wain ni tɔɣiri niŋdi binshɛŋa ni maa palimi hal ti puuri bahira; dama bɛ tuumbiɛri galisiya pam.

¹⁴Niriba tusatusa m-be Saria Karibu Vinvamli maa ni. Dama Yawɛ dabisili la miriya Saria Karibu Vinvamli la ni.

¹⁵Ka wuntaŋ’ mini goli ni zibigi ka saŋmarisi gba ni zaɣisi peebu.

¹⁶ Yawɛ tɔɣisi yɛtɔɣa Ziɔn Zoli zuɣu; ka o kukoli vuri yi Jɛrusalɛm na; ka zuɣusaa mini tiŋgbani sɔhira. Amaa Yawɛ sani n-nyɛ o niriba sɔɣibu shee; Izraɛlnim’ sɔɣibu viɛlli shee m-bala.

¹⁷Di saha maa ka yi ni baŋ ni man’ Yawɛ n-nyɛ yi Naawuni ŋun be Ziɔn din nyɛ n zoli din be kasi la zuɣu. Jɛrusalɛm ni nyɛla tin’ shɛli din be kasi, ka tinzunnim’ ku lan tooi tuhi fa li yaha.

¹⁸Din dali maa wain ni ti tɔɣiri zoya zuɣusaa luri na; ka bihim ti zɔri daboya zuɣu; ka Juda kulibɔna zaa ti pali kom zɔra. Ka kɔbil’ nini ti yooi Yawɛ jɛmbu duu, ka kom zɔri ti luri Akasia Vinvamli ni.

¹⁹Ijipti tiŋgbɔŋ ni leei tiŋgbɔn shɛli din ka bukaata, ka Ɛdom tiŋgbɔŋ mi leei tiŋgbɔn shɛli din bahi yoli, bɛ ni daa liri Judanima n-ku ninvuɣ’ shɛb’ bɛn ka taali bɛ tiŋgbɔŋ ni la zuɣu.

²⁰Amaa niriba kul ni be Juda tiŋgbɔŋ ni sahakam, ka niriba kul ni be Jɛrusalɛm ʒiɛmani kam ni.

²¹N ni bɔhi ba biɛri bɛ ni daa ku ninvuɣ’ shɛb’ maa zuɣu ka ku kpihim bɛ taali maa. Dama Man’ Yawɛ bela Ziɔn.