Read Dagbani Amɔs 1 Bible Online

Amɔs 1 - Dagbani bible

Amɔs 1

¹ Amɔs ŋun daa nyɛ Tɛkɔa piɛgul’ la yɛtɔɣa m-bɔŋɔ. O daa nya li zaŋ chaŋla Izraɛlnim’ polo Juda Naa Yuzaia mini Jɔash bia Jɛrɔbɔam ŋun daa nyɛ Izraɛl naa la ʒiɛman’ ni. Di saha di daa chɛla yuma ayi ni tiŋgbani dambu la niŋ.

² Amɔs daa yɛliya, “Bɛ wum Yawɛ damli Ziɔn zoli zuɣu; ka o kukoli tahigu yi Jɛrusalɛm na. Biŋkɔbiri mɔŋubira kuuya, ka Kamɛl Zoli zuɣu kuui.”

³Yawɛ yɛliya, “Damaskusnim’ tuumbiɛri buta ni bunahi zuɣu, n ku chɛ bɛ tibili darigibu. Dama bɛ zaŋ ninkuunsi n-nahim Giliadnima nahindi biɛɣu.

⁴Dinzuɣu n ni chɛ ka buɣim di Naa Hɛziɛl yiŋa, ka chɛ ka buɣim di n-saɣim Naa Bɛnhadad ni me goma gili luɣ’ shɛŋa la zaa.

⁵ Man’ Yawɛ yɛliya: N ni ŋme n-saɣim Damaskus duno’ kara, ka kari Avɛn vinvamlinim’[1] mini Bɛtɛdɛn naa. N ni chɛ ka bɛ gbahi Sirianim’ kuli Kɛɛr tiŋgbɔŋ ni nti leei daba.”

⁶Yawɛ yɛliya, “Gazanim’ tuumbiɛri buta ni bunahi zuɣu n ku chɛ bɛ tibili darigibu. Dama bɛ gbahi tiŋgbɔn muni niriba chaŋ ti ti Ɛdomnima ka bɛ zaŋ ba leei daba.

⁷Dinzuɣu n ni chɛ ka buɣim di Gaza goma n-saɣim bɛ ni me goma gili luɣ’ shɛŋa zaa.

⁸ Mani yi Duuma Naawuni yɛliya, n ni ku Ashidɔdnima, ka ku Ashikɛlɔn naa. N ni darigi Ɛkurɔn tibili, ka chɛ ka Filistianim’ bɛn kpalim zaa kpi.”

⁹Yawɛ yɛliya, “Taainim’ tuumbiɛri buta ni bunahi zuɣu, n ku chɛ bɛ tibili darigibu. Dama bɛ gbahi tiŋ’ muni niriba zaa n-tahi Ɛdom, ka bi gbib’ bɛ mini ba ni daa lo alikauli shɛl’ la.

¹⁰ Dinzuɣu n ni chɛ ka buɣim di Taai goma n-saɣim bɛ ni me goma gili luɣ’ shɛŋa la zaa.”

¹¹Yawɛ yɛliya, “Ɛdomnim’ tuumbiɛri buta ni bunahi zuɣu, n ku chɛ bɛ tibili darigibu. Dama bɛ zaŋ takɔbiri n-kari doli bɛ mabihi[2] Izraɛlnim’ ka nambɔɣu zɔbu kani. Bɛ sujee maa kɔŋla tim, ka bɛ suhuyiɣisili mi kɔŋ tariga zanibu.

¹² Dinzuɣu n ni chɛ ka buɣim di Tɛman n-saɣim bɛ ni me goma gili luɣ’ shɛŋa Bɔzira la.”

¹³Yawɛ yɛliya, “Ammɔnnim’ tuumbiɛri buta ni bunahi zuɣu, n ku chɛ bɛ tibili darigibu. Dama bɛ ni tuhiri ni bɛ deei tiŋgbani palo pahi la zuɣu, bɛ daa kuhi karigi paɣipuhinim’ puya Giliad.

¹⁴Dinzuɣu n ni chɛ ka buɣim di Raba gooni n-saɣim bɛ ni me goma gili luɣ’ shɛŋa la zaa. Di saha tɔbu tuhibu tahigu ni ti tahiri dindali maa, ka zabili ti be kaman sanʒiɛɣu la.

¹⁵ Ka bɛ ti gbahi bɛ naa min’ o nabihi kuli tinzun tiŋ’ ni,” Man’ Yawɛ n-yɛli lala maa.