Read Dagbani Amɔs 2 Bible Online

Amɔs 2 - Dagbani bible

Amɔs 2

¹Yawɛ yɛliya, “Mɔabnim’ tuumbiɛri buta ni bunahi zuɣu n ku chɛ bɛ tibili darigibu; bɛ ni daa zaŋ Ɛdom naa kɔba nyo buɣim la zuɣu.

²Dinzuɣu n ni chɛ ka buɣim di Ɛdomnim’ tiŋa n-saɣim bɛ ni me goma gili luɣ’ shɛŋa Kɛriɔt la. Ka Mɔabnim’ ni kpi tɔbu tuhibu vuri mini tɔbbihi tahigu ni kikahi kumsi zuɣu.

³ N ni ku bɛ naa, ka ku bɛ nabihi zaa pah’ o zuɣu.” Man’ Yawɛ n-yɛli lala maa.

⁴Yawɛ yɛliya, “Judanim’ tuumbiɛri buta ni bunahi zuɣu, n ku chɛ bɛ tibili darigibu. Dama bɛ zaɣisi Yawɛ zalikpana la, ka bi dol’ o zaligu shɛŋa din pahi la, amaa ka bɛ ʒiri ŋmabu chɛ ka bɛ birigi n-doli bɛ yaannim’ ni daa doli so’ shɛŋa la.

⁵Dinzuɣu n ni chɛ ka buɣim di Judanima n-saɣim bɛ ni me goma gili luɣ’ shɛŋa Jɛrusalɛm la.”

⁶Yawɛ yɛliya, “Izraɛlnim’ tuumbiɛri buta ni bunahi zuɣu, n ku chɛ bɛ tibili darigibu, dama bɛ zaŋ wuntizɔriba n-kɔhi deei anzinfa laɣibaligu, ka zaŋ nandaamba n-taɣi namda.

⁷Bɛ no n-taai nandaamba niŋ taŋkpaɣu ni, ka daai bɛn diri wahala bahi, ka doo min’ o ba laɣindi mali dabipaɣ’ yino. Lala ka bɛ niŋ saɣim n yuli din be kasi la.

⁸Bɛ yɛri binyɛri’ shɛŋa bɛ ni zaŋ pa talima n-dooni bimbini kam gbini, ka nyuri wain shɛli bɛ ni deei bɛ sandiriba sani bɛ Naawuni jɛmbu duu.

⁹ “Amaa yi zuɣu ka n daa ku Amɔrinima daa wɔɣawɔɣa kaman sida tihi, ka mali yaa kaman oki tihi la. N daa ku bɛ mini bɛ bihi zaa.

¹⁰N daa lan yihi ya Ijipti tiŋgbɔŋ ni na m mali ya be mɔɣu ni yuun’ pihinahi ni yi deei Amɔrinim’ tiŋgbɔŋ su.

¹¹ Ka n daa pii yi bi’ shɛba n-leeg’ anabinima, ka pii yi nachimba shɛba n-leei Nazarinima.[3] Izraɛlnima, bee pa lala n-nyɛ li? Man’ Yawɛ n-yɛli lala maa.

¹²Amaa ka yi chɛ ka Nazarinim’ maa nyuri wain, ka yɛri anabinima ni bɛ miri ka bɛ tɔɣisiri Naawuni yɛtɔɣa.

¹³Nyama, n ni dihi ya sɔŋ tiŋa yi biɛhigu shee kaman bɛ ni vari kabɔba m-marigiri taba tɔroko lɔɣu ni shɛm la.

¹⁴Tizɔra ti ku tooi zo n-tiligi, ka yaalana ti kɔŋ kpiɔŋ, ka kpiɔŋlana ti ku tooi tilig’ omaŋa.

¹⁵Ninvuɣ’ so ŋun gbibi tɔbu ti ku tooi zani, ka ŋun tooi zɔri pam ti ku tooi tilig’ omaŋa, ka wɔribara gba ti ku tooi tilig’ omaŋa.

¹⁶Dindali maa tɔbbihi bɛn mali suhukpeeni ni ti zaŋ bɛ bidibbina bahi ka zo ni nuzaŋa. Man’ Yawɛ n-yɛli lala maa.”