Read Dagbani Amɔs 4 Bible Online

Amɔs 4 - Dagbani bible

Amɔs 4

¹Yinim’ Samaria paɣiba bɛn ŋmɛlim be kaman Bashan naɣ’ shɛb’ bɛ ni dihiri viɛnyɛliŋga la, wummiya, yi nahindi ninvuɣ’ shɛb’ bɛn ka yaa mini nandaamba, ka yɛri yi yidaannima, “Timiya ti wain ka ti nyu.”

²Yi Duuma NAAWUNI poya o kasitali puuni yɛli, “Nyamiya, dahin’ shɛli kanna ka bɛ ni ti gbahi ya n-vo n-chaŋ. Hal ziŋgɔhi ka bɛ ni ti zaŋ vo yi ni shɛb’ bɛn kpalim chaŋ.

³Bɛ ni ti vɔn ya tahi gooni ŋmabu shee nti daai ya bahi Hamɔn.” Man’ Yawɛ n-yɛli lala maa.

⁴Yi Duuma NAAWUNI yɛliya, “Kamiya Bɛtɛl na nti tum tuumbiɛri; ka chaŋya Giligal nti tum tuumbiɛri. Zaŋmiya yi asiba kam sara maligu na, ka zaŋ yi bini pii puuni zaɣ’ yini na daba ata dali kam.

⁵Zaŋmiya bɔrɔbɔro din nyɛ yi wumpaɣibo sara maligu na, ka moliya yi ni tiri pin’ shɛŋa pahiri la molo, dama yinim’ Izraɛlnim’ ni yu’ ni yi niŋ shɛm m-bala!”

⁶Yawɛ yɛliya, “N tin ya nyina din viɛla, ka chɛ ka kum lu yi tiŋ’ kam ni, di zaa yoli ka yi bi labi n sanna.

⁷Ka m mɔŋ ya saa saha shɛli yi bindira ni bɔri saa pam. N chɛ ka saa miri tin’ shɛlinima, ka bi miri tin’ shɛlinima; ka chɛ ka saa miri pu’ shɛl’ ni, ka chɛ ka o bi miri pu’ shɛl’ ni ka di bindira kpira.

⁸Ka n lan chɛ ka tins’ ayi bee tins’ ata niriba chani tin’ yin’ ni ni bɛ ti nya kom nyu, ka bɛ yi chaŋ, bɛ ti bi nyari nyuri ka di saɣiri ba; di zaa yoli, ka yi bi labi n sanna.” Man’ Yawɛ n-yɛli lala maa.

⁹Yawɛ yɛliya, “N chɛ ka biisim ku yi bindira, ka chɛ ka toli saɣim yi puri mini yi tihi puri ni yi fiig tihi ni yi olivi tihi, di zaa yoli, ka yi bi labi n sanna.”

¹⁰Yawɛ lan yɛli, “N chɛ ka alɔbo din daa lu Ijiptinim’ zuɣu la tatabo lu yi zuɣu; ka chɛ ka bɛ zaŋ takɔbi n-ku yi nachimba; ka gbahi yi yuri zaa chaŋ; ka chɛ ka yi sansan’ ni nyo luɣiluɣi kpɛri ya; di zaa yoli, ka yi bi labi n sanna.”

¹¹ Yawɛ lan yɛli, “N chɛ ka yi shɛb’ kpimi kaman n ni daa chɛ ka Sɔdomnim’ mini Gomɔranim’ kpi shɛm la; ka yi ni shɛb’ mi daa tiligi ka di ŋmanila bɛ ni darigi yihi da’ shɛli buɣim ni. Di zaa yoli, ka yi bi labi n sanna.

¹²Dinzuɣu Izraɛlnima, N ni darigi yi tibili, ka n ni yɛn niŋ ya lala maa zuɣu, malimiya shili gu man’ ŋun nyɛ yi Naawuni ŋɔ!”

¹³Dama nyamiya, ŋuna n-nam zoya, ka nam pɔhim. O kahigi din be o suhu ni n-wuhi ninsala. Ŋuna n-chɛ ka yuŋ zibira. O nyɛla ŋun chani gindi dunia ŋɔ ni. O yuli m-booni Yawɛ, Naawuni ŋun nam binshɛɣukam zaa!