Read Dagbani Amɔs 7 Bible Online

Amɔs 7 - Dagbani bible

Amɔs 7

¹Nyama, n Duuma NAAWUNI daa wuhi ma, ka n nya ka o namla toli ka bɛ galisi pam, bɛ ni daa chɛ nayili wɔrimɔri, ka mɔri maa lan piligi puhirina saha shɛli.

²Toli maa ni daa ŋubi mɔri maa zaa naai saha shɛli, ka n yɛli, “Yaa n Duuma NAAWUNI, n suhir’ a, chɛli bɛ taali! Yaakubu ku be. O pɔri pam.”

³Ka Yawɛ daa taɣ’ o tɛha ka yɛli, “N ku chɛ ka lala niŋ.”

⁴N Duuma NAAWUNI daa lan chɛ ka n nya binshɛli ʒii. Nyama ŋuna n Duuma NAAWUNI daa zaŋla buɣim ni o darig’ o niriba tibili. Buɣim maa daa dila teeku, ka lan diri tiŋgbani gba.

⁵Di saha ka n kuhi yɛli, “N Duuma NAAWUNI, n suhir’ a, dim’ suɣilo. Yaakubu ku be. O pɔri pam!”

⁶Ka Yawɛ daa taɣ’ o tɛha ka yɛli, “N ku chɛ ka lala niŋ.”

⁷O daa lan wuhi ma shɛli. Nyama, n daa nyami ka n Duuma ʒe bɛ ni zaŋ bimbuɣisirigu buɣisi m-me goon’ shɛli gbini; ka bimbuɣisirigu maa be o nuu ni.

⁸Ka Yawɛ bɔhi ma, “Amɔs, bɔ ka a lee nya?” Ka n yɛl’ o, “Bimbuɣisirigu.” Di saha ka n Duuma yɛli ma, “Nyama, n zaŋla bimbuɣisirigu sɔŋ n niriba Izraɛlnim’ sunsuuni; n ku lan ka bɛ sanna yaha.

⁹N ni chɛ ka Yisahaku zuliya jɛmbu shee saɣim; ka chɛ ka Izraɛlnim’ sara maligu bimbin’ la shee saɣim; chɛ ka bɛ zaŋ takɔbi ku Naa Jɛrɔbɔam zuliya zaa.”

¹⁰Di saha ka Bɛtɛl maligumaana Amazia daa tim ti yɛli Izraɛl Naa Jɛrɔbɔam, “Amɔs yila a nyaaŋa Izraɛlnim’ sani. O yɛtɔɣa muɣila tiŋgbani maa.

¹¹O ni yɛli shɛm m-bɔŋɔ: ‘Bɛ ni ti zaŋ takɔbi ku Naa Jɛrɔbɔam tɔbu ni, ka gbahi Izraɛlnim’ kuli tinshee katiŋ’ ha.’ ”

¹²Di saha ka Amazia daa yɛli Amɔs, “Anabi, zom’ kuli Juda tiŋgban’ ni nti tɔɣisiri anabitali yɛtɔɣa, ka nyari diri nimaani.

¹³Amaa miri ka a lan tɔɣisi anabitali yɛtɔɣa Bɛtɛl ŋɔ, dama di nyɛla naa sara maligu bimbini shee, ka nyɛ o nam sulinsi jɛmbu shee.”

¹⁴Di saha ka Amɔs daa garigi yɛli Amazia, “M pala anabi, m mi pala anabi bia; amaa n nyɛla biŋkɔbigula ni ŋun sari fiig tihi.

¹⁵Ka Yawɛ daa yihi ma biŋkɔbigulibo maa ni ka yɛli ma, ‘Cham’ ti tɔɣisi anabitali yɛtɔɣa ti n niriba Izraɛlnima.’

¹⁶Dinzuɣu pumpɔŋɔ, Wummiya Yawɛ yɛtɔɣa. A yɛli ma ni m miri ka n lan tɔɣisi anabitali yɛtɔɣa dalim Izraɛlnima; ka lan yɛli ma ni m miri ka n lan tɔɣisi anabitali yɛtɔɣa dalim Yisahaku zuliya.

¹⁷Dinzuɣu Yawɛ ni yɛli shɛm m-bɔŋɔ: ‘A paɣ’ ni ti leei pagɔrili be ya ŋɔ, ka bɛ ti zaŋ takɔbi ku a bidibisi min’ a bipuɣinsi, ka pirigi a tiŋgbani ŋɔ ti taba; ka amaŋmaŋ’ ni ti kpi chɛfirinim’ tiŋgban’ ni, ka bɛ ti gbahi Izraɛlnim’ kuli tiŋgbɔn shɛl’ ni.’ ”