Read Dagbani Jona 1 Bible Online

Jona 1 - Dagbani bible

Jona 1

¹ Dahin shɛli ka Yawɛ daa ti yɛli Jona ŋun nyɛ Amitai bia la,

²“Yiɣisim’ chaŋ Ninive din nyɛ tin’ tital’ la ni nti kuhi yɛli ba ni man’ Naawuni nya bɛ ninvuɣ’ biɛtali tuma la.”

³Amaa ka Jona daa yiɣisi n-zaŋ kpa Speen[1] polo ni o zo Yawɛ sani. O daa chaŋla tin’ shɛli din yuli booni Jɔpa la nti nya ŋarin’ tital’ shɛli din chani Speen, ka o yo di samli ka kpe ŋariŋ maa ni pahi ŋariŋ maa tumtumdib’ zuɣu ni o zo Yawɛ sani chaŋ Speen.

⁴Amaa ka Yawɛ daa chɛ ka sanʒiɛɣu yiɣisi teeku maa ni, ka sanʒiɛɣu maa ʒiɛbu kpiɔŋ daa galisi pam hal ka ŋarin’ titali maa ti be kaman di yɛn chɛrisimi la.

⁵Ka dabiɛm daa gbaai ŋariŋ maa tumtumdiba ka bɛ zaa yinoyino gbaai bɛ wuna kabu, ka kpuɣiri ŋarin’ titali maa ni nɛma bahiri kom ni ni di chɛ ka ŋarin’ titali maa tibisim filim. Amaa ka Jona ŋun’ daa kpɛla ŋarin’ titali maa puuni ha nti doya gbihira.

⁶Ka kpatoon’ kpɛm’ daa vihi hal ti nya o nimaani m-bɔh’ o, “Bɔzuɣu ka nyin’ doya gbihira? Yiɣisim’ suh’ a wuni ka o sɔŋ ti. Di pa shɛli ka o zo ti nambɔɣu tiligi ti nyɛviya.”

⁷Di saha ka niriba maa daa yɛl’ taba, “Kamiyana ka ti pihi kuɣa sɔŋ lihi nya ŋun zuɣu ka yɛl’ biɛɣu ŋɔ lee paai ti ŋɔ.” Ka bɛ daa niŋ lala, ka di gbaala Jona.

⁸Ka bɛ bɔh’ o, “Ŋun’ taali tumbu zuɣu n-lee chɛ ka yɛl’ biɛɣu ŋɔ ti paai ti ŋɔ? Yɛlim’ ti! Tuun’ bɔ ka a lee tumda? Tiŋkani ka a lee yina? Ka zuliya bɔ n-lee nyɛ a?”

⁹Ka Jona garigi yɛli ba, “N nyɛla Hiburu, ka jɛmdi Yawɛ ŋun nyɛ alizanda Naawuni, ka nyɛ ŋun nam tiŋgbani mini teeku ŋɔ.”

¹⁰Ka o ni daa yɛli shɛm maa zuɣu chɛ ka dabiɛm gbaai niriba maa pam ka bɛ yɛl’ o, “Ka tuun’ bɔ ka a lee tum ŋɔ?” Bɛ daa baŋya ni o yila Yawɛ sani zɔra, dama omaŋmaŋa n-daa pun yɛli ba lala.

¹¹Di saha maa ka sanʒiɛɣu maa ʒiɛbu daa kul moorila nini pahira. Ka bɛ daa bɔhi Jona, “Ka wula ka ti lee yɛn niŋ a ka teeku ŋɔ fo n-dɔni baalim?”

¹²Ka Jona garigi yɛli ba, “Zaŋmiya ma bahi teeku ŋɔ ni ka teeku maa fo n-dɔni baalim, dama m mi ni n zuɣu ka sanʒiɛɣu ŋɔ ʒiɛri ya maa.”

¹³Ka kpatoonsi maa daa shini, ka kul kpaŋdi bɛmaŋ’ ni bɛ kpiɔŋ zaa ni bɛ zaŋ ŋarin’ titali maa lab’ du duli. Amaa ka teeku maa dambu kpiɔŋ daa kul maan pahirimi, ka bɛ kɔŋ chandi.

¹⁴Dinzuɣu ka bɛ daa kuhi boli Yawɛ yɛli, “Yaa Yawɛ, ti suhir’ a, ti yi yihi doo ŋɔ nyɛvili, nyin’ di bɔhi ti biɛri ku ti. Dama nyin’ Yawɛ zuɣu ka yɛlli maa ʒiya. A ni yu shɛm m-bala.”

¹⁵Di saha ka bɛ daa yihi Jona bahi teeku maa ni, ka teeku maa daa fo n-dɔni baalim.

¹⁶Ka kpatoonsi maa daa zo Yawɛ dabiɛm pam, ka mali sara n-jɛm Yawɛ ka lo alikauli ni bɛ ni jɛmd’ o.

¹⁷ Bɛ ni daa zaŋ Jona bahi kom maa ni maa, ka Yawɛ chɛ ka ziŋ’ karili zaŋ o vali, ka o daa be ziŋ’ maa puuni wuntaŋ’ ni mini yuŋ zaa daba ata.