Read Dagbani Kalinlinima 10 Bible Online

Kalinlinima 10 - Dagbani bible

Kalinlinima 10

¹Ka Yawɛ daa yɛli Musa, “Zaŋm’ anzinfa mali kikah’ ayi.

²Chɛ ka bɛ zaŋ matarika ŋ-ŋmɛnŋme li mal’ li; ka yi mal’ li piɛbiri laɣindi niriba, ka mal’ li piɛbiri ka bɛ yiɣisira chana.

³Bɛ yi ti piɛbi kikah’ ayi maa saha shɛli, niriba maa zaa bɛn’ laɣimm’ a sanna Yawɛ chirigibu shee suɣili maa dunol’ ni.

⁴Amaa bɛ yi ti piɛbi zaɣ’ yini kɔŋko, di saha zuɣulaannim’ bɛn nyɛ Izraɛlnim’ dɔɣirikpamba la bɛn’ laɣimm’ a sanna.

⁵A yi ti chɛ ka bɛ piɛbi kika’ biɛɣu, bɛn suɣa be wulimpuhili polo la bɛn’ yiɣisim’ gbaai chandi.

⁶Ka a yi ti lan chɛ ka bɛ piɛbi kika’ biɛɣu pahi buyi, bɛn suɣa be nudirigu polo la bɛn’ yiɣisim’ gbaai chandi. Bɛ yi ti yɛn yiɣisi chaŋ saha shɛlikam, bɛn’ piɛbimi kika’ biɛɣu maa.

⁷Amaa saha shɛli niriba maa yi ti yɛn laɣimmi, yin’ piɛbimi kikaa maa, amaa ka di piɛb’ li kika’ biɛɣu piɛbbu.

⁸Maligumaana Aduna bidibisi mi n-yɛn piɛbiri kikahi maa. “Kikahi maa n-yɛn nyɛ yi kali soli bini yi ʒiɛmani kam ni.

⁹Saha shɛli yi yi ti lo tɔbu yi tiŋgbɔŋ ŋɔ ni ni yi tuhi yi dimnim’ bɛn muɣisiri ya, di saha yin’ piɛbimiya kika’ biɛɣu, ka lala chɛ ka Yawɛ ŋun nyɛ yi Naawuni ŋɔ teei yi yɛla, ka tiligi ya yi dimnim’ maa nuu ni.

¹⁰Yi suhupiɛlli dabisa dali mini yi churi puhibu ni ni yi goya piligu ni, piɛbimiya kikahi maa bahi yi sara shɛŋa yi ni zaŋdi nyɔri buɣim la mini yi biɛrisuŋ sara zuɣu; dina n-yɛn chɛ ka Yawɛ ŋun nyɛ yi Naawuni ŋɔ teei yi yɛla. Man’ Yawɛ n-nyɛ yi Naawuni.”

¹¹Yuun’ shɛli din daa pahir’ ayi puuni gol’ so ŋun pahir’ ayi biɛɣ’ pisi dali ka sagbani maa daa vuui alikauli biɛhigu shee maa zuɣusaa.

¹²Ka Izraɛlnim’ maa daa yiɣisi Sinai mɔɣu ni n-doli tab’ gbilligbilli chana; ka sagbani maa daa chaŋ ti kpalim zani Paran mɔɣu ni.

¹³Ka bɛ daa yiɣisi gbaai bɛ tuuli chandi kaman Yawɛ ni daa chɛ ka Musa zali ba shɛm.

¹⁴Juda zuliya n-daa zaŋ bɛ tuuta daŋ yiɣisi doli tab’ gbilligbilli gbaai chandi. Aminadab bia Nashɔn n-daa nyɛ bɛ zaa zuɣulana.

¹⁵Ka Zua bia Nɛtanɛl nyɛ Isaka zuliya zuɣulana;

¹⁶ka Hɛlɔn bia Ɛliab nyɛ Zɛbulɔn zuliya zuɣulana.

¹⁷Di nyaaŋa ka bɛ daa wurim Yawɛ jɛmbu shee suɣili maa nɛma sɔŋ, ka Gɛrishɔn mini Mɛrari zuliya bɛn ʒiri Yawɛ jɛmbu shee suɣili maa nɛma la daa yiɣisi gbaai chandi.

¹⁸Ka Rubin zuliya daa yiɣisi zaŋ bɛ tuuta doli tab’ gbilligbilli pa bɛ zuɣu. Shɛdiu bia Ɛlizu n-daa nyɛ bɛ zaa zuɣulana.

¹⁹Ka Zurishadai bia Shɛlumiɛl daa nyɛ Simiɔn zuliya zuɣulana;

²⁰ka Diuɛl bia Ɛliasaf nyɛ Gaad zuliya zuɣulana.

²¹Di saha ka Kɔhat daŋ niriba daa kpuɣi neen’ shɛŋa din be kasi la ʒi n-gbaai chandi. Ka bɛ daa zaŋ Yawɛ jɛmbu shee suɣili maa ti sa pɔi ka bɛ naanyi paai ni.

²²Ka Ifriim zuliya daa zaŋ bɛ tuuta yiɣisi doli tab’ gbilligbilli paya. Ammihud bia Ɛlishama n-daa nyɛ bɛ zaa zuɣulana;

²³ka Pɛdazu bia Gamaliɛl daa nyɛ Manaasa zuliya zuɣulana;

²⁴ka Gidiɔni bia Abidan daa nyɛ Bɛnjamin zuliya zuɣulana.

²⁵Di saha ka Dan zuliya bɛn daa be nyaaŋa ka nyɛ niriba maa zaa guliba la daa yiɣisi paya. Ammishadai bia Ahiɛza n-daa nyɛ bɛ zaa zuɣulana;

²⁶ka Okiran bia Pagiɛl daa nyɛ Asha zuliya zuɣulana;

²⁷ka Inan bia Ahira mi nyɛ Naftali zuliya zuɣulana.

²⁸Izraɛlnim’ daa yi yɛn yiɣisi chaŋ ka doli tab’ gbilligbilli chani shɛm m-bala.

²⁹Ka Musa daa yɛl’ o paɣ’ tizɔdoo Hɔbab ŋun daa nyɛ o deemba Riuɛl Midian nir’ bia la, “Ti yiɣisiri kunila luɣ’ shɛli Yawɛ ni daa yɛl’ ti, ‘N ni zaŋ li tin ya la ni’. Dol’ ti, ka ti ti niŋ a zaɣ’ viɛlli; dama Yawɛ pun lo Izraɛlnim’ zaɣ’ viɛlli niŋbu alikauli.”

³⁰Amaa ka o yɛl’ o, “N ku chaŋ; n ni labi n dɔɣiriba sani ni n tiŋgbɔŋ ni.”

³¹Ka o daa yɛli, “N suhir’ a, di chɛ ti, dama nyini m-mi ti ni yɛn dooni luɣ’ shɛli mɔɣu ŋɔ ni, leemi ti sowuhira.

³²Ka din pahi nyɛla a yi dol’ ti chaŋ, Yawɛ yi ti niŋ ti zaɣ’ viɛl’ shɛlikam, lala ka ti gba ni niŋ a.”

³³Di saha ka bɛ daa yiɣisi Yawɛ zoli maa gbini n-lu soli chaŋ daba ata chandi; ka bɛ daa zaŋ Yawɛ Daalikauli Adaka la n-daŋ tooni chaŋ daba ata chandi ni di ti bo dooshee ti ba.

³⁴Bɛ ni daa yiɣisi bɛ dooshee maa chana, Yawɛ sagban’ la daa kul ʒiɛla bɛ zuɣusaa dɛde wuntaŋ’ ni.

³⁵ Saha shɛlikam bɛ daa yi ti kpuɣi Alikauli Adaka maa chana, Musa yɛrimi, “Yawɛ, yiɣisim’ chɛ ka a dimnim’ wurim, ka chɛ ka ninvuɣ’ shɛb’ bɛn je a ŋmalig’ a tooni guui.”

³⁶Ka bɛ daa yi ti suui li zali, o yɛrimi, “Yawɛ labimi Izraɛlnim’ tuhituhi zuɣa ŋɔ sanna.”