Read Dagbani Kalinlinima 14 Bible Online

Kalinlinima 14 - Dagbani bible

Kalinlinima 14

¹Di saha ka niriba maa zaa daa duhi bɛ yee kuhi pam; bɛ daa kumiya pam dindali yuŋ maa.

²Ka Izraɛlnim’ zaa daa ŋumdi bɛ kparima ni niŋdi Musa mini Aduna. Niriba maa zaa daa yɛlimi, “Ti yi di daa kpi Ijipti, di di so! Bee ti yi di kpi mɔɣu ŋɔ ni, di di so!

³Bɔzuɣu ka Yawɛ zaŋ ti na ti bahi tiŋgbɔŋ ŋɔ ni ni bɛ zaŋ takɔbi ku ti? Bɛ ni gbahi ti paɣiba mini ti bihi chaŋ; ti yi di lab’ Ijipti, di di bi so?”

⁴Ka bɛ daa yɛl’ taba, “Chɛliya ka ti pii so leei ti zuɣulana n-lab’ Ijipti.”

⁵Di saha ka Musa mini Aduna daa lu n-zaŋ bɛ nina kpa tiŋ’ Izraɛlnim’ maa zaa tooni.

⁶Ka Nan bia Jɔshua mini Jɛfune bia Kalɛb bɛn daa pahi chaŋ ti puɣisi nya tiŋgbɔŋ maa la daa dari tɔhi bɛ binyɛra,

⁷ka yɛli Izraɛlnim’ maa zaa, “Ti ni chaŋ ti kpe tiŋgbɔn shɛl’ ni m-puɣisi nya li maa tiŋgbani viɛli pam.

⁸Yawɛ nini yi tiɣi ti, o ni zaŋ ti tahi tiŋgban’ shɛli din vuhiri maa ni nti zaŋ li ti ti.

⁹ Lee di taaya duŋ niŋ Yawɛ, ka di zɔriya tiŋgbɔŋ maa niriba dabiɛm, ti ni nyaŋ ba. Binshɛli din guli ba vuuya ka chɛ ba; ka Yawɛ mi be ti sani, di zɔriya dabiɛm.”

¹⁰Amaa ka niriba maa zaa daa niŋ nia ni bɛ lab’ ba kuɣa. Di saha ka Yawɛ jilima daa yi polo Yawɛ chirigibu shee suɣili la zuɣusaa, Izraɛlnim’ zaa ninni.

¹¹Ka Yawɛ daa bɔhi Musa, “Bɔ saha ka niriba ŋɔ lee yɛn chɛ ma ʒiɛmbu? Hal n ni wuhi ba shihira shɛŋa la zaa yoli, bɛ kul zaɣisiya ni bɛ ku niŋ ma yɛda.

¹²N ni chɛ ka alɔbo lu bɛ zuɣu, ka chɛ ka bɛ kɔŋ n ni ti ba binshɛli, ka chɛ ka a nam zuliya shɛli bɛn galisi ka mali kpiɔŋ gari ba.”

¹³Amaa ka Musa daa yɛli Yawɛ, “Di saha Ijiptinim’ ni wum li, dama bɛ sani ka a daa zaŋ a kpiɔŋ yihi ba na,

¹⁴ka bɛ mi ni zaŋ li yɛli tiŋgbɔŋ ŋɔ nima. Yawɛ, bɛ pun wum ni a be niriba ŋɔ sani. Yawɛ, bɛ nini nya a, ka a sagbani ʒe bɛ zuɣusaa, ka a be sagban’ ni m-be bɛ tooni wuntaŋ’ ni, ka be sagbani maa ni n-nyɛ neesim yuŋ.

¹⁵Pumpɔŋɔ, a yi ku niriba ŋɔ zaa yim, di saha zuliya shɛb’ bɛn pun wum a yuli dubu la ni yɛli,

¹⁶‘Yawɛ ni bi tooi zaŋ niriba ŋɔ kulisi o ni daa po ni o ni zaŋ tiŋgbɔn shɛli ti ba la ni zuɣu, ka o ku ba mɔɣu maa ni maa.’

¹⁷Dinzuɣu pumpɔŋɔ, chɛ ka nyin’ Yawɛ yiko shiri galisi kaman a ni daa pun lo alikauli yɛli,

¹⁸ ‘Yawɛ bi jɛri suli yomyom, ka o yurilim galisi, ka o chɛr’ alahichi mini tuumbiɛri taali, amaa o ni bahi darigi bɛn tum taali tibili, o zaŋdi banim’ ni tum alahichi shɛli tibidarigibo n-darigiri bɛ yaansi bɛn be ʒiɛmana din pahir’ ata mini din pahir’ anahi ni tibili’.

¹⁹ Chɛl’ niriba ŋɔ taali a yurilim din galisi la min’ a ni daa pun chɛ bɛ taali Ijipti zaŋ na hal ni pumpɔŋɔ la zuɣu.”

²⁰Di saha ka Yawɛ yɛli, “A ni suhi ma ŋɔ zuɣu, n chɛ bɛ taali maa.

²¹Amaa n ni be, ka chɛ ka man’ Yawɛ jilima pali dunia ŋɔ zaa la zuɣu,

²²ninvuɣ’ shɛb’ bɛn pun nya n jilima mini n ni pun tum alahiziba tumtumsa shɛŋa Ijipti mini mɔɣu ŋɔ ni, ka zahim ma paai siɣimsiɣim pia, ka zaɣisi n noli ŋɔ,

²³ bɛ so nini ku nya tiŋgbɔn shɛli n ni daa po ni n ni zaŋ ti bɛ yaannim’ la. Bɛn ʒiɛm ma la so nini ku nya li.

²⁴ Amaa n dabili Kalɛb ni mali tɛhi’ shɛl’ la min’ o ni doli ma ni o suhu zaa la zuɣu, n ni zaŋ o kulis’ o ni daa chaŋ tiŋgbɔn shɛli maa ni, ka o zuliya ti su li.

²⁵To, Amalɛknim’ mini Keenannim’ ni be vinvama ni la zuɣu, biɛɣuni, sa ŋmaligimiya kpe mɔɣu n-doli Teeku Ʒiɛɣu polo.”

²⁶Ka Yawɛ daa yɛli Musa mini Aduna,

²⁷“Bɔ saha ka ninvuɣ’ biɛri ŋɔ lee yɛn chɛ bɛ kparima ni ŋum niŋ ma? N wum ŋumaŋuma shɛli Izraɛlnim’ maa ni ŋumdi niŋdi ma maa.

²⁸Yɛlim’ ba, ‘Man’ Yawɛ yɛliya: N ni be ŋɔ zuɣu, yi ni yɛli shɛm ka n wum maa, n ni niŋ ya lala.

²⁹ Yi ni kpi n-do mɔɣu ŋɔ ni; ka yinim’ bɛn yuma nyɛ yuun’ pisi zaŋ chani zaa, ka nyɛ bɛ ni daa sab’ shɛb’ yuya, ka yi nyɛ bɛn ŋum yi kparima ni niŋ ma la

³⁰zaɣ’ yino ku paai n ni daa po ni n ni chɛ ka yi be tiŋgbɔn shɛl’ ni la naɣila Jɛfune bia Kalɛb mini Nan bia Jɔshua kɔŋko.

³¹Amaa yi bi’ shɛb’ yi ni yɛli ni bɛ ni gbahi ba chaŋ la, n ni zaŋ ba kulisi nimaani ka bɛ ti baŋ tiŋgbɔn shɛli yi ni ʒiɛm maa.

³²Amaa yinim’ ni kpi n-kpalim mɔɣu ŋɔ ni.

³³ Ka yi bihi ŋɔ mi ni leei piɛguliba mɔɣu ŋɔ ni yuun’ pihinahi. Bɛ ni di wahala yi ni bi ʒe yim la zuɣu hal ka yi ni ninvuɣ’ so ŋun bahindi nyaaŋa ti kpi n-kpalim mɔɣu ŋɔ ni.

³⁴Yi ni daa zaŋ dabisi’ shɛŋa chaŋ ti puɣisi nya tiŋgbɔŋ maa daa nyɛla biɛɣ’ pihinahi. Dinzuɣu dabisi’ yini kam yɛn leela yuun’ muni. Yi ni ʒi yi daalahichi ʒili yuun’ pihinahi, ka baŋ ni yi ni niŋ shɛm bi tiɣi n nini.’ ”

³⁵Man’ Yawɛ n-yɛli maa, yɛlimaŋli, n ni niŋ ninvuɣ’ biɛ’ shɛb’ bɛn laɣim lo nia biɛɣu zaŋ chaŋ n sani maa lala. Bɛ biɛhigu ni zan’ tariga, ka bɛ kpi mɔɣu ŋɔ ni.

³⁶Musa ni daa tim ninvuɣ’ shɛb’ ka bɛ chaŋ ti puɣisi nya tiŋgbɔŋ maa, bɛ puuni ninvuɣ’ shɛb’ bɛn daa ʒi lahiba’ biɛɣu na nti yɛli zaŋ chaŋ tiŋgbɔŋ maa polo n-chɛ ka niriba maa zaa ŋum bɛ kparima ni niŋ Yawɛ la,

³⁷Yawɛ daa chɛ ka alɔbo lu bɛn daa ʒi lahiba’ biɛɣu zaŋ chaŋ tiŋgbɔŋ maa polo maa na zuɣu ka bɛ kpi.

³⁸Amaa Nan bia Jɔshua mini Jɛfune bia Kalɛb bɛn daa pahi chaŋ ti puɣisi nya tiŋgbɔŋ maa la n-daa nyɛ bɛn naɣi bi kpi.

³⁹Ka Musa daa zaŋ yɛtɔɣa ŋɔ zaa yɛli niriba maa, ka bɛ daa kum pam.

⁴⁰Ka bɛ daa daŋ yiɣisibu asiba n-chani zoya din du pam zuɣu tinsi ni ka yɛra, “Tinima m-be kpe ŋɔ, ti ni kuli Yawɛ ni lo ti alikauli ni ti kuli tin’ shɛl’ maa ni, ti tum alahichi.”

⁴¹Amaa ka Musa daa yɛli ba, “Bɔ n-niŋ ka yi kul birigiri Yawɛ zaligu? Dama lala ku nani.

⁴²Di chaŋya; di chɛliya ka yi dimnim’ maa ti kun ya, dama Yawɛ ka yi sani.

⁴³Amalɛknim’ mini Keenannim’ ni gunya soli n-zaŋ takɔbiri kun ya; yi ni chɛ Yawɛ dolibu maa zuɣu, Yawɛ ku be yi sani.”

⁴⁴Amaa ka bɛ daa bahi chaŋ zoya din du pam zuɣu tinsi maa ni, hal Musa mini Yawɛ Alikauli Adaka la ni daa kul kpalim be bɛ sansani maa ni la zaa yoli.

⁴⁵Di saha ka Amalɛknim’ mini Keenannim’ bɛn daa be zoya zuɣu tinsi maa ni daa yina ti lu bɛ zuɣu nyaŋ ba n-kari ba hal ni Hɔrima.