Read Dagbani Kalinlinima 16 Bible Online

Kalinlinima 16 - Dagbani bible

Kalinlinima 16

¹Ka Kɔra ŋun daa nyɛ Izar bia ka nyɛ Kɔhat ŋun daa nyɛ Lɛvi zuliya nir’ yaaŋa la mini Ɛliab bihi Datan mini Abiram ni Pɛlɛt bia On

²bɛn daa yi Rubin zuliya ni na la daa ti zaŋ niriba mini Izraɛl ninvuɣ’ zuɣuri kɔbisiyi ni pihinu m-pa bɛmaŋ’ zuɣu chaŋ ti va n-zani Musa tooni. Niriba maa daa nyɛla bɛ ni pii shɛba, ka bɛ nyɛ niriba ni mi shɛb’ yɛla viɛnyɛliŋga.

³Ka bɛ daa laɣim taai duŋ niŋ Musa mini Aduna. Bɛ daa yɛli ba mi, “Yi va n-ʒi pam. Dama niriba ŋɔ zaa yinoyino nyɛla bɛn be kasi, ka Yawɛ be bɛ sani. Ka bɔzuɣu ka yi ti duhi yimaŋ’ Yawɛ niriba sani lala?”

⁴Musa ni daa wum li, o daa teemi dɔni n-zaŋ o nina kpa tiŋa,

⁵ka yɛli Kɔra min’ o nyaandoliba maa, “Biɛɣuni asiba Yawɛ sa ni wuh’ o ni pii so ni ŋun be kasi ni o ni yɛn chɛ ka so ka o sanna. O ni pii so, o ni chɛ ka dilan’ ka o sanna.

⁶Kɔra, a min’ a nyaandoliba maa zaa ni yɛn niŋ shɛm m-bɔŋɔ:

⁷Sa zaŋm’ labihi m-mooi buɣim niŋ di ni, ka niŋ tulaale zim pa di zuɣu n-zani Yawɛ tooni biɛɣuni, ka Yawɛ yi sa pii ninvuɣ’ so, ŋuna n-nyɛ ŋun be kasi. Yinim’ Lɛvi zuliya ŋɔ, yi va n-ʒi pam!”

⁸Ka Musa daa lan yɛli Kɔra, “Yinim’ Lɛvi zuliya ŋɔ, wummiya!

⁹Yi ʒiɛmla Izraɛl Naawuni ni pii ya ka woligi ya Izraɛlnim’ ni n-zaŋ ya mir’ omaŋa ni yi tumdi tuma ŋun’ Yawɛ chirigibu shee suɣili la ni, ka zaani niriba maa tooni n-tumdi tuma sɔŋdi ba la?

¹⁰Ŋuna n-zaŋ a min’ a mabihi bɛn zaa nyɛ Lɛvinim’ la mir’ omaŋa. Di zaa yoli ka yi lan bɔri maligumaanitali tuma gba?

¹¹Dinzuɣu Yawɛ ka a min’ a nyaandoliba maa zaa taai duŋ niŋ maa. Ŋuni n-lee nyɛ Aduna ka yi ŋumdi yi kparima ni niŋd’ o?”

¹²Di saha ka Musa daa tim ti boli Ɛliab bihi, Datan mini Abiram. Ka bɛ daa yɛli, “Ti ku kana.

¹³A ni zaŋ ti yi tiŋgban’ shɛli din mali bihim mini shiri pam[5] ni na ni a ti ku ti yɔɣu ŋɔ ni la nyɛla yɛlibila, ka a ti lan bɔri ni a zaŋ amaŋ’ leei naa su ti?

¹⁴Din pahi nyɛla, a bi zaŋ tiŋgban’ shɛli din mali bihim mini shiri pam ti ti bee n-zaŋ puri mini tihi puri ti ti ka di leei ti dini. Pumpɔŋɔ a bɔrimi ni a yɔhim ti. Ti ku kana!”

¹⁵Ka Musa suhu daa yiɣisi pam, ka o yɛli Yawɛ, “Di deei bɛ sara maligu. N na ʒi n-deei bɛ so buŋa, m mi na ʒi n-niŋ bɛ ni so zaɣ’ biɛ’ shɛli.”

¹⁶Ka Musa daa yɛli Kɔra, “A min’ a nyaandoliba maa zaa ni Aduna sa kam’ Yawɛ tooni na biɛɣuni.

¹⁷Yi zaa yinoyino kpuɣim’ o labila, ka di kalinli yiɣisi kɔbisiyi ni pihinu ka yi niŋ tulaale zim niŋ di ni n-zaŋ li ka Yawɛ tooni na. Ka a gba mini Aduna gbibi yi tulaale lahi.”

¹⁸Ka sokam daa kpuɣ’ o laa m-mooi buɣim niŋ di ni, ka niŋ tulaale zim pa di zuɣu. Ka bɛ mini Musa ni Aduna daa zani Yawɛ chirigibu shee suɣili maa dunol’ ni.

¹⁹Di saha ka Kɔra daa laɣim ninvuɣ’ shɛb’ bɛn daa taai duŋ maa zaa Yawɛ chirigibu shee suɣili maa dunol’ ni. Ka Yawɛ jilima neesim daa neei niriba maa zaa sani.

²⁰Di saha ka Yawɛ daa yɛli Musa mini Aduna,

²¹“Woligimiya yimaŋ’ ka chɛ niriba ŋɔ ka n ku ba pumpɔŋɔ.”

²²Ka bɛ daa silim zaŋ bɛ nina kpa tiŋa ka yɛli, “Yaa Naawuni, nyin’ ŋun su vuhirigu kam zaa nyɛvili ŋɔ, wula ka ninvuɣ’ yino tum alahichi, ka a suhu yiɣisi bahi niriba ŋɔ zaa zuɣu?”

²³Ka Yawɛ daa yɛli Musa,

²⁴“Yɛlim’ niriba maa, miligimiya Kɔra mini Datan ni Abiram biɛhigu shee.”

²⁵Di saha ka Musa daa yiɣisi ka Izraɛl kpamba daa dol’ o ka bɛ chaŋ Datan mini Abiram sani.

²⁶Ka o daa yɛli niriba maa, “Miligimiya ninvuɣ’ biɛri ŋɔ suɣa shee, ka di shihiya bɛ binshɛɣu, di yi pa lala bɛ daalahichi maa zaa ni ʒin ya chaŋ.”

²⁷Dinzuɣu ka bɛ daa miligi Kɔra mini Datan ni Abiram biɛhigu shee maa. Datan mini Abiram ni bɛ paɣiba ni bɛ bisarinsi ni bɛ bibihi daa yimina ti ʒe bɛ suɣa dunoya ni.

²⁸Ka Musa daa yɛli, “Dimbɔŋɔ n-yɛn chɛ ka yi baŋ ni Yawɛ n-shiri tim ma na ni n ti tum tuma ŋɔ zaa, ka di pala mmaŋmaŋ’ yubu ka n tumda.

²⁹Niriba ŋɔ yi kpi kaman sokam zaa ni kpiri shɛm bee yɛl’ shɛli din paari sokam zaa yi paai ba, dindina, pa Yawɛ n-shiri tim ma na.

³⁰Amaa Yawɛ yi chɛ ka so ni na ʒi n-nya yɛl’ shɛli niŋ ba, ka tiŋgbani yaai di noli vali ba tabili bɛ ni su binshɛɣukam zaa, ka bɛ kpe kpiimba biɛhigu shee zaɣ’ nɛma, dina n-ni chɛ ka yi baŋ ni bɛ ʒiɛm Yawɛ.”

³¹O ni daa yɛri maa, o noli daa na bi lu tiŋa, ka tiŋgbani bɔɣi bɛ naba ni.

³²Tiŋgbani maa daa yaai di noli n-vali bɛ mini bɛ yiŋnima ni Kɔra ni daa su ninvuɣ’ shɛb’ zaa zaŋ tabili bɛ binshɛɣukam zaa.

³³Ka bɛ mini bɛ binshɛɣukam zaa daa kpe kpiimba biɛhigu shee zaɣ’ nɛma, ka tiŋgbani mum ba niŋ, ka bɛ daa bahi yoli niriba maa ni.

³⁴Ka Izraɛlnim’ zaa bɛn daa miri ba daa wum bɛ kuhigu ka guui; dama bɛ daa yɛlimi, “Tiŋgbani ni vali ti gba!”

³⁵Di saha ka buɣim daa yi Yawɛ sanna ti di ninvuɣ’ kɔbisiyi ni pihinu bɛn daa tuɣili tulaale zim maa.

³⁶Di nyaaŋa ka Yawɛ daa yɛli Musa,

³⁷“Yɛlim’ maligumaana Aduna bia Ɛliɛza ni o yihim’ tulaale tuɣindi labihi maa buɣim niɛm maa ni n-kpaai di buɣim bahi katiŋa, dama di nyɛla din be kasi.

³⁸Dama alahichinim’ maa tulaale tuɣindi labihi maa leela din be kasi bɛ nyɛviya kɔŋbu maa zuɣu. Dinzuɣu zaŋmi li kuri gbiŋgbarinlinsi n-zaŋ li pa sara maligu bimbini zuɣu, dama bɛ daa zaŋ li mi ti Yawɛ; di nyɛla din be kasi. Di yi niŋ lala, di ni leei shihirili Izraɛlnim’ sani.”

³⁹Ka maligumaana Ɛliɛza daa zaŋ buɣim ni daa di ninvuɣ’ shɛb’ maa ni daa zaŋ daanya tulaale tuɣindi labihi shɛŋa ti Naawuni maa n-kuri gbiŋgbarinlinsi pa sara maligu bimbini zuɣu.

⁴⁰Ka di teeri Izraɛlnima ni ninvuɣ’ so ŋun pa maligumaana, ka mi pa ŋun yi Aduna zuliya ni na ku lan kana ni o ti tuɣili tulaale zim Yawɛ tooni, ka din niŋ Kɔra min’ o nyaandoliba maa ti niŋ o kaman Yawɛ ni daa ka chɛ Musa yɛl’ o shɛm maa.

⁴¹Ka biɛɣu daa neei ka Izraɛlnim’ zaa daa taai duŋ niŋ Musa mini Aduna yɛra, “Yinima n-ku Yawɛ niriba maa.”

⁴²Niriba maa ni daa laɣim lu Musa mini Aduna zuɣu saha shɛli maa, ka bɛ daa ŋmaligi lihi Yawɛ chirigibu shee suɣili maa polo nya ka sagbani pun sirigina ti pani di zuɣu, ka Yawɛ jilima neesim neei.

⁴³Ka Musa mini Aduna daa ka Yawɛ chirigibu shee suɣili maa tooni na.

⁴⁴Ka Yawɛ daa yɛli Musa,

⁴⁵“Miligim’ ka chɛ niriba ŋɔ, ka n ku ba pumpɔŋɔ!” Ka bɛ daa lu n-zaŋ bɛ nina kpa tiŋa.

⁴⁶Ka Musa daa yɛli Aduna. “Zaŋm’ a tulaale tuɣindi labila m-mooi buɣim bimbini zuɣu niŋ tulaale zim pa di zuɣu n-zaŋ li chaŋ niriba maa sani yomyom ti mali sara ti ba, dama Yawɛ suhu yiɣisi bahi bɛ zuɣu, ka alɔbo pun piligi.”

⁴⁷Ka Aduna daa zaŋ li guui ti kpe niriba maa sunsuuni kaman Musa ni daa yɛl’ o shɛm maa, ka alɔbo maa daa pun lu niriba maa zuɣu, ka o daa niŋ tulaale zim maa pa buɣim maa zuɣu m-mali sara ti niriba maa.

⁴⁸Ka o daa zani kpiimba mini ninvuɣ’ nɛma sunsuuni, ka alɔbo maa chɛ.

⁴⁹Alɔbo maa ni daa ku ninvuɣ’ shɛb’ kalinli daa yiɣisila ninvuɣ’ tuhi’ pinaanahi ni kɔbisiyopɔin ka naanyi chɛ ninvuɣ’ shɛb’ bɛn daa kpi Kɔra duŋ taabu ni la.

⁵⁰Alɔbo maa ni daa chɛ, ka Aduna labi Musa sani Yawɛ min’ o niriba chirigibu shee suɣili maa dunol’ ni.