Read Dagbani Kalinlinima 17 Bible Online

Kalinlinima 17 - Dagbani bible

Kalinlinima 17

¹Ka Yawɛ daa yɛli Musa, “Yɛlim’ Izraɛlnima

²ni daŋ kam ni kpɛm’ bom’ jaaŋgbe’ yini ka jaaŋgbɛhi maa kalinli yiɣisi pinaayi kaman bɛ dunoya ni nyɛ shɛm ti a. Ka a sabi sokam yuli pa o jaaŋgbee zuɣu.

³Ka sabi Aduna yuli pa Lɛvi jaaŋgbee zuɣu. Di simdi ni dunoli kam kpɛm’ malila jaaŋgbe’ yini.

⁴Ka a zaŋ li ti sɔŋ Yawɛ min’ o niriba chirigibu shee suɣili maa ni Alikauli Adaka la tooni, n ni kani a sanna luɣ’ shɛl’ la.

⁵Ka n ni pii ninvuɣ’ so jaaŋgbee ni puhi vari. Lala ka n yɛn niŋ ka Izraɛlnim’ chɛ bɛ kparima ni ŋumbu shɛli bɛ ni ŋumdi niŋdi ya sahakam maa.”

⁶Ka Musa daa yɛli Izraɛlnima, ka bɛ kpamba zaa daa bo jaaŋgbɛhi na ti ti o. Kpɛm’ kam jaaŋgbe’ yiniyini, ka di kalinli daa yiɣisi jaaŋgbɛhi pinaayi kaman bɛ dunoya ni daa nyɛ shɛm. Ka Aduna jaaŋgbee daa be bɛ jaaŋgbɛhi maa ni.

⁷Ka Musa daa zaŋ jaaŋgbɛhi maa sɔŋ Yawɛ tooni alikauli suɣili maa ni.

⁸Ka biɛɣu daa neei, ka Musa kpe suɣili maa ni nti nya ka Aduna jaaŋgbee din daa nyɛ Lɛvinim’ din’ la puhila vari, ka daai pum n-wali alimɔnd wal’ moma.

⁹Di saha ka Musa daa zaŋ jaaŋgbɛhi maa Yawɛ tooni yi Izraɛlnim’ zaa sani ka bɛ ti nya. Ka sokam daa yih’ o jaaŋgbee.

¹⁰ Ka Yawɛ daa yɛli Musa, “Zaŋm’ Aduna jaaŋgbee maa labisi ti sɔŋ Alikauli Adaka maa tooni, ka di nyɛ shihirili duŋ taariba maa sani, ka a chɛ ka bɛ chɛ bɛ kparima ni ŋumdi niŋdi ma, di yi pa lala, bɛ ni kpi.”

¹¹Ka Musa daa niŋ kaman Yawɛ ni zal’ o ni o niŋ shɛm maa.

¹²Di saha ka Izraɛlnim’ daa yɛli Musa, “Ti kpe yɔɣu, ti zaa ni kpi.

¹³Ŋunkam miri Yawɛ o biɛhigu shee ŋɔ yi ni kpi, dindina ti zaa kul kpimi maa.”