Read Dagbani Kalinlinima 19 Bible Online

Kalinlinima 19 - Dagbani bible

Kalinlinima 19

¹Ka Yawɛ daa yɛli Musa mini Aduna:

²Yawɛ ni zali zaligu shɛŋa m-bɔŋɔ. Yɛlim’ Izraɛlnima ni bɛ bom’ naɣisa’ ʒee ŋun ka dalinli ni galimi, ka nyɛ bɛ ni na bi zaŋ naɣikɔra dapua n-niŋ so na.

³Ka a zaŋ o ti maligumaana Ɛliɛza, ka o chɛ ka bɛ zaŋ o yi tintariga ti kɔrig’ o o ninni.

⁴Ka ŋun’ maligumaana Ɛliɛza zaŋ o nubil’ tim o ʒim ni n-zaŋ li mihi Yawɛ chirigibu shee suɣili la tooni polo siɣimsiɣim buyopɔin.

⁵Di nyaaŋa ka o chɛ ka bɛ niŋ buɣim nyo naɣ’ muni maa zaa o ninni, dina n-nyɛ o gbaŋ min’ o nimdi ni o ʒim ni o puuni binshɛɣukam zaa.

⁶Di saha ka maligumaana maa zaŋ sida dari mini taaŋkɔro wulli ni mi’ ʒee bahi buɣim din diri nahu maa ni.

⁷Dimbɔŋɔ nyaaŋa ka maligumaana maa paɣ’ o binyɛra ka su kom, ka naanyi kpe bɛ biɛhigu shee; amaa ka maligumaana maa ni leei ŋun bi be nyam hal ni zaawuni.

⁸Ka ninvuɣ’ so ŋun nyo naɣisaa maa buɣim maa, o paɣim’ o binyɛra ka su kom; o gba ni leei ŋun bi be nyam hal ni zaawuni.

⁹ Di nyaaŋa ka ninvuɣ’ so ŋun be nyam va naɣisaa maa tampiligim n-zaŋ li ti zali tiŋ’ tariga luɣ’ shɛli din be nyam, ka di nyɛ Izraɛlnim’ dini; ka bɛ mal’ li niŋdi kom din yihiri nir’ daɣiri ni la ni. Di nyɛla daɣiri yihibu sara.

¹⁰Ka ninvuɣ’ so ŋun va naɣisaa maa tampiligim maa, o paɣim o binyɛra ka leei ŋun bi be nyam hal ni zaawuni. Ka dimbɔŋɔ kul ni nyɛ Izraɛlnim’ mini tinzunnim’ bɛn be bɛ sani zaligu sahakam.

¹¹Ninvuɣ’ shɛb’ bɛn shihi ninsal’ ŋun kpi, bɛ ni leei bɛn bi be nyam daba ayopɔin.

¹²Di simdi ni bɛ niŋ daɣiri yihibu kom niŋ bɛmaŋa daba ata dali mini dabisi’ shɛli din pahir’ ayopɔin dali, ka leei bɛn be nyam. Amaa bɛ yi bi niŋ lala daba ata mini dabisi’ shɛli din pahir’ ayopɔin maa dali, bɛ ku leei bɛn be nyam.

¹³Ninvuɣ’ shɛb’ bɛn zaa shihi ninsal’ ŋun kpi ka bi yihi bɛmaŋ’ daɣiri ni, bɛ ta Yawɛ chirigibu shee suɣili daɣiri, di simdi ni yi yihi ba Izraɛlnim’ ni. Bɛ ni bi niŋ ko’ shɛli din yihiri nir’ daɣiri ni mihi ba la zuɣu; bɛ na kul nyɛla bɛn bi be nyam, ka bɛ na kul ni be lala biɛhigu maa ni.

¹⁴So yi kpi Yawɛ chirigibu shee suɣili la puuni, di mi zaligu m-bɔŋɔ: Ŋunkam be suɣili maa ni mini ŋunkam kpe di ni na ni leei ŋun bi be nyam hal ni daba ayopɔin.

¹⁵Ka duɣuri mini lahi din zaa ʒe zaɣiyari ka binshɛli bi pil’ li, di gba ni leei din bi be nyam.

¹⁶Ka ninvuɣ’ so ŋun be samban’ ni yi shihi bɛ ni zaŋ takɔbi ku so bee n-shihi ninvuɣ’ so ŋun kpi o dahalali kum bee n-shihi ninsal’ kɔbili bee gballi, dilana ni leei ŋun bi be nyam daba ayopɔin.

¹⁷Ninvuɣ’ shɛb’ bɛn bi be nyam maa, bɛ zaŋm’ daɣiri ni yibu sara shɛli bɛ ni zaŋ nyo buɣim tampiligim niŋ tahili ni, ka booi kɔzɔrim kom niŋ di ni;

¹⁸ka ninvuɣ’ so ŋun be nyam zaŋ taaŋkɔro vari tim kom maa ni n-zaŋ li mihi Yawɛ chirigibu shee suɣili maa mini di nɛma zaa ni niriba bɛn be di ni ni ninvuɣ’ so ŋun shihi ninsal’ kɔbili bee bɛ ni ku so bee kpima bee gballi.

¹⁹Ŋunkam be nyam niŋm’ li mihi ninvuɣ’ shɛb’ bɛn bi be nyam daba ata dali ni daba ayopɔin dali. O niŋm’ lala yihi ba daɣiri ni daba ayopɔin dali, di nyaaŋa ka bɛ paɣi bɛ binyɛra ka su kom, zaŋ chaŋ zaawuni ka bɛ leei bɛn be nyam.

²⁰Amaa ninvuɣ’ shɛb’ bɛn bi be nyam yi bi mali bɛmaŋ’ niŋ nyam ta Yawɛ sara maligu shee daɣiri, bɛ ni bi niŋ ko’ shɛli din yihiri nir’ daɣiri ni mihi ba la zuɣu, bɛ nyɛla bɛn bi be nyam, ka di simdi ni bɛ yihi ba Naawuni niriba ni.

²¹Dina n-yɛn nyɛ bɛ zaligu sahakam. Ka ninvuɣ’ so ŋun niŋ ko’ shɛli din yihiri nir’ daɣiri ni maa mihi so, ŋun’ paɣim’ o binyɛra; ka ŋun mi shihi kom maa ni leei ŋun bi be nyam hal ni zaawuni.

²²Ka ŋun bi be nyam maa yi shihi binshɛlikam, di ni leei din bi be nyam, ka ŋunkam mi shihi li ni leei ŋun bi be nyam hal ni zaawuni.