Read Dagbani Kalinlinima 20 Bible Online

Kalinlinima 20 - Dagbani bible

Kalinlinima 20

¹Ka Izraɛlnim’ zaa daa kana ti paai Zin yɔɣu ni gol’ so ŋun daŋ tooni puuni n-ʒini Kadɛshi. Ka Miriam daa kpi nimaani, ka bɛ sɔɣ’ o nimaani.

²Kom daa ka nimaani ka niriba maa ni nyu, ka bɛ daa laɣim taai duŋ niŋ Musa mini Aduna.

³Ka niriba maa daa taai bahi Musa zuɣu, ka yɛl’ o, “Ti yi di daa pahi ti mabihi la zuɣu kpi Yawɛ tooni, di naan so.

⁴Bɔzuɣu ka a zaŋ tinim’ Yawɛ niriba ŋɔ ka yɔɣu ŋɔ ni na ni ti mini ti biŋkɔbiri ti kpi kpe?

⁵Ka bɔzuɣu ka a daa yihi ti Ijipti n-zaŋ ti na ti niŋ luɣ’ shɛli din bi viɛli ŋɔ? Luɣ’ shɛŋa nir’ ni yɛn biri chi bee n-sa fiig tihi bee n-sa wain tihi bee n-sa pumpɔrinchihi tihi kani, ka kom gba kani ka ti ni nyu.”

⁶Di saha ka Musa mini Aduna daa yi niriba maa sani n-chaŋ Yawɛ chirigibu shee suɣili maa dunol’ ni ti gbani n-zaŋ bɛ nina kpa tiŋa. Ka Yawɛ jilima neesim daa neei bɛ sani.

⁷Ka Yawɛ daa yɛli Musa,

⁸“Kpuɣim’ jaaŋgbee, ka a min’ a biɛli Aduna laɣim niriba maa na, ka a ti yɛli tampiŋ ŋɔ ni di chɛ ka kom yi di ni na bɛ zaa ninni. Lala ka a yɛn niŋ yihi kom tampiŋ maa ni na ti ba; ka bɛ mini bɛ biŋkɔbiri nyu.”

⁹Ka Musa daa shiri kpuɣi jaaŋgbee maa Yawɛ tooni kaman o ni daa zal’ o shɛm maa.

¹⁰Ka Musa mini Aduna daa laɣim niriba maa tampiŋ maa gbini ka Musa ti yɛli ba, “Yinim’ duŋtaariba ŋɔ, wummiya pumpɔŋɔ, ti chɛ ka kom yi kuɣili ŋɔ ni na n-tin ya?”

¹¹Di saha ka Musa daa kpuɣ’ o jaaŋgbee maa zuɣusaa ŋ-ŋme tampiŋ maa buyi, ka kom pam daa yi di ni na, ka niriba maa mini bɛ biŋkɔbiri maa daa nyu.

¹²Amaa ka Yawɛ daa yɛli Musa mini Aduna, “Yi bi niŋ ma yɛda, ka bi wuhi n ni be kasi shɛm Izraɛlnim’ sani, dinzuɣu yi ku zaŋ ba kuli tiŋgbɔn shɛli n ni zaŋ ti ba maa ni.”

¹³ Dimbɔŋɔ nyɛla Mɛriba[6] kom, luɣ’ shɛli Izraɛlnim’ mini Yawɛ ni daa yɛl’ tab’ finafina ni luɣ’ shɛli o ni daa wuhi ni o nyɛla ŋun be kasi.

¹⁴Musa daa ti tim tuumba Ɛdom naa sani, ka bɛ yi Kadɛshi chaŋ ti yɛl’ o, “A mabihi Izraɛlnim’ ni yɛli shɛm m-bɔŋɔ: A mi wahala shɛli ti ni pun nya zaa yɛla.

¹⁵A mi ti yaannim’ ni daa kuli Ijipti, ka ti be nimaani yuui pam, ka Ijiptinim’ maa daa nahim ti mini ti yaannim’ maa pam shɛm la yɛla.

¹⁶Ka ti daa kuhi niŋ Yawɛ, ka o wum ti kuhigu maa ka daa tim o malaika na ka o ti yihi ti Ijipti maa na, ka ti kana ti be Kadɛshi tin’ shɛli din miri a tintariga la.

¹⁷Chɛ ka ti kpe a tiŋgbɔŋ ŋɔ ni gari. Ti ku tim yi puri ni bee yi wain tihi ni gari bee n-nyu yi kɔbilisi kom. Ti yɛn dolila solɔɣu gari. Ti ku ŋmaligi kpa nudirigu polo bee nuzaa polo hal ti yi a tiŋgbɔŋ maa ni.”

¹⁸Amaa ka Ɛdomnim’ daa yɛl’ o, “Yi ku kpe ti tiŋgbɔŋ maa ni gari, yi yi niŋ lala, ti ni ŋmɛn ya tɔbu.”

¹⁹Ka Izraɛlnim’ daa yɛl’ o, “Ti ni doli solɔɣu maa gari; ka ti mini ti biŋkɔbiri yi nyu yi kom, ti ni yo di zuɣu; ti ni kul bɔri shɛli nyɛla yi chɛ ka ti kana ti gari.”

²⁰Amaa ka o daa lan yɛli, “Yi ku gari.” Ka Ɛdom naa maa daa zaŋ tɔbbihi pam bɛn gbib’ bidibbina pam kana ti gu ba soli.

²¹Ɛdom naa ni daa zaɣisi ni Izraɛlnim’ di tim bɛ tiŋgbɔŋ maa ni gari maa, ka Izraɛlnim’ maa daa taɣi doli shɛli polo gari.

²²Ka Izraɛlnim’ zaa daa yi Kadɛshi m-mali ti paai Hɔr Zoli gbini.

²³Di saha ka Yawɛ daa yɛli Musa mini Aduna Hɔr Zoli din daa be Ɛdom tintariga maa gbini,

²⁴“Aduna ku paai n ni zaŋ tiŋgbɔn shɛli ti Izraɛlnim’ maa ni, o ni kpi, yi ni daa zaɣisi n zaligu Mɛriba kom la yɛla ni la zuɣu.

²⁵Zaŋm’ Aduna min’ o bia Ɛliɛza du Hɔr Zoli zuɣu na;

²⁶ka a ti yeei Aduna kpariti n-zaŋ li yɛl’ o bia Ɛliɛza; ka Aduna kpi nimaani n-chaŋ o yaannim’ sani.”

²⁷Ka Musa daa niŋ kaman Yawɛ ni zal’ o shɛm maa. Ka bɛ daa chaŋ ti du Hɔr Zoli maa niriba maa zaa ninni.

²⁸ Ka Musa daa yeei Aduna kpariti maa n-zaŋ li yɛli o bia Ɛliɛza; ka Aduna daa shiri kpi zoli maa zuɣu. Ka Musa mini Ɛliɛza daa yi zoli maa zuɣu siɣina.

²⁹Izraɛlnim’ zaa ni daa baŋ ni Aduna kpiya, ka bɛ zaa daa zaŋ biɛɣ’ pihita n-kum o kuli.