Read Dagbani Kalinlinima 22 Bible Online

Kalinlinima 22 - Dagbani bible

Kalinlinima 22

¹Di saha ka Izraɛlnim’ daa yiɣisi chaŋ ti dɔni Mɔab bɔpiɛligu ni Jɔɔdɛn Mɔɣili duli zaŋ lab’ Jɛriko polo.

²Ka Zipɔr bia Balak daa nya Izraɛlnim’ ni niŋ Amɔrinim’ shɛlikam zaa.

³Ka Mɔabnim’ daa zɔri Izraɛlnim’ pam, dama Izraɛlnim’ maa daa galisiya pam. Dabiɛm daa kpe Mɔabnim’ pam Izraɛlnim’ maa zuɣu.

⁴Ka Mɔabnim’ daa yɛli Midian kpamba, “Salo ni gbaliŋ ŋɔ ni naai binshɛlikam din gili ti zaa kaman naɣilaa ni ŋubiri mɔri mɔɣu ni shɛm la.” Zipɔr bia Balak n-daa nyɛ Mɔab naa di saha maa.

⁵ Ka o daa tim tuumba Bɛɔr bia Balaam sani Pɛtɔr din daa be Yufretiiz Mɔɣili duli Amawu tiŋgbɔŋ ni la nti bol’ o, ka yɛl’ o, “Ninvuɣ’ shɛba n-yi Ijipti na, bɛ kul yɛrigila luɣ’ shɛlikam zaa, ka ʒini miri ma.

⁶Kamina ti yɛli yɛtɔɣ’ biɛɣu bahi bɛ zuɣu ti ma. Bɛ ni mali kpiɔŋ gari ma ŋɔ, di pa shɛli ka n tooi tuhi nyaŋ ba n kari ba n tiŋgbɔŋ ŋɔ ni, dama m mi ni a yi niŋ alibarika niŋ so ni, o shiri ni nya alibarika; ka a mi yi yɛli yɛtɔɣ’ biɛɣu bahi so zuɣu, di ni di o.”

⁷Ka Mɔab kpamba mini Midian kpamba maa daa zaŋ baɣibuɣiri liɣiri chaŋ Balaam sani ti yɛl’ o Balak ni yɛli shɛm.

⁸Ka o yɛli ba, “Gbɛmiya kpe, ka n sa zaŋ Yawɛ ni yɛli ma shɛm yɛli ya.” Ka Mɔab kpamba maa daa gbe Balaam sani.

⁹Ka Naawuni daa ka Balaam sanna ti bɔh’ o, “Banima n-lee be a sani ŋɔ?”

¹⁰Ka Balaam daa yɛli Naawuni, “Zipɔr bia Balak ŋun nyɛ Mɔab naa la n-tim ba na ti yɛli ma,

¹¹‘Ninvuɣ’ shɛba n-yi Ijipti na, bɛ kul yɛrigila luɣ’ shɛlikam; kamina ti yɛli yɛtɔɣ’ biɛɣu bahi bɛ zuɣu ti ma; di pa shɛli ka n tooi tuhi nyaŋ ba ka kari ba.’ ”

¹²Ka Naawuni daa yɛli Balaam, “Di doli ba chaŋ, a mi miri ka a yɛli yɛtɔɣ’ biɛɣu bahi niriba maa zuɣu, dama bɛ nyɛla alibarika ni be shɛb’ ni.”

¹³Ka Balaam daa yiɣisi asiba n-yɛli Balak kpamba maa, “Labimiya kuli yi ya, dama Yawɛ zaɣisiya ni n di doli ya chaŋ.”

¹⁴Ka Mɔab kpamba maa daa yiɣisi labi Balak sani ti yɛl’ o, “Balaam zaɣisiya ni o ku dol’ ti kana.”

¹⁵Ka Balak daa lan tim kpamba bɛn mali jilima pam, ka zooi gar’ o ni daa tuui tim shɛb’ maa.

¹⁶Ka bɛ daa ka Balaam sanna ti yɛl’ o, “Zipɔr bia Balak ni yɛli shɛm m-bɔŋɔ: ‘Di chɛ ka binshɛli gu a soli ka a bi ka n sanna,

¹⁷dama n ni ti a jilima pam. Ka a yi yɛli ni n niŋm’ shɛlikam zaa, n ni niŋ li; kul kamina ti yɛli yɛtɔɣ’ biɛɣu bahi niriba maa zuɣu ti ma.’ ”

¹⁸Amaa ka Balaam daa garigi yɛli Balak kpamba maa, “Hal Balak yi zaŋ o yiŋ’ anzinfa mini salima zaa ti ma gba, n ku tooi niŋ Yawɛ ŋun nyɛ n Naawuni ŋɔ ni zali ma ni n di niŋ shɛli; n ku tooi niŋ ka di pooi bee n-niŋ ka di yaɣi.

¹⁹Yi gba kpalimmiya gbe kpe kaman yi tab’ la ni daa niŋ shɛm la, ka n nya Yawɛ ni yɛn yɛli ma di yɛla shɛm pahi.”

²⁰Ka Naawuni daa ka Balaam sanna dindali maa yuŋ ti yɛl’ o, “Niriba maa yi kamina ni bɛ ti bol’ a, nyin’ yiɣisim’ doli ba chaŋ; amaa kul niŋmila n ni yɛl’ a ni a niŋ shɛm.”

²¹Ka Balaam daa yiɣisi asiba m-pa o buŋ’ nyaampara doli Mɔab kpamba maa chaŋ.

²²Ka Naawuni suhu daa yiɣisi pam Balaam ni daa chani maa zuɣu. Ka Yawɛ malaika daa chaŋ ti zani sol’ ni n-gu o soli. Balaam daa barila buŋa, ka o tumtumdiba ayi be o sani.

²³Ka buŋ’ maa daa nya Yawɛ malaika maa ka o ŋooi takɔbi gbib’ o nuu ni ʒe sol’ ni; ka buŋ’ maa daa birigi kpe mɔɣu, ka Balaam fiɛb’ o ni o ŋmalig’ o lu soli.

²⁴Di saha ka Yawɛ malaika maa daa chaŋ ti zani wain tihi puri sunsuuni luɣ’ shɛli din bi yɛlim’ shee ka goma be di yaɣa ayi zaa.

²⁵Buŋ’ maa ni daa nya Yawɛ malaika maa, ka o chaŋ ti tabili gooni n-zaŋ Balaam napɔnvaɣu sooi gooni maa; ka o daa lan fiɛbi buŋ’ maa.

²⁶Di nyaaŋa ka Yawɛ malaika maa daa lan tirisi tooni ha ti zani luɣ’ muɣiliŋga shee ka palo lan kani ka nir’ ni tooi birigi nudirigu polo bee nuzaa polo.

²⁷Buŋ’ maa ni daa nya Yawɛ malaika maa, ka o teei dɔni Balaam jɔɣu ni, ka Balaam suhu daa yiɣisi pam, ka o zaŋ o jaaŋgbe’ bil’ fiɛbi buŋ’ maa.

²⁸Di saha ka Yawɛ daa ti buŋ’ maa noli ka o bɔhi Balaam, “Bɔ ka n lee niŋ a ka a fiɛb’ ma buta ŋɔ zaa?”

²⁹Ka Balaam daa yɛli buŋ’ maa, “A ni dihi ma vi zuɣu. N yi di gbibi takɔbi n nuu ni, n naan ku a pumpɔŋɔ.”

³⁰Ka buŋ’ maa daa lan bɔhi Balaam, “Pa a bun’ so a ni bari sahakam zaŋ na hal ni zuŋɔ dabisili ŋɔ n-nyɛ ma? Ka n na mi n-niŋ a lala?” Ka o garigi yɛli, “Aai”

³¹Di saha ka Yawɛ daa neei Balaam nina ka o nya Yawɛ malaika maa ni ʒe soli ni ŋ-ŋooi takɔbi gbib’ o nuu ni shɛm maa, ka o silim’ o zuɣu n-zaŋ o nina kpa tiŋa.

³²Ka Yawɛ malaika maa daa bɔhi Balaam, “Bɔzuɣu ka a fiɛbi buŋ’ maa buta ŋɔ zaa? N kamina ni n ti gu a soli, dama m bi yu a ni chani chandi shɛli maa.

³³Ka buŋ’ maa nya ma, ka birigi siɣimsiɣim buta ŋɔ zaa. O yi di bi birigi, yɛlimaŋli, ŋ-ŋɔ n di pun ku a, ka chɛ o.”

³⁴Di saha ka Balaam daa yɛli Yawɛ malaika maa, “N tum alahichi, dama m bi mi ni a ʒiɛla sol’ ni gu ma soli. Dinzuɣu pumpɔŋɔ, di yi bi luhi a sani, n ni ŋmaligi labi kuli.”

³⁵Ka Yawɛ malaika maa daa yɛli Balaam, “Doli ba chaŋ, amaa kul yɛlimila n ni yɛl’ a ni a yɛli yɛtɔɣ’ shɛli.” Ka Balaam daa doli Balak kpamba maa chaŋ.

³⁶Balak ni daa wum ni Balaam kanna, o daa yimi chaŋ ti tuh’ o soli Ar fɔntiŋ’ shɛli din ʒi m-baɣi Arinɔn Mɔɣili Mɔab tintariga polo la.

³⁷Ka Balak daa bɔhi Balaam, “Bɔ n-niŋ ka n daa tim na ti bol’ a ka a bi kana? A bi tɛhi ni n ni tooi ti a pin’ titali?”

³⁸Ka Balaam daa yɛli Balak, “To, n kana! Ka m malila yiko din ni tooi yɛli shɛli? Naawuni ni zaŋ yɛtɔɣ’ shɛli niŋ n nol’ ni, dina ka n yɛn tɔɣisi.”

³⁹Di saha ka Balaam mini Balak daa doli chaŋ ti paai tin’ shɛli bɛ ni daa booni Huzɔt la.

⁴⁰Ka Balak daa kɔri naɣilahi mini piɛri duɣi tahi ti ti Balaam mini kpamba bɛn daa be o sani.

⁴¹Ka biɛɣu daa neei, ka Balak zaŋ Balaam du Bamɔtibaal din nyɛ luɣ’ shɛli din miri ka o ni tooi lihi nya Izraɛlnim’ maa viɛnyɛliŋga la.