Read Dagbani Kalinlinima 23 Bible Online

Kalinlinima 23 - Dagbani bible

Kalinlinima 23

¹Ka Balaam daa yɛli Balak, “Mɛm’ sara maligu bimbina ayopɔin zali ma kpe, ka bo naɣilah’ ayopɔin mini piɛlah’ ayopɔin ti ma kpe na.”

²Ka Balak daa niŋ Balaam ni yɛl’ o ni o niŋm’ shɛm maa. Ka ŋun’ Balak mini Balaam daa kɔrigi naɣila’ yino mini piɛla’ yino m-mali sara pa bimbin’ yini kam zuɣu.

³Di saha ka Balaam daa yɛli Balak, “Zanim’ a sara maligu shɛli bɛ ni zaŋdi nyɔri buɣim ŋɔ gbini, ka n yi kpaŋ ha; di pa shɛli ka Yawɛ ka n sanna. Ka o yi wuhi ma shɛlikam, n ni zaŋ li yɛl’ a.” Ka o daa chaŋ ti du n-tam kuŋkun’ nɛli zuɣu.

⁴Ka Naawuni daa ka Balaam sanna, ka Balaam daa yɛl’ o, “M me sara maligu bimbina ayopɔin zali, ka zaŋ naɣila’ yinoyino mini piɛla’ yinoyino m-mali sara pa di zaa zuɣu.”

⁵Ka Yawɛ daa yɛli Balaam, “Labimi ti zaŋ n ni yɛl’ a shɛm yɛli Balak.”

⁶Ka o daa lab’ o sanna nti nya ka o mini Mɔab kpamba zaa ʒila o sara maligu shɛli bɛ ni zaŋdi nyɔri buɣim maa gbini.

⁷Ka Balaam daa zaŋ o daanabitali yɛtɔɣa ni nyɛ shɛli yɛli, “Balak ŋun nyɛ Mɔab Naa la n-zaŋ ma Siria wulimpuhili polo zoya ni tiŋ’ la ni na nti yɛli ma: ‘Kamina ti yɛli yɛtɔɣ’ biɛɣu bahi Yaakubu zuliya ŋɔ zuɣu ti ma. Wuhim’ ni Izraɛlnim’ simdi tibidarigibo!’

⁸Ka wula ka n lee ni tooi yɛli yɛtɔɣ’ biɛɣu bahi Naawuni ni bi yɛli yɛtɔɣ’ biɛɣu bahi ninvuɣ’ shɛb’ zuɣu? Bee wula ka n lee ni tooi yɛli ni Naawuni ni wuhi ni ninvuɣ’ shɛb’ bi simdi tibidarigibo simdi ni bɛ nya tibidarigibo?

⁹Dama n nyari ba zoya zuɣu, ka nyari ba daboya zuɣu. Bɛ nyɛla ninvuɣ’ shɛb’ bɛn be bɛ ko; ka bi tɛhi ni bɛ mini zuliya shɛli nyɛla yim. Bɛ wuhiya ni bɛ be bɛ ko ka chɛ zuliya kam.

¹⁰Ŋuni n-lee ni tooi kali Yaakubu zuliya? Bee ŋuni n-lee ni tooi kali Izraɛl zuliya maa pirigibu bunahi puuni yim? Chɛ ka n kpila wuntizɔra kum, ka chɛ ka m bahigu ti be kaman o bahigu!”

¹¹Di saha ka Balak daa bɔhi Balaam, “Tuun’ bɔ ka a lee tum ma ŋɔ? N zaŋ a mi na ni a ti yɛli yɛtɔɣ’ biɛɣu bahi n dimnim’ zuɣu, nyama, ka a ti bi niŋ ba shɛli, ka naɣ’ niŋla alibarika niŋ bɛ ni?”

¹²Ka Balaam garigi yɛl’ o, “N di yɛli Yawɛ ni zaŋ yɛtɔɣ’ shɛli niŋ n nol’ ni.?”

¹³Ka Balak yɛl’ o, “Kamina ka ti chaŋ luɣ’ shɛli polo a ni yɛn nya ba; a ku tooi nya bɛ zaa, a kul ni nyala bɛ ni shɛb’ kɔŋko; ka a yɛli yɛtɔɣ’ biɛɣu bahi bɛ zuɣu ti ma.”

¹⁴Ka o daa zaŋ o chaŋ Zɔfim mɔɣu ni Pisiga Zoli zuɣu nti me sara maligu bimbina ayopɔin zali, ka kɔrigi naɣila’ yinoyino mini piɛla’ yinoyino m-mali sara pa di zaɣ’ yini kam zuɣu.

¹⁵Ka Balaam daa yɛli Balak, “Ʒe a sara maligu shɛli bɛ ni zaŋdi nyɔri buɣim ŋɔ gbini; ka n chaŋ Yawɛ sani kpe ha.”

¹⁶Ka Yawɛ daa ka Balaam sanna ti yɛl’ o, “Labimi Balak sani nti zaŋ n ni yɛli shɛm yɛl’ o.”

¹⁷Ka o daa lab’ o sani ti nya ka o mini Mɔab kpamba ʒiɛla o sara maligu shɛli bɛ ni zaŋdi nyɔri buɣim maa gbini. Ka Balak daa bɔh’ o, “Wula ka Yawɛ lee yɛli?”

¹⁸Di saha ka Balaam daa zaŋ o daanabitali yɛtɔɣa yɛli: “Zipɔr bia Balak, yiɣisima. Luɣim’ a tiba wum n ni yɛn yɛli shɛm.

¹⁹Naawuni pala ninsala ŋun ni ŋma ʒiri. O mi pala daadam ŋun taɣir’ o tɛha. O yi lo alikauli, o paani li mi. O mi yi yɛli shɛli, o niŋdi li mi.

²⁰Nyama, bɛ zali ma la zaligu ni n niŋ alibarika niŋ bɛ ni. O pun niŋ alibarika niŋ bɛ ni, ka n ku tooi vuui li.

²¹O bi nya ka zuɣubiɛɣu be Yaakubu zuliya ni; bee n-nya ka muɣisigu shɛli be Izraɛlnim’ sani. Yawɛ ŋun nyɛ bɛ Naawuni maa be bɛ sani. Ka bɛ yɛri ni ŋuna n-nyɛ bɛ naa m-be bɛ sani.

²²Naawuni ŋun daa yihi ba Ijipti na maa ŋmanila yɔnaɣ’ yilli bɛ sani.

²³Dama sɔtim ku tooi gbaai Yaakubu zuliya, ka so mi ku tooi wa Izraɛlnim’ bukpahigu. Niriba ni ti tɔɣisi Yaakubu mini Izraɛlnim’ yɛla ka yɛli, ‘Nyamiya Naawuni ni tum shɛm!’

²⁴Nyama, niriba maa yiɣisirimi kaman gbuɣin’ nyaŋ la, ka bɛ ni nyamdi kaman gbuɣindaa la. O bi doona ka pa ni o ŋubila o ni gbaai binshɛɣu, ka nyu o ni ku binshɛɣu maa ʒim.”

²⁵Di saha ka Balak daa yɛli Balaam, “A yi ku yɛli yɛtɔɣ’ biɛɣu bahi bɛ zuɣu hal baabiɛla, nyin’ di niŋ alibarika gba niŋ bɛ ni hal baabiɛla.”

²⁶Amaa ka Balaam daa yɛli Balak, “M pun bi yɛl’ a ni Yawɛ ni yɛli ma shɛm ka n yɛn niŋ?”

²⁷Ka Balak daa yɛli Balaam, “Kamina pumpɔŋɔ, ka n zaŋ a chaŋ luɣ’ shɛli polo, di pa shɛli ka Naawuni ti chɛ ka a yɛli yɛtɔɣ’ biɛɣu bahi bɛ zuɣu nimaani ti ma.”

²⁸Ka Balak daa zaŋ Balaam ti du n-tam Pɛɔr Zoli zuɣu luɣ’ shɛli nir’ ni ni tooi zani ka lihi nya bɔpiɛligu maa ni viɛnyɛliŋga.

²⁹Ka Balaam daa yɛli Balak, “Mɛm’ sara maligu bimbina ayopɔin zali ma kpe, ka bo naɣilah’ ayopɔin mini piɛlah’ ayopɔin ti ma.”

³⁰Ka Balak daa niŋ Balaam ni yɛl’ o shɛm maa n-zaŋ naɣila’ yinoyino mini piɛla’ yinoyino mali sara pa bimbini kam zuɣu.