Read Dagbani Kalinlinima 24 Bible Online

Kalinlinima 24 - Dagbani bible

Kalinlinima 24

¹Balaam ni daa nya ka Yawɛ lo ni o niŋla alibarika niŋ Izraɛlnim’ ni maa zuɣu, o daa bi lan lihi o ni daa yi lihiri binshɛŋa ni baŋdi din yɛn niŋ kaman o ni daa yi pun niŋdi shɛm la, amaa ka zaŋ o zuɣu ʒila mɔɣu polo.

²Ka Balaam daa kpuɣ’ o zuɣu lihi nya Izraɛlnim’ daŋ kam niriba ni ti bɛ suɣa doya gbilligbilli. Di saha ka Naawuni Shia daa siɣ’ o zuɣu na,

³ka o tɔɣis’ o daanabitali yɛtɔɣa yɛli, “Bɛɔr bia Balaam anabitali yɛtɔɣa m-bɔŋɔ, Ninvuɣ’ so ŋun nyari viɛnyɛliŋga anabitali yɛtɔɣa m-bɔŋɔ.

⁴Ninvuɣ’ so ŋun wumdi Naawuni yɛligu, o daanabitali yɛtɔɣa m-bɔŋɔ. Ŋun nyari Kpiɔŋlan’ Naa ʒii, o luya, amaa ka o nina bi pɔbi.

⁵Yaakubu zuliya, yi suɣa viɛli pam. Izraɛlnima, yi doo viɛli pam!

⁶Yi ŋmanila abie tihi din vuɣisi waɣa. Yi ŋmanila pu’ shɛŋa din do m-baɣ’ mɔɣili. Yi ŋmanila aloosi ti’ shɛŋa Yawɛ ni sa. Yi ŋmanila sida ti’ shɛŋa din ʒe m-baɣi kom.

⁷Kom ni ti zɔri yir’ o ŋmana ni na, ka o bimbira tiɣi kom pam. O naa ni ti gari Agag. O nam ni ti du pam.

⁸Naawuni ŋun yihi ya Ijipti na ŋmanila yɔnaɣ’ yila yi sani. Yi nyandi zuliya shɛb’ bɛn nyɛ yi dimnima. Yi kabiri bɛ kɔba. O ni to ba o piɛma.

⁹ O kurimmi, ka dɔni kaman gbuɣindaa la. O ŋmanila gbuɣin’ nyaŋ. Ka ŋuni n-lee ni tooi yiɣis’ o? Ŋunkam niŋ alibarika niŋ yi ni, o ni nya alibarika; ka ŋunkam yɛli yɛtɔɣ’ biɛɣu bahi yi zuɣu, yɛtɔɣ’ biɛɣu maa din’ dim’ o.”

¹⁰Di saha ka Balak suhu daa yiɣisi pam bahi Balaam zuɣu, ka o zaŋ o nuhi kpahi taba ka yɛli Balaam, “N zaŋ a mi na ni a ti yɛli yɛtɔɣ’ biɛri bahi n dimnim’ ŋɔ zuɣu, amaa ka a ti niŋla alibarika niŋ bɛ ni siɣimsiɣim buta ŋɔ zaa.

¹¹Dinzuɣu kulim’ a ya pumpɔŋɔ. N daa yɛliya ni n ni ti a pin’ titali, amaa Yawɛ chɛ ka a kɔŋ pini maa.”

¹²Ka Balaam daa yɛli Balak, “N daa pun yɛl’ a ni daa tim a tuun’ shɛb’ n sanna la,

¹³‘Hal Balak yi zaŋ o yiŋ’ anzinfa mini salima zaa ti ma gba, n ku tooi niŋ Yawɛ ni zali ma ni n di niŋ shɛli; n ku tooi niŋ zaɣ’ viɛlli bee zaɣ’ biɛɣu mmaŋmaŋ’ yubu ni. Yawɛ ni yɛli shɛli, dina ka n gba yɛra.’ ”

¹⁴Dinzuɣu, pumpɔŋɔ n ni kuli n ya, amaa kamina ka n wuh’ a niriba ŋɔ ni ti yɛn niŋ a niriba shɛm dahin’ shɛli ha.

¹⁵Di saha ka o tɔɣis’ o daanabitali yɛtɔɣa yɛli, “Bɛɔr bia Balaam daanabitali yɛtɔɣa m-bɔŋɔ, Ninvuɣ’ so ŋun nyari viɛnyɛliŋga daanabitali yɛtɔɣa m-bɔŋɔ.

¹⁶O nyɛla ninvuɣ’ so ŋun wumdi Naawuni yɛtɔɣa, ka mali baŋsim shɛli din yiri Zallakudura Naa sanna. O nyɛla ŋun nyari Kpiɔŋlan’ Naa ʒii. O luya, amaa ka bi pɔb’ o nina.

¹⁷N nya o, amaa pa pumpɔŋɔ. N nya o, amaa ka o shee na waɣa. Saŋmariga ni ti puhi yi Yaakubu zuliya ni na. Naa ni ti yi Izraɛl zuliya ni na; O ni ti ku Mɔab zuɣulaannima, ka ku Sɛt zuliya zaa.

¹⁸Bɛ ni ti deei Ɛdomnim’ tiŋgbɔŋ su. Siɛrinim’ dimnim’ ni ti deei bɛ tiŋgbɔŋ su.

¹⁹Yaakubu zuliya ninvuɣ’ so ni ti di nam, ka ku ninvuɣ’ shɛb’ bɛn kpalim be Iri!”

²⁰Di saha ka Balaam daa lihi Amalɛknima, ka tɔɣis’ o daanabitali yɛtɔɣa yɛli, “Amalɛknima n-daa be zuliya kam tooni, Amaa bɛ bahigu ni ti nyɛla bahi yoli zaa.”

²¹Di nyaaŋa ka o daa lihi Kɛnnim’ gba, ka tɔɣis’ o daanabitali yɛli, “Yi biɛhigu shee nyɛla barina ni ka luɣ’ shɛli. Yi biɛhigu shee maa ŋmanila tiɛɣu din pa kuɣili zuɣu.

²²Amaa Ashurinim’ ni ti gbahi yinim’ Kɛnnim’ ti leei daba, ka kun ya.”

²³Ka o daa lan tɔɣis’ o daanabitali yɛtɔɣa yɛli, “Mbaye, Naawuni yi ti niŋ dimbɔŋɔ, ŋuni n-lee ni be?

²⁴Saipurusinim’ ni ti kpe ŋarima kana ti liri ya. Bɛ ni ti nyaŋ Ashurinim’ mini Ɛbanima. Amaa bɛ gba ni ti bahi yoli zaa.”

²⁵Dimbɔŋɔ nyaaŋa ka Balaam daa yiɣisi kul’ o ya, ka Balak gba ŋmaligi chaŋ o chandi.