Read Dagbani Kalinlinima 25 Bible Online

Kalinlinima 25 - Dagbani bible

Kalinlinima 25

¹Izraɛlnim’ ni daa be Akasia saha shɛli ka bɛ daa piligi bɔri Mɔab paɣiba.

²Ka paɣiba maa daa booni Izraɛlnim’ maa chani bɛ buɣa maligunim’ ni, ka bɛ ti jɛmdi buɣa maa ka diri di maligu bindira.

³Lala ka Izraɛlnim’ daa niŋ kpe Pɛɔr buɣili Baal jɛmbu ni. Ka Yawɛ suhu daa yiɣisi bahi Izraɛlnim’ zuɣu

⁴ka o yɛli Musa, “Gbahim’ niriba maa toondaannima n-zaŋ kpana kuhi ba tabili bini zali wuntaŋa man’ Yawɛ tooni, ka n vuui n suhuyiɣisili titali maa ka chɛ Izraɛlnima.”

⁵Ka Musa daa yɛli Izraɛl zuɣulaannima, “Yi zaa yinoyino kum’ yi ninvuɣ’ shɛb’ bɛn kpe Pɛɔr Baal jɛmbu ni maa.”

⁶Musa mini Izraɛlnim’ ni daa be Yawɛ chirigibu shee suɣili dunol’ ni n-kumdi saha shɛli maa, ka Izraɛl do’ so daa zaŋ Midian paɣ’ na ti kpe o suɣili ni bɛ zaa ninni.

⁷Ka Ɛliɛza bia Finɛhas ŋun daa nyɛ maligumaana Aduna yaaŋa la daa nya lala ka yiɣisi niriba maa ni kpuɣi kpani

⁸n-doli Izraɛl doo maa ti kpe o duu puuni n-zaŋ kpani maa kuhi Izraɛl doo maa mini paɣ’ maa zaa puya ni ku ba. Ka alɔbo din daa lu Izraɛlnim’ zuɣu maa daa zani tariga.

⁹Amaa alɔbo maa ni daa pun ku ninvuɣ’ shɛb’ kalinli daa nyɛla ninvuɣ’ tuhi’ pisinaanahi.

¹⁰Ka Yawɛ daa yɛli Musa,

¹¹“Ɛliɛza bia Finɛhas ŋun nyɛ maligumaana Aduna yaaŋa ŋɔ niŋ suhukpeeni Izraɛlnim’ ni n-zani n zaani mahi n suhu, ka m bi chɛ ka n suhuyiɣisili di Izraɛlnima.

¹²Dinzuɣu yɛlim’ o, ‘N zaŋ sandaani timbu tuma ti o;

¹³ka di nyɛ o min’ o zuliya maligumaanitali alikauli ʒiɛmani kam ni, dama o zab’ nyuli ti o Naawuni ka chɛ ka Izraɛlnim’ nya alahichi chɛ m-paŋ.’ ”

¹⁴Bɛ ni daa ku Izraɛl do’ so mini Midian paɣ’ maa yuli n-daa booni Zimiri. O daa nyɛla Salu bia, ka lan nyɛ Simiɔn zuliya niriba dɔɣirikpɛma.

¹⁵Ka bɛ ni daa ku Midian paɣ’ so maa mi yuli daa boonila Kɔzibi. O daa nyɛla Zur bipuɣiŋga, ka Zur daa nyɛ o daŋ ni niriba dɔɣirikpɛma Midian.

¹⁶Ka Yawɛ daa yɛli Musa,

¹⁷“Nahimmiya Midiannima, ka ku ba,

¹⁸bɛ ni daa nahim ya, ka yɔhim ya Pɛɔr yɛla ni la mini Kɔzibi yɛla ni la zuɣu. Kɔzibi daa nyɛla Midian toondaan’ so bipuɣiŋga, ka nyɛ bɛ tizɔpaɣ’ so bɛ ni daa ku Pɛɔr alɔbo la dal’ la.”