Read Dagbani Kalinlinima 29 Bible Online

Kalinlinima 29 - Dagbani bible

Kalinlinima 29

¹Gol’ so ŋun pah’ ayopɔin dabisi’ shɛli din daŋ tooni dali, yin’ laɣimmiya jɛm Naawuni, ka di tumiya tuun’ shɛli. Dindali maa, piɛbimiya kikahi,

²ka malimiya sara shɛli yi ni zaŋdi nyɔri buɣim ka di nyom viɛl’ Yawɛ san’ la. Dina n-nyɛ: naɣilabil’ yino mini piɛla’ yino ni yuun’ yini piɛlabih’ ayopɔin bɛn ka dansi.

³Bɛ chi sara yɛn nyɛla bɛ ni zaŋ kpam ŋmiri zim viɛl’ shɛli, ka yi zaŋ di kilɔgiram ata pahi naɣilabil’ yino maa zuɣu, ka zaŋ di kilɔgiram ayi m-pahi piɛla’ yino maa zuɣu;

⁴ka zaŋ kilɔgiram yiniyini pahi piɛbih’ ayopɔin maa zaɣ’ yini kam zuɣu;

⁵ka zaŋ bula’ yino mal’ alahichi sanyoo sara, ka di kpihim yi daalahichi.

⁶Dimbɔŋɔnim’ nyɛla din pahi yi ni zaŋdi sara shɛli nyɔri buɣim gol’ palli ni la mini di chi sara zuɣu ni yi ni lan zaŋdi sara shɛli nyɔri buɣim sahakam la mini di chi sara ni di binnyura sara zuɣu kaman di zaligu ni nyɛ shɛm. Di nyɛla sara shɛli yi ni zaŋdi nyɔri buɣim ka di nyom viɛl’ Yawɛ sani.

⁷Gol’ so ŋun pah’ ayopɔin maa biɛɣu pia dali, yin’ lomiya noli ka laɣim jɛm Naawuni, ka di tumiya tuun’ shɛli.

⁸Malimiya sara shɛli yi ni zaŋdi nyɔri buɣim tiri Yawɛ, ka di nyom viɛla. Dina n-nyɛ: naɣilabil’ yino mini piɛla’ yino ni yuun’ yini piɛlabih’ ayopɔin bɛn ka dansi.

⁹Bɛ chi sara yɛn nyɛla bɛ ni zaŋ kpam ŋmiri zim viɛl’ shɛli, ka yi zaŋ di kilɔgiram ata pahi naɣilaa maa zuɣu; ka zaŋ di kilɔgiram ayi pahi piɛla’ yino maa zuɣu;

¹⁰ka zaŋ di kilɔgiram yiniyini pahi piɛlabih’ ayopɔin la zaɣ’ yino kam zuɣu.

¹¹ Zaŋmiya bula’ yino mal’ alahichi sanyoo sara pahi sara shɛli din kpihindi alahichi la mini yi ni zaŋdi sara shɛli nyɔri buɣim sahakam la ni di chi sara ni di binnyura sara la zuɣu.

¹²Gol’ so ŋun pah’ ayopɔin maa biɛɣ’ pinaanu dali, yin’ laɣimmiya jɛm Naawuni, ka di tumiya tuun’ shɛli, ka zaŋya daba ayopɔin puhi Yawɛ chuɣu.

¹³Malimiya yi ni zaŋdi sara shɛli nyɔri buɣim ka di nyom viɛl’ Yawɛ san’ la. Dina n-nyɛ: naɣilabihi pinaata mini piɛlah’ ayi ni yuun’ yini piɛlabihi pinaanahi bɛn ka dansi.

¹⁴Bɛ chi sara yɛn nyɛla bɛ ni zaŋ kpam ŋmiri zim viɛl’ shɛli, ka yi zaŋ di kilɔgiram ata pahi naɣilahi pinaata maa zaɣ’ yino kam zuɣu, ka zaŋ di kilɔgiram ayi pahi piɛlah’ ayi maa zaɣ’ yino kam zuɣu;

¹⁵ka zaŋ di kilɔgiram yini pahi piɛlabihi pinaanahi maa zaɣ’ yino kam zuɣu.

¹⁶Zaŋmiya bula’ yino mali alahichi sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.

¹⁷Dabisili din pah’ ayi dali zaŋmiya naɣilabihi pinaayi mini piɛlah’ ayi ni yuun’ yini piɛlabihi pinaanahi bɛn ka dansi mali sara;

¹⁸ka zaŋ chi sara mini wain sara pahi naɣilabihi maa mini piɛlahi ni piɛbihi pola maa zuɣu kaman bɛ kalinli ni nyɛ shɛm

¹⁹ni alahichi sanyoo sara bula’ yino m-pahi yi ni zaŋdi sara shɛli nyɔri buɣim sahakam la ni di chi sara ni di binnyura sara la zuɣu.

²⁰Dabisili din pah’ ata dali, zaŋmiya naɣilahi piniyini mini piɛlah’ ayi ni yuun’ yini piɛlabihi pinaanahi bɛn ka dansi mali sara;

²¹ka zaŋ chi sara mini binnyura sara pahi naɣilahi maa mini piɛlahi maa ni piɛlabihi maa zuɣu kaman bɛ kalinli ni nyɛ shɛm.

²²Ka yi lan zaŋ bula’ yino mal’ alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.

²³Dabisili din pah’ anahi dali, zaŋmiya naɣilahi pia mini piɛlah’ ayi ni yuun’ yini piɛlabihi pinaanahi bɛn ka dansi mali sara;

²⁴ka zaŋ chi sara mini binnyura sara pahi naɣilahi maa mini piɛlahi maa ni piɛbihi maa zuɣu kaman bɛ kalinli ni nyɛ shɛm.

²⁵Ka yi lan zaŋ bula’ yino mal’ alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.

²⁶Dabisili din pah’ anu dali, zaŋmiya naɣilah’ awɛi mini piɛlah’ ayi ni yuun’ yini piɛlabihi pinaanahi bɛn ka dansi mali sara;

²⁷ka zaŋ chi sara mini binnyura sara pahi naɣilahi maa mini piɛlahi maa ni piɛbihi maa zuɣu kaman bɛ kalinli ni nyɛ shɛm.

²⁸Ka yi lan zaŋ bula’ yino mal’ alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.

²⁹Dabisili din pah’ ayɔbu dali, zaŋmiya naɣilah’ anii mini piɛlah’ ayi ni yuun’ yini piɛlabihi pinaanahi bɛn ka dansi mali sara;

³⁰ka zaŋ chi sara mini binnyura sara pahi naɣilahi maa mini piɛlahi maa ni piɛlabihi maa zuɣu kaman bɛ kalinli ni nyɛ shɛm.

³¹Ka yi lan zaŋ bula’ yino mali alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.

³²Dabisili din pah’ ayopɔin dali, zaŋmiya naɣilah’ ayopɔin mini piɛlah’ ayi ni yuun’ yini piɛlabihi pinaanahi bɛn ka dansi mali sara;

³³ka zaŋ chi sara mini binnyura sara pahi naɣilahi maa mini piɛlahi maa ni piɛlabihi maa zuɣu kaman bɛ kalinli ni nyɛ shɛm.

³⁴Ka yi lan zaŋ bula’ yino mali alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.

³⁵Dabisili din pah’ anii dali, yin’ laɣimmiya jɛm Naawuni ka di tumiya tuun’ shɛli.

³⁶Malimiya yi ni zaŋdi sara shɛli nyɔri buɣim ka di nyom viɛl’ Yawɛ san’ la. Dina n-nyɛ: naɣila’ yino mini piɛla’ yino ni yuun’ yini piɛlabih’ ayopɔin bɛn ka dansi;

³⁷ka zaŋ chi sara mini binnyura sara pahi naɣilaa maa mini piɛlaa maa ni piɛbihi la zuɣu kaman bɛ kalinli ni nyɛ shɛm.

³⁸ Ka yi lan zaŋ bula yino mali alahichi sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.

³⁹Zaŋmiya dimbɔŋɔnim’ maani sara tiri Yawɛ yi churi puhibu ni m-pahi yi pɔri pɔbu sara mini yi suhuyubu sara kaman yi ni zaŋdi sara shɛli nyɔri buɣim la ni yi chi sara ni yi binnyura sara ni yi biɛrisuŋ sara la zuɣu.

⁴⁰Ka Musa daa yɛli Izraɛlnim’ Yawɛ ni zal’ o ni o yɛli ba shɛlikam maa zaa.