Read Dagbani Kalinlinima 31 Bible Online

Kalinlinima 31 - Dagbani bible

Kalinlinima 31

²“Bɔhimi Midiannim’ biɛri ti Izraɛlnima. Di nyaaŋa n ni deeg’ a nyɛvili.”

³Dinzuɣu ka Musa daa yɛli Izraɛlnima, “Chɛliya ka yi ni shɛb’ lo kpara n-chaŋ ti tuhi Midiannima m-bɔhi ba biɛri ti Yawɛ.

⁴Piimiya ninvuɣ’ tuhilituhili Izraɛl zuliya kam ni n-chɛ ka bɛ chaŋ tɔb’ maa ni.”

⁵Ka bɛ daa pii ninvuɣ’ tuhilituhili Izraɛl zuliya kam ni, ka bɛ kalinli yiɣisi tɔbbihi tuhi’ pinaayi n-lo kpara ni bɛ chaŋ tɔb’ maa ni.

⁶Ka Musa daa chɛ ka bɛ ninvuɣ’ tuhilituhili bɛn yi Izraɛl zuliya kam ni na maa mini maligumaana Ɛliɛza bia Finɛhas ŋun daa gbibi Naawuni jɛmbu shee lahi mini kikahi din ni piɛbi boli niriba o nuu ni la chaŋ tɔb’ maa ni.

⁷Ka bɛ daa tuhi Midiannim’ maa kaman Yawɛ ni daa zali Musa shɛm n-ku dɔbba zaa.

⁸Bɛ daa ku Ɛvi mini Rɛkɛm ni Zur ni Hur ni Rɛba bɛn daa nyɛ Midian nanim’ la m-pahi bɛ ni daa ku bɛ ninvuɣ’ shɛb’ zaa zuɣu. Bɛ daa zaŋ takɔbi ku Bɛɔr bia Balaam gba.

⁹Ka Izraɛlnim’ daa gbahi Midian paɣiba mini bɛ bihi, ka gbahi bɛ niɣi mini bɛ biŋkɔbbaligu zaa, ka di bɛ nɛma zaa chaŋ.

¹⁰Bɛ daa nyo bɛ fɔntin’ shɛŋa ni bɛ ni daa be mini bɛ sansana zaa buɣim.

¹¹Amaa bɛ daa zaŋ bɛ ni di neen’ shɛŋa zaa m-pahi ninsalinim’ mini biŋkɔbiri.

¹²Di saha ka bɛ daa zaŋ niriba maa mini bɛ ni daa di neen’ shɛŋa na maa nti ti Musa mini maligumaana Ɛliɛza ni Izraɛlnima sansani din daa be Mɔab bɔpiɛligu din daa miri Jɔɔdɛn Mɔɣili duli Jɛriko polo la.

¹³Ka Musa mini maligumaana Ɛliɛza ni Izraɛl kpamba zaa daa yi bɛ sansani maa ni na chaŋ ti tuhi ba soli.

¹⁴Ka Musa suhu daa yiɣisi bahi sapashin’ kpamba bɛn daa yi tɔb’ maa ni na ka nyɛ bɛn su tɔbbihi tuhilituhili mini bɛn su tɔbbihi kɔbigakɔbiga fukumsi la zuɣu.

¹⁵Musa daa bɔhi ba mi, “Yi chɛla paɣiba ŋɔ zaa ka bi ku ba?

¹⁶ Nyamiya, Balaam ni daa wuhi yikombiɛlim so’ shɛl’ la ni, bɛmbɔŋɔ n-daa chɛ ka Izraɛlnim’ tum din bie zaŋ chaŋ Yawɛ sani Pɛɔr yɛla la ni, ka alɔbo daa lu Yawɛ niriba zuɣu la.

¹⁷Dinzuɣu pumpɔŋɔ kumiya bidibbihi mini paɣ’ shɛb’ bɛn pun baŋ dɔbba la zaa.

¹⁸Amaa paɣisar’ shɛb’ bɛn na bi baŋ dɔbba la, chɛliya bɛna n-zaŋ ba niŋ yi paɣiba.

¹⁹Ŋunkam ku nira mini ŋunkam shihi kpima, benya sambani ŋɔ ni daba ayopɔin. Yi mini yi ni gbahi ninvuɣ’ shɛb’ na maa zaa malimiya yimaŋa n-niŋ kasi daba ata dali mini daba ayopɔin dali.

²⁰Malimiya yi binyɛra zaa mini yi binshɛŋa din nyɛ biŋkɔbiri gbana ni buhi kɔbiri binyara zaa ni dari binyara zaa ka di niŋ kasi.”

²¹Ka maligumaana Ɛliɛza daa yɛli tɔbbihi bɛn yi tɔb’ maa na, “Yawɛ ni zaŋ zaligu shɛŋa ti Musa m-bɔŋɔ:

²²Zaŋmiya salima mini anzinfa ni daanya ni kuriti ni dalima ni kurizim,

²³buɣim ni ku di binshɛɣukam zaa niŋ buɣim ni m-mal’ li ka di niŋ kasi. Amaa faashee ka yi bahi zaŋ kom din maani binyara ka di be kasi paɣi li. Ka binshɛŋa din mi ku tooi kpe buɣim ni, yin’ zaŋmiya kom paɣi li.

²⁴Paɣimiya yi situra daba ayopɔin dali din ni chɛ ka yi be kasi. Di nyaaŋa ka yi naanyi kpe sansani ŋɔ ni na.”

²⁵Ka Yawɛ daa yɛli Musa,

²⁶“A mini maligumaana Ɛliɛza ni Izraɛl daŋ kam dunoli dɔɣirikpamba niŋmi bɛ ni di neen’ shɛŋa din nyɛ ninsalinim’ mini biŋkɔbiri maa na laasabu.

²⁷Pirigimiya bɛ ni di neen shɛŋa na maa ʒiibuyi n-zaŋ yim ti tɔbbihi bɛn chaŋ tɔbu ni maa, ka zaŋ yim la mi ti Izraɛlnim’ zaa.

²⁸Yihimiya tɔbbihi maa tarili ni bin’ yini bini kɔbisinu kam puuni ti Yawɛ zaka. Di yi nyɛ ninsalinim’ bee niɣi bee bunsi bee piɛri bee buhi.

²⁹Yihimiya li bɛ tarili maa ni n-zaŋ ti maligumaana Ɛliɛza ka o zaŋ mali sara ti Yawɛ.

³⁰Amaa Izraɛlnim’ tarili la ni, yihimiya bin’ yini bini pihinu kam puuni, di yi nyɛla ninsalinim’ bee niɣi bee bunsi bee piɛri bee buhi bee biŋkɔbiri balibu kam bɛn pahi n-zaŋ ba ti Lɛvinim’ bɛn su Yawɛ biɛhigu shee tuma fukumsi la.”

³¹Ka Musa mini maligumaana Ɛliɛza daa niŋ kaman Yawɛ ni daa zali Musa shɛm maa.

³²Bɛ ni daa di neen’ shɛŋa na maa puuni binshɛŋa din daa kpalim ka tɔbbihi maa zaŋ li kalinli daa nyɛla piɛri tuhi’ kɔbisiyɔbu ni tuhi’ pisopɔinnaanu

³³mini niɣi tuhi’ pisopɔinnaayi

³⁴ni bunsi tuhi’ pihiyɔbu ni yini

³⁵ni ninvuɣ’ tuhi’ pihitanaayi bɛn daa nyɛ paɣ’ shɛb’ bɛn na bi baŋ dɔbba la.

³⁶Ka pirigili shɛli din daa nyɛ tɔbbihi bɛn chaŋ tɔb’ maa ni tarili la piɛri mini buhi kalinli daa nyɛla tuhi’ kɔbisita ni tuhi’ pihitanaayopɔin ni kɔbisinu.

³⁷Ka Yawɛ zaka piɛri mini buhi kalinli daa nyɛla kɔbisiyɔbu ni pisopɔinnaanu.

³⁸Niɣi daa nyɛla naɣ’ tuhi’ pihitanaayɔbu. Ka Yawɛ zaka niɣi kalinli daa nyɛ naɣ’ pisopɔinnaayi.

³⁹Ka bunsi daa nyɛ tuhi’ pihita ni kɔbisinu. Ka Yawɛ zaka bunsi kalinli daa nyɛ bunsi pihiyɔbu.

⁴⁰Ka ninsalinim’ daa nyɛ tuhi’ pinaayɔbu. Ka Yawɛ zaka niriba kalinli daa nyɛ ninvuɣ’ pihitanaayi.

⁴¹Ka Musa daa zaŋ Yawɛ zaka ni nyɛ shɛli maa ti maligumaana Ɛliɛza kaman Yawɛ ni daa zali ŋun Musa shɛm.

⁴²Musa daa woligi pirigili shɛli din nyɛ Izraɛlnim’ tarili ka chɛ tɔbbihi la dini.

⁴³Pirigili din daa nyɛ Izraɛlnim’ tarili maa piɛri mini buhi kalinli daa nyɛla tuhi’ kɔbisita ni tuhi’ pihitanaayopɔin ni kɔbisinu

⁴⁴mini naɣ’ tuhi’ pihitanaayɔbu

⁴⁵ni bunsi tuhi’ pihita ni kɔbisinu

⁴⁶ni ninsalinim’ tuhi’ pinaayɔbu.

⁴⁷Pirigili din daa nyɛ Izraɛlnim’ tarili maa ni, Musa daa yihila ninsalinim’ ninvuɣ’ yino ninvuɣ’ pihinu kam puuni, ka yihi biŋkɔbiri pihinu kam puuni biŋkɔb’ yino n-zaŋ ba ti Lɛvinim’ bɛn daa su Yawɛ biɛhigu shee tuma la kaman Yawɛ ni daa zali Musa shɛm.

⁴⁸Di nyaaŋa ka sapashin’ kpamba mini sapashim’ bihi bɛn daa su tɔbbihi tuhilituhili ni tɔbbihi kɔbigakɔbiga fukumsi daa ka Musa sanna

⁴⁹nti yɛl’ o, “Tinim’ bɛn nyɛ a daba ŋɔ kali ti ni su tɔbbi’ shɛb’ fukumsi n-nya ka ti zaa beni.

⁵⁰Ka ti zaŋ ti zaa yinoyino ni nya salima binshɛŋa din nyɛ nuhi ni bansi ni zoligɔnim’ ni nintuhi din dihiri gbana zuɣu ni tibikpara ni yɛri na ni ti ti mali sara ti daalahichi zuɣu Yawɛ sani.”

⁵¹Ka Musa mini maligumaana Ɛliɛza daa deei bɛ ni daa zaŋ salima mali binshɛŋa maa zaa.

⁵²Bɛ ni daa deei salima binshɛŋa sapashin’ kpamba mini sapashin’ bihi shɛb’ bɛn su tɔbbihi tuhilituhili mini tɔbbihi kɔbigakɔbiga sani maa tibisim daa miri kilɔgiram kɔbisiyi.

⁵³(Tɔbbihi maa zaa daa zaŋla bɛ ni di neen’ shɛŋa maa.)

⁵⁴Ka Musa mini maligumaana Ɛliɛza daa deei salima maa sapashin’ kpamba bɛn daa su tɔbbihi tuhilituhili mini tɔbbihi kɔbigakɔbiga fukumsi la sani n-zaŋ li tahi ti niŋ Naawuni min’ o niriba laɣiŋgu suɣili la puuni ni di nyɛ din ni chɛ ka Yawɛ teeri Izraɛlnim’ yɛla.