Read Dagbani Kalinlinima 32 Bible Online

Kalinlinima 32 - Dagbani bible

Kalinlinima 32

¹Rubin mini Gaad zuliya niriba daa mali niɣi pam. Bɛ ni daa nya ka Jaza mini Giliad tiŋgbana simdi niɣi biɛhigu shee,

²ka bɛ daa ka Musa mini maligumaana Ɛliɛza ni kpamba sanna ti yɛli ba,

³“Atarɔt mini Dibɔn ni Jaza ni Nimira ni Hɛshibɔn ni Ɛliale ni Siibam ni Nɛbo ni Bɛɔn

⁴din nyɛ Yawɛ ni daa nyaŋ tin’ shɛŋa nim’ ti Izraɛlnim’ la nyɛla di ni simdi ni niɣi be tiŋgban’ shɛŋa ni; ka tinim’ bɛn nyɛ yi daba ŋɔ mi mali niɣi.”

⁵Bɛ daa lan yɛli, “Ka yi nini yi tiɣi tinim’ bɛn nyɛ yi daba ŋɔ, yin’ zaŋmiya tiŋgbani maa ti ti ka di leei ti dini, ka di zaŋya ti du Jɔɔdɛn Mɔɣili ŋɔ.”

⁶Amaa ka Musa daa bɔhi Gaad mini Rubin zuliya maa, “Yi mabihi maa cham’ ti tuhi tɔbu ka yinim’ kpalim be kpe?

⁷Bɔzuɣu ka Izraɛlnim’ yɛn chaŋ ti deei Yawɛ ni zaŋ tiŋgbɔn shɛli ti ba maa su, ka yi bɔri ni yi gbarigi ba?

⁸Lala ka yi yaannim’ daa niŋ n ni daa tim ba ka bɛ yi Kadɛshibarinia chaŋ ni bɛ ti nya tiŋgbɔŋ maa la.

⁹ Bɛ ni daa chaŋ ti paai Ɛshikol vinvamli ni n-nya tiŋgbɔŋ maa, bɛ daa gbarigila Izraɛlnima ni bɛ di chaŋ ti deei Yawɛ ni zaŋ tiŋgbɔn shɛli ti ba maa.

¹⁰Ka Yawɛ suhu daa yiɣisi pam dindali maa, ka o po n-yɛli,

¹¹‘Yɛlimaŋli, ninvuɣ’ shɛb’ bɛn yi Ijipti na ka nyɛ bɛn paai yuun’ pisi zaŋ chana bɛ so nini ku nya n ni daa lo alikauli ni n ni zaŋ tiŋgbɔn shɛli ti Ibrahimma mini Yisahaku ni Yaakubu la; dama bɛ bi doli ma viɛnyɛliŋga.

¹²Bɛ ni so nini ku nya li, naɣila Jɛfune ŋun nyɛ Kɛnizi nir’ la bia Kalɛb mini Nan bia Jɔshua, dama bɛn’ doli man’ Yawɛ viɛnyɛliŋga.’

¹³ Ka Yawɛ suhu daa yiɣisi bahi Izraɛlnim’ zuɣu, ka o chɛ ka bɛ be mɔɣu ni n-dari ginda m-mali ti paai yuun’ pihinahi hal ka ʒiɛmani maa ni ninvuɣ’ shɛb’ bɛn daa tum din bie Yawɛ sani maa zaa ti kpi.

¹⁴Ka pumpɔŋɔ yinim’ alahichinim’ ŋɔ yiɣisimi zani yi yaannim’ zaashee ni yi chɛ ka Yawɛ suhu yiɣisi bahi Izraɛlnim’ zuɣu!

¹⁵Yi yi chɛ o dolibu, o ni lan chɛ niriba ŋɔ bahi mɔɣu ŋɔ ni, ka yinima n-nyɛ bɛn yɛn ku ninvuɣ’ gbaliŋ ŋɔ zaa.”

¹⁶Di nyaaŋa ka bɛ daa ka Musa sanna ti yɛl’ o, “Ti ni me fɔntinsi kpe n-zaŋ ti bihi niŋ di ni, ka me buzɔna n-zaŋ ti piɛri mini ti buhi niŋ di ni.

¹⁷Amaa tinim’ ni lo kpara gari Izraɛlnim’ tooni chaŋ ti nya ʒiishee ti ba, ka ti bihi be bɛ ni me goma gili tin’ shɛŋa ni tiŋgbɔŋ maa nim’ zuɣu la ni.

¹⁸Ti ku lab’ ti yinsi faashee ka Izraɛlnim’ zaa ti nya bɛmaŋmaŋ’ tiŋgbana.

¹⁹Dama pa ti mini ba n-yɛn deei Jɔɔdɛn Mɔɣili duli mini di tooni ha tiŋgbana maa su, tinim’ ni yɛn deei tiŋgban’ shɛŋa su bela Jɔɔdɛn Mɔɣili duli wulimpuhili polo ŋɔ na.”

²⁰Di saha ka Musa daa yɛli ba, “Yi yi ni niŋ lala, dindina yin’ lomiya kpara Yawɛ nini ŋɔ ni n-chaŋ tɔb’ maa ni.

²¹Yi tɔbbia kam yi gbaai Jɔɔdɛn Mɔɣili ŋɔ du Yawɛ ninni chaŋ ti lu o dimnim’ maa zuɣu hal ka o ti kari ba,

²²ka deei tiŋgbɔŋ maa, di nyaaŋa yi ni tooi labina, ka ku mali talahi yɛl’ shɛli Yawɛ mini Izraɛlnim’ sani; ka tiŋgbani ŋɔ leei yi ni su shɛli Yawɛ sani.

²³Amaa yi yi ku niŋ lala, dindina yi tum alahichi Yawɛ sani, ka biɛhiŋ kani, yi daalahichi maa ku chɛn ya.

²⁴Mɛmiya tinsi ti yi bihi ka me piɛri buzɔna ti yi piɛri mini yi buhi, ka niŋ kaman yi ni lo alikauli ni yi ni niŋ shɛm maa.”

²⁵Ka Gaad zuliya mini Rubin zuliya maa daa yɛli Musa, “Tinim’ bɛn nyɛ a daba ŋɔ ni niŋ nyini ti dan’ ni zali ti ni ti niŋ shɛm maa.

²⁶Ti paɣiba mini ti bihi ni ti piɛri ni buhi ni ti niɣi zaa ni kpalim be Giliad tinsi maa ni.

²⁷Amaa tinim’ bɛn nyɛ a daba bɛn lo kpara ŋɔ zaa ni du n-chaŋ ti tuhi tɔbu maa ti Yawɛ kaman nyin’ ti dan’ ni yɛli shɛm maa.”

²⁸Dinzuɣu ka Musa daa zali maligumaana Ɛliɛza mini Nan bia Jɔshua ni Izraɛlnim’ zuliya dunoli kam dɔɣirikpamba zaligu zaŋ chaŋ bɛ polo.

²⁹Musa daa yɛli ba, “Gaad zuliya mini Rubin zuliya bɛn zaa lo kpara ni bɛ chaŋ tɔbu ni Yawɛ ninni ŋɔ, yi doli ya gbaai Jɔɔdɛn Mɔɣili ŋɔ du, ka yi ti tuhi deei tiŋgbɔŋ maa, dindina yin’ zaŋmiya Giliad tiŋgbɔŋ ti ba ka bɛ su li.

³⁰Amaa bɛ yi ku lo kpara pahi yi zuɣu du, yi mini ba zaa tarili ni bela Keenan tiŋgbɔŋ ni.”

³¹Ka Gaad zuliya mini Rubin zuliya maa daa yɛli, “Ti ni niŋ kaman Yawɛ ni zali tinim’ bɛn nyɛ a daba ŋɔ ni ti niŋ shɛm maa.

³² Ti ni lo kpara du Yawɛ ninni n-chaŋ Keenan tiŋgbɔŋ ni, ka ti tarili ni nyɛ shɛli ka ti yɛn su li maa kpalim be Jɔɔdɛn Mɔɣili duli ŋɔ na.”

³³Ka Musa daa zaŋ Amɔrinim’ Naa Sihɔn mini Bashan Naa Ogi tiŋgbana mini di fɔntinsi ni di tintarisi ni di tiŋgbana maa puuni fɔntinsi zaa ti Gaad zuliya mini Rubin zuliya ni Yisifu bia Manaasa zuliya pirigili la.

³⁴Ka Gaad zuliya daa lab’ mali me tin’ shɛŋa din yuya booni Dibɔn mini Atarɔt ni Aroa

³⁵ni Atirɔtishɔfan ni Jaza ni Jɔgbɛha

³⁶ni Bɛtinimira ni Bɛtiharan, ka me buzɔna zali bɛ piɛri mini buhi, ka me goondahi gil’ li.

³⁷Ka Rubin zuliya daa lab’ mali me Hɛshibɔn mini Ɛliale ni Kiriataim

³⁸ni Nɛbo ni Baalimiɔn (Di yuya maa shɛŋa taɣiya) ni Sibima; ka bɛ daa ti bɛ ni me tin’ shɛŋa maa yu’ pala.

³⁹Ka Makiri zuliya ni ninvuɣ’ so ŋun daa nyɛ Manaasa bia daa chaŋ ti liri Giliadnima ŋ-ŋme n-deei li ka kari Amɔrinim’ bɛn daa be nimaani la.

⁴⁰Ka Musa daa zaŋ Giliad maa ti Manaasa bia Makiri ka o ʒini nimaani.

⁴¹Ka Manaasa bia Jair daa chaŋ ti ŋme n-deei tiŋkpan’ shɛŋa, ka bol’ li Havɔtijairi.

⁴²Ka Nɔba daa chaŋ ti ŋme n-deei Kɛnat mini di tiŋkpansi, ka zaŋ omaŋmaŋ’ yuli Nɔba boli tinsi maa.