Read Dagbani Kalinlinima 4 Bible Online

Kalinlinima 4 - Dagbani bible

Kalinlinima 4

²“Kalimiya Kɔhat daŋ niriba bɛn be Lɛvinim’ puuni bɛ ko kaman bɛ daŋ ni bɛ yaannim’ dunoya ni nyɛ shɛm,

³ka bɛ nyɛ yuun’ pihita zaŋ ti paai yuun’ pihinu, ka bɛ zaa nyɛ bɛn ni tooi tum tuma Naawuni chirigibu shee suɣili la puuni.

⁴Kɔhat daŋ niriba maa tuma Naawuni chirigibu shee suɣili maa puuni daa nyɛla bɛ lihiri binshɛŋa din be kasi pam la.

⁵“Saha shɛli yi yi ti yɛn yiɣisi chaŋ, Aduna min’ o bidibisi bɛn’ kpɛm’ suɣili maa ni nti yiligi pateesa shɛli din yiliya la n-zaŋ li pili Alikauli Adaka la.

⁶Di nyaaŋa ka bɛ zaŋ biŋkɔbigu gbaŋ yɛrigi pil’ li, ka zaŋ chinchin’ sabilitim yirigi pil’ li, ka zaŋ di dapuhi tu li.

⁷“Bɛ lan zaŋm’ chinchin’ sabilitim pili Yawɛ biɛhigu shee suɣili bɔrɔbɔro teebul’ la, ka zaŋ lahi mini tulaale zim lahi ni la’ shɛŋa ni binnyur’ shɛli bɛ ni zaŋdi maani sara la tam di zuɣu; ka zaŋ bɔrɔbɔro shɛli din simdi ni di kul be nimaani sahakam la gba pa di zuɣu.

⁸Di nyaaŋa ka bɛ zaŋ chinchin’ ʒee pil’ li, ka zaŋ biŋkɔbigu gbaŋ yɛrigi pil’ li, ka zaŋ di dapuhi tu li.

⁹Bɛ lan zaŋm’ chinchin’ sabilitim pili firilatamdigu la mini di firilanim’ ni di firiladuhirisi ni firilakpihindisi ni di tahipɔna ni di kpam ni be kpaŋman’ shɛŋa ni;

¹⁰ka zaŋ di mini di nɛma zaa pɔbi biŋkɔbigu gbaŋ ni, ka zaŋ li tam amaŋka dapuhi zuɣu.

¹¹“Bɛ lan zaŋm’ chinchin’ sabilitim pili salima sara maligu bimbin’ la, ka yɛrigi biŋkɔbigu gbaŋ pil’ li, ka zaŋ di dapuhi tu li.

¹²Bɛ lan zaŋm’ la’ shɛŋa zaa bɛ ni mali tumdi tuma Luɣ’ kasi shee la n-guri chinchin’ sabilitim ni, ka zaŋ biŋkɔbigu gbaŋ pil’ li n-zaŋ li niŋ amaŋka maa ni.

¹³Bɛ vaam’ tampiligim sara maligu bimbini zuɣu, ka zaŋ chinchin’ bɔribɔri pil’ li;

¹⁴ka zaŋ sara maligu bimbini maa zuɣu neen’ shɛŋa din nyɛ buɣim moori binyara mini gbabɔnima ni soobuya ni taha ni sara maligu bimbini maa zuɣu nɛma zaa pa di zuɣu, ka yɛrigi biŋkɔbigu gbaŋ pil’ li, ka zaŋ di dapuhi tu li.

¹⁵Bɛ yi ti yɛn yiɣisi chaŋ, ka Aduna min’ o bidibisi la zaŋ binyara pili Luɣ’ kasi shee la mini di nɛma zaa naai, di nyaaŋa Kɔhat daŋ niriba bɛn’ kpuɣim nɛma maa ʒi, amaa bɛ miri ka bɛ shihi neen’ shɛŋa din nyɛ kasi la, bɛ yi niŋ lala, bɛ ni kpi.” Kɔhat daŋ niriba maa ni yɛn ʒi Naawuni chirigibu shee suɣili maa neen’ shɛŋa m-bala.

¹⁶“Maligumaana Aduna bia Ɛliɛza n-yɛn su firila kpam mini tulaale zim ni sahakam sara maligu chi ni bɛ ni mali kpa’ shɛli boori bahiri niriba zuɣu ni la ni binshɛɣukam zaa din nyɛ Naawuni chirigibu shee suɣili maa dini zaŋ tabili binshɛɣukam zaa din be di puuni ni Luɣ’ kasi shee la mini di lahi fukumsi.”

¹⁷Di saha ka Yawɛ daa yɛli Musa mini Aduna,

¹⁸“Di chɛliya ka Kɔhat daŋ niriba la ti kpi Lɛvinim’ ni.

¹⁹Yi ni yɛn niŋ shɛm ka Kɔhat daŋ niriba la ti miri binshɛŋa din nyɛ kasi la, ka ku kpi m-bɔŋɔ: Aduna min’ o bidibisi la kpɛm’ ti wuhi bɛ zaa yinoyino o tuma bee o ʒili ni nyɛ shɛli,

²⁰amaa ka di chɛ ka Kɔhat daŋ niriba maa ti kpe nti lihi binshɛŋa din nyɛ kasi maa hal biɛla gba, di yi niŋ lala, bɛ ni kpi.”

²¹Ka Yawɛ daa yɛli Musa:

²²Kalim’ Gɛrishɔn gba zuliya kaman bɛ daŋ ni bɛ yaannim’ dunoya ni nyɛ shɛm.

²³Kalim’ bɛn zaa nyɛ yuun’ pihita zaŋ ti paai yuun’ pihinu ka bɛ zaa nyɛ bɛn ni tooi tum tuma Naawuni chirigibu shee suɣili la puuni.

²⁴Gɛrishɔn zuliya maa tuma nyɛla jɛmbu tuma mini ʒiʒibo.

²⁵Bɛna n-yɛn ʒiri Naawuni jɛmbu shee pateesanim’ mini Yawɛ chirigibu shee suɣili maa ni di bimpindigu ni biŋkɔbigu gbaŋ din yɛn pa di zuɣusaa la ni Yawɛ chirigibu shee suɣili maa dunol’ ni pateesa la.

²⁶Bɛna n-lan yɛn su dundɔŋ ni pateesanim’ mini pateesa shɛli din daa yili dundɔŋ din gili Naawuni jɛmbu shee dunoli ni sara maligu bimbin’ la ni di mihi ni neen’ shɛŋa zaa bɛ ni mali tumdi di tuma. Bɛ niŋm’ binyara maa zaa kaman di ni simdi ni bɛ niŋ li shɛm zaa.

²⁷Gɛrishɔn zuliya maa tuma zaa yɛn nyɛla Aduna min’ o bidibisi la ni zali shɛm zaŋ chaŋ bɛ ni yɛn ʒi shɛlikam mini bɛ ni yɛn niŋ shɛlikam polo; ka a wuhi ba bɛ ni yɛn su binshɛlikam zaa ʒibu fukumsi.

²⁸Gɛrishɔn zuliya maa tuma ni nyɛ shɛli Naawuni chirigibu shee suɣili maa ni m-bala. Maligumaana Aduna bia Itama n-yɛn gbib’ ba ka bɛ tumdi tuma.

²⁹Mɛrari zuliya la mi, kalim’ ba kaman bɛ daŋ mini bɛ yaannim’ dunoya ni nyɛ shɛm.

³⁰Kalim’ bɛn nyɛ yuun’ pihita zaŋ ti paai yuun’ pihinu, ka nyɛ bɛnkam zaa ni tooi tum tuma Naawuni chirigibu shee suɣili maa ni.

³¹Bɛ tuma zaa ni yɛn nyɛ shɛli Naawuni chirigibu shee suɣili maa ni nyɛla bɛ ʒiri Naawuni jɛmbu shee dasara mini di kuruwɔɣila ni daantalisi ni di binzahi

³²ni dundɔŋ din gil’ la pilanim’ mini di binzahi ni kpahi ni mihi ni di nɛma zaa ni di neen’ kparisi zaa; ka a boli sokam zaa yuli n-wuhi ba bɛ ni yɛn ʒi neen’ shɛŋa.

³³Mɛrari zuliya maa tuma zaa ni yɛn nyɛ shɛli m-bala. Maligumaana Aduna bia Itama n-yɛn gbib’ ba ka bɛ tumdi tuma.

³⁴Dinzuɣu ka Musa mini Aduna ni salo maa kpamba daa kali Kɔhatinima kaman bɛ daŋ niriba mini bɛ yaannim’ dunoya ni nyɛ shɛm,

³⁵bɛn nyɛ yuun’ pihita zaŋ ti paai yuun’ pihinu, ka nyɛ bɛn zaa ni tooi tum tuma Naawuni chirigibu shee suɣili maa ni.

³⁶Ka bɛ daŋ niriba ni daa nyɛ shɛm kalinli daa yiɣisi ninvuɣ’ tusaayi ni kɔbisiyopɔin ni pihinu.

³⁷Musa mini Aduna ni daa kali Kɔhat daŋ niriba bɛn zaa daa tumdi tuma Naawuni chirigibu shee suɣili maa ni kaman Yawɛ ni daa zali Musa shɛm kalinli n-daa bala.

³⁸Ka bɛ daa kali Gɛrishɔn zuliya kaman bɛ daŋ mini bɛ yaannim’ dunoya ni daa nyɛ shɛm,

³⁹bɛn nyɛ yuun’ pihita zaŋ ti paai yuun’ pihinu, ka nyɛ bɛn zaa ni tooi tum tuma Naawuni chirigibu shee suɣili maa ni.

⁴⁰Bɛ ni daa kali ba kaman bɛ daŋ mini bɛ yaannim’ dunoya ni daa nyɛ shɛm, bɛ kalinli daa yiɣisila ninvuɣ’ tusaayi ni kɔbisiyɔbu ni pihita.

⁴¹Musa mini Aduna ni daa kali Gɛrishɔn daŋ niriba ka bɛ nyɛ bɛn zaa daa tumdi tuma Naawuni chirigibu shee suɣili maa ni kaman Yawɛ ni daa zali ba shɛm kalinli n-daa bala.

⁴²Bɛ ni daa kali Mɛrari zuliya kaman bɛ daŋ mini bɛ yaannim’ dunoya ni daa nyɛ shɛm,

⁴³bɛn nyɛ yuun’ pihita zaŋ ti paai yuun’ pihinu, ka nyɛ bɛn zaa ni tooi tum tuma Naawuni chirigibu shee suɣili maa ni,

⁴⁴bɛ daŋ niriba maa kalinli daa yiɣisila ninvuɣ’ tusaata ni kɔbisiyi.

⁴⁵Bɛmbɔŋɔ n-nyɛ Mɛrari daŋ niriba shɛb’ Musa mini Aduna ni daa kali kaman Yawɛ ni daa zali Musa shɛm.

⁴⁶Bɛ ni daa kali Lɛvinim’ shɛb’ zaa bɛn nyɛ Musa mini Aduna ni Izraɛl kpamba ni daa kali kaman bɛ daŋ mini bɛ yaannim’ dunoya ni daa nyɛ shɛm,

⁴⁷bɛn nyɛ yuun’ pihitata zaŋ ti paai yuun’ pihinunu, ka nyɛ bɛn zaa ni tooi tum tuma ka ʒi Naawuni chirigibu shee suɣili maa ni ʒiya.

⁴⁸Bɛ ni daa kali bɛ ninvuɣ’ shɛb’ maa kalinli daa yiɣisila tusaanii ni kɔbisinu ni pihinii.

⁴⁹Yawɛ ni daa zali Musa shɛm zuɣu ka o daa zali sokam o ni yɛn tum tuun’ shɛli bee o ni yɛn ʒi ʒi’ shɛli. Lala ka o daa kali ba kaman Yawɛ ni daa zali ŋun’ Musa shɛm.