Read Dagbani Kalinlinima 5 Bible Online

Kalinlinima 5 - Dagbani bible

Kalinlinima 5

¹Ka Yawɛ daa yɛli Musa,

²“Yɛlim’ Izraɛlnim’ ni bɛ yihim’ niŋgbuŋ gbaŋ dɔr’ biɛɣu ni mali ninvuɣ’ shɛb’ mini mari ni yiri shɛb’ niŋgbuna ni ni ninvuɣ’ shɛb’ bɛn shihi kpima, ka lala chɛ ka bɛ leei bɛn bi be nyam bɛ sunsuuni.

³Yihim’ bɛn nyɛ dɔbba mini paɣiba zaa yi biɛhigu shee, ka bɛ ku ta bɛ biɛhigu shee din nyɛ n ni be bɛ sani luɣ’ shɛli maa daɣiri.”

⁴Ka Izraɛlnim’ daa shiri niŋ lala n-yihi ba bɛ biɛhigu maa shee. Yawɛ ni daa zali Musa shɛm maa, lala ka Izraɛlnim’ daa shiri niŋ.

⁵Ka Yawɛ daa yɛli Musa,

⁶“Yɛlim’ Izraɛlnima, doo bee paɣ’ yi bi ʒe Yawɛ yim ka tum o kpee taali, dilan’ maa leei ŋun tum alahichi.

⁷Di simdi ni dilan’ kahig’ o ni tum alahichi shɛli maa wuhi, ka yo o ni tum taal’ shɛli maa samli zaa, ka lan yo di pirigibu ʒiibunu yim zuɣu pahi n-zaŋ li ti o ni tum so taali maa.

⁸ Ka o ni tum so taali maa dɔɣiri so yi kani ka o ni zaŋ taali tumbu samli maa yo o, ŋun’ zaŋm’ li ti Yawɛ, ka bɛ zaŋ li ti maligumaana m-pahi piɛla’ so bɛ ni yɛn zaŋ mali sara ŋun tum taali maa zuɣu la.

⁹Izraɛlnim’ pin’ shɛŋa zaa din be kasi puuni bɛ ni zaŋ pin’ shɛlikam ti maligumaana, di nyɛla o dini.

¹⁰Sokam zaa pin’ shɛŋa din be kasi nyɛla o ni su shɛli, ka so yi zaŋ binshɛli na ti ti maligumaana, di nyɛla ŋun’ maligumaana maa dini.”

¹¹Yawɛ daa yɛli Musa,

¹²“Yɛlim’ Izraɛlnima, Do’ so paɣ’ yi birigi, ka bi ʒe yim zaŋ chaŋ o yidan’ sani,

¹³ka do’ so zaŋ o dɔni, ka paɣ’ maa niŋ zina, amaa ka o yidan’ bi baŋ, ka so mi bi di li shɛhira, bɛ ni bi gbaai paɣ’ maa di niŋbu ni maa zuɣu,

¹⁴nyuli yi kpe o yidan’ maa suhu ni ka o zab’ nyuli o paɣ’ maa ni tum daɣiri tuuni maa zuɣu bee o yi zab’ nyuli n-zilisi ni o paɣ’ maa tum daɣiri tuuni maa ka o mi bi tum li;

¹⁵dindina doo maa ŋun’ zaŋm’ o paɣ’ maa tahi maligumaana sani. Di simdi ni o bo di sara maligu na paɣ’ maa zuɣu, dina n-nyɛ: chi zim kilɔgiram yini na. O di booi kpam niŋ di ni, o mi di niŋ tulaale zim niŋ di ni, dama di nyɛla zilisigu chi sara maligu, chi sara maligu shɛli din ni chɛ ka bɛ teei taali tumbu yɛla.

¹⁶“Di nyaaŋa ka maligumaana maa zaŋ paɣ’ maa mirina ti zali Yawɛ tooni;

¹⁷ka booi kom din be kasi niŋ laa ni, ka tooi taŋkpaɣu din do Naawuni jɛmbu shee tiŋgban’ ni n-zaŋ li niŋ kom maa ni.

¹⁸Ka maligumaana maa zaŋ paɣ’ maa zali Yawɛ tooni ka lɔrigi paɣ’ maa zabiri, ka zaŋ nyuli zabbu chi sara din yɛn chɛ ka bɛ teei taali tumbu yɛla maa gbibili paɣ’ maa nuhi ni. Ka maligumaana maa mi kpuɣi kɔtɔɣu din tahiri tibidarigibo na la.

¹⁹Di saha ka maligumaana maa chɛ ka paɣ’ maa po pɔri, ka maligumaana maa yɛli, “Do’ so yi bi zaŋ a dɔni, ka a mi bi tum daɣiri tuun’ shɛli a ni be a yidan’ fukumsi ni saha shɛli ŋɔ, kɔtɔɣu ŋɔ ni yɛn tahi tibidarigibo shɛl’ na din’ di niŋ a shɛli.

²⁰Amaa a yi birigi n-chɛ ka do’ so zaŋ a dɔni, ka a ta amaŋ’ daɣiri a ni be a yidan’ fukumsi ni saha shɛli ŋɔ,

²¹di saha (maligumaana maa ŋun chɛ ka paɣ’ maa po tibidarigibo pɔri, ka o yɛli paɣ’ maa), Yawɛ chɛ ka a daŋ niriba yɛli noli ti a ka zaɣis’ a; ka chɛ ka a dɔɣibu soli ŋari, ka a leei paɣiŋoo.

²²Pumpɔŋɔ kom din tahiri tibidarigibo ŋɔ na ni kpe a pul’ nyɔri ni n-chɛ ka a dɔɣibu soli ŋari, ka a leei paɣiŋoo.” Ka paɣ’ maa ni garigi yɛli, “Ami Ami.”

²³Di nyaaŋa ka maligumaana maa sabi tibidarigibo maa yɛla niŋ litaafi ni m-paɣ’ li niŋ kɔtɔɣu maa ni

²⁴n-chɛ ka paɣ’ maa nyu kɔtɔɣu din tahiri tibidarigibo maa na. Ka ko’ shɛli din tahiri tibidarigibo maa na ni kpe paɣ’ maa ni n-ti o biɛrim pam.

²⁵Ka maligumaana maa deei nyuli zabbu sara chi zim maa paɣ’ maa nuu ni n-zaŋ li gahi zuɣusaa Yawɛ tooni, ka zaŋ li pa sara maligu bimbini zuɣu;

²⁶ka tooi chi zim maa nukurigu pali kaman di ni wuhi shɛm n-zaŋ li niŋ buɣim ni sara maligu bimbini maa zuɣu, di nyaaŋa ka o chɛ ka paɣ’ maa zaŋ kom maa nyu.

²⁷O yi chɛ ka paɣ’ maa nyu kom maa, di saha o yi nyɛla ŋun niŋ zina n-ta omaŋ’ daɣiri zaŋ chaŋ o yidan’ maa sani, ko’ shɛli din tahiri tibidarigibo maa na ni kpe paɣ’ maa ni n-ti o biɛrim pam, ka o dɔɣibu soli ŋari, ka o leei paɣiŋoo, ka lan leei o daŋ niriba noli ni di so.

²⁸Amaa paɣ’ maa yi bi tum daɣiri tuma, ka nyɛla ŋun ka taali, dindina di ku niŋ o shɛli, o ni tooi dɔɣi bihi.

²⁹Paɣ’ yi birigi n-tum daɣiri tuma saha shɛl’ o ni be o yidan’ sulinsi ni, ka o yidan’ maa zilis’ o

³⁰bee zilisigu yi kpe doo suhu ni zaŋ chaŋ o paɣ’ polo zaligu m-bɔŋɔ: o ni zaŋ paɣ’ maa ti zali Yawɛ tooni, ka maligumaana karim zaligu maa yɛla zaa bahi paɣ’ maa zuɣu.

³¹Ka doo maa yi taali ni, amaa ka paɣ’ maa ŋun’ taali ʒi o zuɣu.