Read Dagbani Kalinlinima 6 Bible Online

Kalinlinima 6 - Dagbani bible

Kalinlinima 6

¹Ka Yawɛ daa yɛli Musa, “Yɛlim’ Izraɛlnima,

²Doo bee paɣ’ yi ti po pɔri din nyɛ Nazari pɔri ni o wolig’ omaŋ’ ti Yawɛ,

³ ŋun’ woligim’ omaŋ’ ka chɛ wain mini binnyuri kpɛma, ka di nyu bɛ ni zaŋ wain tihi komihigu mali shɛli bee binnyuri kpeen’ shɛli, o mi di nyu wain tiwala kom bee n-di di zaɣ’ maha bee di zaɣ’ kuma.

⁴O ni yɛn wolig’ omaŋ’ dabisa shɛŋa maa zaa puuni, o miri ka o di wain tia binshɛlikam, hal o miri ka o di di biɛlim bee di paɣiri.

⁵“O ni yɛn nyɛ Nazari nir’ dabisa shɛŋa ŋɔ zaa puuni, o miri ka o pini o zuɣu hal ka o ni wolig’ omaŋ’ ti Yawɛ saha shɛli maa ti gari. Di simdi ka o be kasi, ka chɛ ka o zabiri zooi wɔɣawɔɣa.

⁶O ni wolig’ omaŋ’ ti Yawɛ dabisa shɛŋa maa zaa puuni, o di miri kpima.

⁷Hal o ba bee o ma bee o biɛli bee o tizɔpaɣa yi kpi gba, ŋun’ di saɣim omaŋa; dama o ni wolig’ omaŋ’ ti Naawuni maa yɛla bela o zuɣu ni.

⁸Dabisa shɛŋa puuni zaa o ni wolig’ omaŋ’ maa, o nyɛla ŋun be kasi Yawɛ sani.

⁹“Ka so yi do m-baɣ’ o ka ti kpi n-libig’ o, ka di chɛ ka o zuɣu din nyɛ o ni zaŋ shɛli ti Naawuni maa bi lan be kasi, dindina ŋun’ pinim’ o zuɣu maa o ni ti yɛn yi daɣiri ni dahin’ shɛli. O pinim’ li daba ayopɔin dali.

¹⁰O bom’ ŋman’ ʒiɛh’ ayi bee yiŋ’ ŋman’ bih’ ayi na nti ti maligumaana Naawuni chirigibu shee suɣili dunol’ ni daba anii dali,

¹¹ka maligumaana maa ti zaŋ ŋman’ yino mali sara alahichi zuɣu, ka zaŋ ŋun’ la mi mali sara shɛli bɛ ni zaŋdi nyɔri buɣim la, o ni shihi kpima n-tum alahichi shɛl’ la zuɣu. Ka o lan mal’ o zuɣu maa ka di be kasi dindali maa,

¹²ka wolig’ omaŋ’ ti Yawɛ o ni yɛn nyɛ Nazari nir’ dabisa shɛŋa puuni maa zaa, ka bo yuun’ yini piɛlaa na ti mali sara taali tumbu zuɣu; o ni daa pun niŋ shɛl’ la din kpalim la yoli, dama daɣiri ta o ni daa pun mal’ o zuɣu shɛli ka di be kasi la.

¹³“Nazari nir’ zaligu m-bɔŋɔ: saha shɛl’ o ni zaŋ wolig’ omaŋ’ maa tariga yi ti paai, bɛn’ zaŋm’ o na ti zali Naawuni chirigibu shee suɣili dunol’ ni,

¹⁴ka o zaŋ o pini ti Yawɛ. O bom’ yuun’ yini piɛlaa ŋun ka galimi, ka bɛ zaŋ o mali sara shɛli bɛ ni zaŋdi nyɔri buɣim la, ka bo yuun’ yini piɛnyaŋ ŋun ka galimi, ka bɛ zaŋ o mali sara alahichi zuɣu, ka o lan bo piɛlaa ŋun ka galimi, ka bɛ zaŋ o mali suhudoo sara.

¹⁵O lan bom’ bɔrɔbɔro din ka dabindi piɛɣu pali mini bɛ ni zaŋ kpam ŋmiri zim viɛlli shɛli maha ni karikaasi din ka dabindi, ka nyɛ bɛ ni niŋ kpam pa shɛli zuɣu ni chi sara, ni binnyura sara.

¹⁶“Ka maligumaana zaŋ li ti Yawɛ, ka mali Nazari nir’ maa daalahichi sara mini bɛ ni zaŋdi sara shɛli nyɔri buɣim la.

¹⁷Ka zaŋ piɛlaa la mini bɔrɔbɔro din ka dabindi piɛɣu pal’ la m-mali biɛrisuŋ sara Yawɛ sani; ka maligumaana maa lan mali chi sara mini binnyura sara din pahi la.

¹⁸Di nyaaŋa ka Nazari nir’ maa pini o zuɣu din nyɛ o ni zaŋ shɛli ti Naawuni maa Naawuni chirigibu shee suɣili dunol’ ni, ka zaŋ o zuɣu din nyɛ o ni zaŋ shɛli ti Naawuni maa zabiri maa niŋ biɛrisuŋ sara maligu la buɣim ni.

¹⁹“Bɛ yi duɣi nimdi maa, Maligumaana ŋun’ yihim’ piɛ’ bɔɣu, ka pii maha din ka dabindi la zaɣ’ yini piɛɣu ni, ka pii karikaasi din ka dabindi la zaɣ’ yini n-zaŋ li niŋ Nazari nir’ maa nuhi ni o ni zaŋ o zuɣu shɛli ti Naawuni maa zabiri pinibu nyaaŋa.

²⁰Di saha ka maligumaana maa zaŋ li gahi zuɣusaa, di nyɛla sara maligu shɛli bɛ ni mali gahiri zuɣusaa Yawɛ tooni. Lala bina maa nyɛla din be kasi ka nyɛ maligumaana dihili m-pahi piɛ’ nyɔɣu shɛli bɛ ni zaŋ gahi zuɣusaa la mini gbalipaɣ’ shɛli bɛ ni zaŋ mali maligu la. Di nyaaŋa Nazari nir’ maa ni tooi nyu wain.

²¹ “Nazari nir’ ŋun po pɔri zaligu m-bɔŋɔ. Nazari nir’ ni yɛn zaŋ sara shɛli ti Yawɛ simdi ka di dolila o pɔri ni nyɛ shɛm, ka di be di ko ka chɛ o ni ni tooi nyaŋ shɛli ka di dol’ o ni wolig’ omaŋ’ ti Naawuni la zaligu ni wuhi shɛm.”

²²Ka Yawɛ daa yɛli Musa,

²³“Yɛlim’ Aduna min’ o bidibisi, ŋ-ŋɔ ka yi yɛn suhiri alibarika niŋdi Izraɛlnim’ ni: yɛlimiya ba,

²⁴‘Yawɛ niŋm’ alibarika niŋ yi ni ka gbib’ ya;

²⁵Yawɛ zaŋm’ o nina lihi ya, ka niŋ ya nirilim.

²⁶Yawɛ neem’ o nina lihi ya ka tin ya suhudoo.’

²⁷“Lala ka bɛ ni zaŋ n yuli suhi alibarika niŋ Izraɛlnim’ ni, ka n niŋ alibarika niŋ bɛ ni.”