Read Dagbani Maika 2 Bible Online

Maika 2 - Dagbani bible

Maika 2

¹Mbusim be ninvuɣ’ shɛb’ bɛn do bɛ bindɔhi zuɣu n-lɔri ninvuɣ’ biɛtali mini tuumbiɛri tumbu nia zuɣu. Biɛɣu yi ti neera, bɛ tumdila tuumbiɛri maa, dama bɛ mali di tumbu yiko.

²Bɛ suhuri yɛla niriba puri zuɣu, ka bɛ far’ li, ka ye niriba yinsi zuɣu, ka bɛ far’ li. Bɛ nahim yililana n-tabil’ o yiŋnima, ka nahim niriba n-tabili bɛ fali.

³Dinzuɣu Yawɛ ni yɛli shɛm m-bɔŋɔ, “Nyamiya, n lɔrila nia ni n chɛ ka zaɣ’ biɛɣu lu yi daŋ’ ŋɔ niriba zuɣu, ka yi ku tooi yi di ni, ka yi mi ku lan tooi chaŋ karimbaan’ chandi, dama di ti yɛn nyɛla zaɣ’ biɛɣu saha.

⁴Dindali maa, bɛ ni ti yili yila mali ya ansarisi, ka kum ni fabila pam yɛli, ‘Ti bahi yoli zaa, Yawɛ taɣi n niriba fali ti shɛba. O deei li n sani. O piripiri ti puri tari bɛn gbahi ti maa.’ ”

⁵Dinzuɣu yi ti ku mali ninvuɣ’ so ŋun ni pihi kuɣa sɔŋ lihi nya yi tintariga bɔbili ni nyɛ shɛli Yawɛ niriba sunsuuni.

⁶Bɛ yihiri waazu yɛra ma, “Di yihiri waazu. Di yihiri waazu yɛri binyara ŋɔ yɛla; vi ku di ti.”

⁷Yaakubu zuliya, di luhiya ni yi yɛl’ lala? Yawɛ suɣilo maa naami? O niŋsim m-bala? N yɛtɔɣa bi niŋdi ninvuɣ’ so ŋun tumdi tuun’ suma zaɣ’ viɛlli?

⁸Amaa yinim’ yiɣisimi lu n niriba zuɣu kaman yi dimnim’ la. Yi darigi fuɣi suhudoolan’ binyɛrigu, ka darigi fuɣi ninvuɣ’ shɛb’ bɛn garita ka bi lan tɛhiri tɔbu tuhibu yɛla binyɛra.

⁹Yi yihi n niriba paɣiba bɛ yiya din viɛl’ ni, ka yihi n daalibarika bɛ bihi ni sahakam.

¹⁰Yiɣisimiya chaŋ, dama kpe pala vuhim shee, daɣ’ shɛli din tahiri saɣiŋgu na ni tahi saɣiŋgu shɛli din bie na zuɣu.

¹¹To, ninvuɣ’ so yi zaŋ ʒiri yɛtɔɣa din ka buchi chani gindi yɛra, “N ni yihi ya waazu din wuhiri ni wain mini binnyuri kpɛma pam nyubu viɛla,” ŋuna ka yi ni bɔri ni o nyɛ yi waazuyihira.

¹²Amaa biɛhiŋ kani, n ni laɣim yinim’ Izraɛlnim’ bɛn kpalim ŋɔ zaa na kaman piɛri bɛn yi mɔɣu ni na ni bɛ ti kpe buzɔŋ ni la. Niriba ni ti lan pali yi tiŋgbɔŋ ŋɔ ni kaman biŋkɔbbaligu ni be mɔri ŋubbu shee shɛm la.

¹³Naawuni ni mali soli ti ba, ka yihi ba dabitim ni. Bɛ ni ti kabi dunɔdali n-dol’ li gari yi. Bɛ naa ŋun nyɛ Yawɛ ŋɔ maŋmaŋa ni ti gari tooni n-zaŋ ba chaŋ.