Read Dagbani Maika 4 Bible Online

Maika 4 - Dagbani bible

Maika 4

¹Dabisa kanna, ka bɛ ni ti duhi Yawɛ jɛmbu duu zoli ŋɔ ka di du n-gari zoya zaa, ka du n-gari daboya. Ka niriba ti daai ka di gbinna.

²Ka zuliya bɔbili ti kana ti yɛli, “Kamiyana ka ti du Yawɛ zoli zuɣu n-chaŋ Yaakubu Naawuni jɛmbu duu, ka o ti wuhi ti o soya, ka ti dol’ o soya maa.” Dama wuhibu ni ti yi Ziɔn na, ka Yawɛ yɛligu yi Jɛrusalɛm na.

³ O ni ti mali niriba pam yɛla. O ni ti mali zuliya shɛb’ bɛn mali yaa ka be katinsi yɛla; ka bɛ ti zaŋ bɛ takɔbiri kuri kubiɛlima, ka zaŋ bɛ kpana kuri gɔriti. Zuliya shɛb’ ti ku lan zaŋ takɔbiri tuhiri zuliya shɛb’ yaha. Bɛ mi ti ku lan bɔhim tɔbu tuhibu yaha.

⁴ Amaa sokam ni ti ʒila o wain tia bee o fiig tia gbini, ka so ti ku lan kpɛhi ba dabiɛm yaha. Dama Yawɛ ŋun nyɛ Tɔbbihi Naa ŋɔ n-yaag’ o noli yɛli lala maa.

⁵Dama zuliya kam jɛmdila bɛ wuna, amaa tinim’ ni jɛmla Yawɛ ŋun nyɛ ti Naawuni ŋɔ sahakam.

⁶Yawɛ yɛliya, “Dindali maa n ni ti laɣim gbariti, ka laɣim n ni daa kari ninvuɣ’ shɛb’ bahi la mini n ni darigi ninvuɣ’ shɛb’ tibili la.

⁷N ni ti chɛ ka gbariti maa leei ninvuɣ’ shɛb’ bɛn kpalim; ka bɛ ni daa kari ninvuɣ’ shɛb’ bahi la ti leei zuliya shɛli din mali yaa, ka Yawɛ ti su ba Ziɔn Zoli zuɣu sahakam.”

⁸Ka nyini Ziɔn Zoli, din nyɛ luɣ’ shɛli Naawuni ni be kaman piɛgula n-lihiri o niriba ŋɔ, a ni ti lan nya nam shɛli a ni daa pun su la.

⁹Bɔzuɣu ka a kumdi pampam? A lan kala naa? A saawaranim’ kpimi, ka biɛrim mal’ a kaman paɣ’ ni yɛn dɔɣi ka biɛrim shɛli mal’ o la?

¹⁰Nyin’ Ziɔn bipuɣiŋga, ŋmɛlim’ amaŋ’ ka ŋuhimi kaman paɣ’ ŋun wolisira, dama pumpɔŋɔ a ni yi fɔntiŋ’ ŋɔ ni chaŋ ti be mɔɣu ni. Ka di nyaaŋa, a ni ti kuli Babilɔn. Nimaani ka a ni ti nya faako. Nimaani ka Yawɛ ni ti tilig’ a a dimnim’ nuu ni.

¹¹Pumpɔŋɔ zuliya bɔbili laɣimla taba ni bɛ lir’ a ka yɛra, “Chɛliya ka ti ta o daɣiri, chɛliya ka ti mooi ti nini bahi Ziɔn zuɣu.”

¹²Amaa bɛ bi mi Yawɛ tɛha ni nyɛ shɛm, bɛ bi mi o ni lo nia shɛli, bɛ mi bi mi ni o laɣim ba mi kaman kabɔba ka bɛ lo n-sɔŋ kabɔɣili ni la.

¹³Ziɔn bipuɣiŋga, yiɣisima m-bu ba kaman chi la, dama n ni chɛ ka a yiligu leei kurigu, ka chɛ ka a takarifiɛma leei daanya, ka a ti bu n-chɛrisi niriba pam, ka zaŋ bɛ nyamma ti Yawɛ, ka zaŋ bɛ daazichi ti dunia zaa Duuma.