Read Dagbani Maika 5 Bible Online

Maika 5 - Dagbani bible

Maika 5

¹Pumpɔŋɔ bɛ me gooni gili ya, ka teei gili ya. Bɛ zaŋ jaaŋgbee fiɛbi Izraɛl naa tapaɣa.

² Amaa nyini Bɛtilihɛm din be Ɛfirata, ka nyɛ tin’ shɛli din pɔri Juda tinsi puuni ŋɔ, a ni ka n ninvuɣ’ so ŋun ni su Izraɛl tiŋgbɔŋ ŋɔ ni ti yina. O piligu yila kurimbuni na.

³Dinzuɣu Naawuni ni ti chɛ o niriba bahi hal ka paɣ’ so ŋun wolisiri ni o dɔɣi maa ti dɔɣi. Di saha Izraɛlnim’ bɛn na kpalim be dabitim ni la ni ti labi bɛ mabihi sanna.

⁴O ni ti zani n-dih’ o biŋkɔbbaligu Yawɛ yiko ni, ka ni ti zani Yawɛ ŋun nyɛ o Naawuni ŋɔ yuli jilima ni. Ka bɛ ti be ni alaafee, dama pumpɔŋɔ o ni nyɛla ninvuɣ’ titali dunia ŋɔ luɣilikam zaa.

⁵O ni ti nyɛla suhudoolana. Asirianim’ yi ti ka ti tiŋgbɔŋ ŋɔ ni na ti liri ti, ti ni chɛ ka piɛguliba ayopɔin mini niriba anii shɛb’ ti ni zaŋ leei nanima la lu bɛ zuɣu.

⁶ Bɛna n-ni ti zaŋ takɔbi su Asiria tiŋgbɔŋ, ka lan zaŋ takɔbi su Nimrɔd tiŋgbɔŋ; ka Asirianim’ yi ti ka ti tiŋgbɔŋ ŋɔ ni na ti be ti tintarisi bɛ ni fa ti bahi.

⁷Ka Yaakubu zuliya ninvuɣ’ shɛb’ bɛn kpalim ni ti be zuliya pam sunsuuni kaman maligim n-yi Yawɛ sanna la. Bɛ ni ti ŋmanila saa ŋun miri bahiri mɔri zuɣu ka di baɣa ka niriba ni bee n-lihiri daadam ninni la.

⁸Yaakubu zuliya ninvuɣ’ shɛb’ bɛn ti kpalim ka zuliya pam gili ba ni ti bemi kaman gbuɣinli m-be mɔɣu ni biŋkɔbiri san’ la. Bɛ ni ti bemi kaman gbuɣin’ polli n-yi piɛri zuɣu n-tim bɛ ni n-no ba sɔŋ ka dari tɔhi ba, ka so kani ŋun ni fa ba bahi la.

⁹Bɛ ni ti lu bɛ dimnim’ zuɣu n-ku bɛ dimnim’ maa zaa.

¹⁰Yawɛ yɛliya, “Dindali maa n ni ti ku yi yuri, ka saɣim yi chɛchɛbunsi.

¹¹N ni ti wurim yi fɔntinsi din be yi tiŋgbɔŋ maa ni, ka daai yi kpiɔŋ ni be luɣ’ shɛŋa zaa luhi.

¹²N ni ti yihi bukpahigu yi kɔbili ni, ka baɣisi ti ku lan beni.

¹³N ni ti saɣim yi binnana la mini yi binwɔɣila din be yi san’ la, ka yi ku lan jɛm yi ni zaŋ yi nuhi mali binshɛŋa.

¹⁴N ni ti vuɣi Ashɛra binwɔɣila la yi sani, ka wurim yi fɔntinsi.

¹⁵N suhuyiɣisili pam puuni n ni ti bɔhi zuliya shɛb’ bɛn bi deei n noli biɛri.