Read Dagbani Maika 7 Bible Online

Maika 7 - Dagbani bible

Maika 7

¹N nya mbusim, n ŋmanila ninvuɣ’ so kum ni mali ka o bi nya tiwalli bee wain tiwala dira. Dama bɛ pun pɔhi wain tiwala mini fiig tiwala zaa.

²Ninvuɣ’ shɛb’ bɛn ʒe yim yi yi tiŋgbɔŋ maa ni, ka ninvuɣ’ maŋli lan kani. Bɛ zaa domi gu ni bɛ ku niriba, ka zaŋ lansi gbahiri taba.

³Bɛ nuhi mi tuumbiɛri tumbu pam; kpambaliba mini bɛ sariakaritiba diri birapu. Yikolaannim’ zaŋdi bɛ suhuyubu zaana, ka lala chɛ ka bɛ naari noli lɔri nia biɛri.

⁴Bɛ ni ninvuɣ’ suŋ ŋmanila suligunyinyaɣu, ka bɛ ni ninvuɣ’ maŋli mi ŋmanila bɛ ni zaŋ gɔ’ shɛŋa sa n-gili. Bɛ tibidarigibo dabisili la biɛɣu neeya, anabinim’ bɛn ŋmani tiŋguliba ni daa pun yɛli ba dabisi’ shɛli yɛla la. Pumpɔŋɔ bɛ birimbu saha paaya.

⁵Di niŋ a zo yɛda, a mi di niŋ a ni yuri so naani. Gbaam’ a noli yɛtɔɣa zaŋ chaŋ paɣa so ŋun do m-baɣa sani.

⁶ Dama bidibiga lihi ʒiɛm o ba, ka bipuɣiŋga yiɣisi lu o ma zuɣu. Ka paɣa yiɣisi lu o yidan’ ma zuɣu. Ka nir’ dimnim’ ni nyɛla omaŋmaŋ’ yiŋnima.

⁷Amaa man’ kul ni lihirila Yawɛ. N ni guhirila Naawuni ŋun nyɛ n tiligir’ ŋɔ. N Naawuni ni wum n suhigu.

⁸N dima, di chɛ ka a suhu piɛla n lubu zuɣu; dama n ni lan yiɣisi. N yi ʒini zibisim ni, Yawɛ n-yɛn nyɛ n neesim.

⁹N ni tum alahichi Yawɛ sani zuɣu, n ni deeg’ o suhuyiɣisili hal ka o ti lan zani n nyaaŋa n-kari ma saria, ka ti ma yɛlimaŋli. O ni zaŋ ma yihi neesim ni ka n ti nya o wuntitali ni nyɛ shɛm.

¹⁰Di saha n dima ni ti nya li, ka vi ti gbaai ninvuɣ’ so ŋun bɔhiri ma, “Yawɛ ŋun nyɛ a Naawuni la lee bela ya?” N nini ni ti nya o lubu, ka bɛ ti no o sɔŋ kaman palli zuɣu baɣiri la.

¹¹Yi goma mɛbu dabisili kanna. Dindali maa yi tintarisi ni ti yɛligi pam pahi.

¹²Dindali maa niriba ni ti yi Asiria zaŋ hal ni Ijipti tinsi ni n-ka yi sanna, ka shɛb’ mi yi Ijipti zaŋ hal ni Yufretiiz Mɔɣili ni na, ka shɛb’ yi teeku shɛl’ ni zaŋ ti kpa teeku shɛl’ ni na, ka shɛb’ mi yi zo’ shɛli gbini zaŋ ti kpa zo’ shɛli gbini na.

¹³Amaa dunia ŋɔ ni ti leei tiŋgban’ nɛli ninvuɣ’ shɛb’ bɛn be di ni tuumbiɛri tumbu zuɣu.

¹⁴N Duuma, gul’ a ni pii a ninvuɣ’ shɛba ŋɔ kaman piɛgul’ ni gul’ o piɛri shɛm la. Hal bɛ ni kul be tiŋgban’ nɛli ni maa zaa yoli, tiŋgban’ shɛli din mali atam gili ba mi. Chɛ ka bɛ diri Bashan mini Giliad bindira kaman bɛ ni daa yi pun diri li shɛm kurimbuni ha la.

¹⁵Yawɛ yɛliya, “N ni ti chɛ ka yi nya alahiziba binyara kaman yi ni daa yi Ijipti na, ka n chɛ ka yi nya li shɛm la.”

¹⁶Zuliya shɛb’ ni ti nya ka vi gbahi ba ka bɛ yaa zaa naai, ka bɛ zaŋ bɛ nuhi tabi bɛ noya, ka bɛ tiba ti kpiri.

¹⁷Bɛ ni ti leeni taŋkpaɣu kaman wahu la bee kaman tiŋgban’ ni biŋgbamda la. Bɛ ni ti yi bɛ kpiɔŋ ni be luɣ’ shɛŋa na ka bɛ niŋgbuna sɔhira, ka bɛ ti ŋmaligi ka Yawɛ ŋun nyɛ ti Naawuni ŋɔ sanna ni dabiɛm pam. Bɛ ni ti zɔr’ a dabiɛm.

¹⁸Ŋuni n-lee nyɛ Naawuni ŋ-ŋman’ a, ka nyɛ ŋun chɛr’ o niriba bɛn kpalim taali, ka bi lan doli bɛ biriginsim tuma? A suhu yi yiɣisi, di lan maara; dama a yuri nambɔzɔbo.

¹⁹A mi ni lan zo ti nambɔɣu, a ni zaŋ ti daalahichi sɔŋ a naba ni no li. A ni zaŋ ti daalahichi zaa bahi teeku bulli ni.

²⁰A ni wuhi Yaakubu ʒiɛyimtali, ka wuhi Ibrahimma ʒiɛyimtali din bi taɣira kaman a ni daa po pɔri yɛli ti yaannim’ shɛm kurimbuni ha la.