Read Dagbani Nahum 3 Bible Online

Nahum 3 - Dagbani bible

Nahum 3

¹Mbusim be tin’ shɛli nim’ bɛn kuri niriba ŋɔ zuɣu, yɔhiŋgu mini faɣiri dibu kul palila di ni, ka nɛma ʒiɛbu ku naai.

²Fiɛbisi vuri mini chɛchɛbunsi kalima vuri. Yuri balisira, ka chɛchɛbunsi yiɣiri tɔra!

³Wɔribariba niŋdi shili, ka takɔbi chɛri piɣibpiɣib, ka kpana nyaɣisira. Ka bɛ ku niriba pam, n-zaŋ ba sɔŋ duyaduya. Kpiimba maa ka tariga, ka bɛ tuuri kpiimba maa.

⁴Ninive yɛla ŋɔ zaa ŋmanila pagɔr’ tuma din nyɛ kɔre kpɛhibu din ka kalinli; di ŋmanila paɣ’ timalana ŋun zaŋ kɔre kpɛhibu gbahi zuliya pam, ka zaŋ o tima maa yɔhim niriba pam la.

⁵Yawɛ ŋun nyɛ Tɔbbihi Naa ŋɔ yɛliya, “M bi ʒe a nyaaŋa, n ni wuɣ’ a mukuru pa a ninni, ka chɛ ka zuliya kam nya a zaɣim, ka nanim’ nya a ni di vi shɛm.

⁶N ni zaŋ daɣiri lab’ a, ka dih’ a vi, ka chɛ ka niriba lih’ a ka mal’ a ansarisi.

⁷Ka ŋunkam ti nya a ni tirisi labi nyaaŋa ka chɛ a ka yɛli, ‘Ninive bahi yoli, ŋuni n-lee yɛn fabili di zuɣu? Ya polo ka n lee yɛn nya bɛn ni maag’ a suhu ti a?’ ”

⁸A tɛhiya ni a so Tɛbis din baɣi Nail ka kom gil’ li, ka teeku nyɛ din taɣiri li ka kom nyɛ di gooni la?

⁹Itiɔpianim’[2] mini Ijiptinima n-daa yi nyɛ o yaa, ka di mi daa ka tariga. Putinim’ mini Libianim’ n-daa nyɛ bɛn sɔŋd’ o.

¹⁰Amaa bɛ daa gbaag’ o chaŋ ka o leei dabili, ka ŋme n-chɛrisi o biliɛri sɔŋ solɔɣu kam zuɣu. Bɛ daa to tɛte o ninvuɣ’ zuɣuri zuɣu, ka zaŋ bandi ba o kpambaliba.

¹¹A gba ni ti nyu dam kuli, a ni ti zo n-sɔɣi. A ni ti bɔri sɔɣisili shee a dim’ sani.

¹²A ni me goonda’ shɛŋa gil’ a tinsi zaa ŋmanila fiig tiwal’ daŋda din mooi. Bɛ yi kul gbaɣiri li, di lurila ŋun yɛn di li nol’ ni.

¹³Nyama, a tɔbbihi zaa ŋmanila paɣiba. A tiŋgbani maa dunɔdaya yɔhimi ti a dimnima. Ka buɣim di a dunɔdaya dapuhi.

¹⁴Ŋɔŋmiya kom m-mali shili gu bɛn yɛn teei gili ya. Pahimiya yi birininim’ yaa. Nomiya yaɣiri, nomiya tandi, ka zaŋya bilichiisi ŋmarigu niŋ yi nuu ni.

¹⁵Buɣim ni ti din ya nimaani, ka bɛ ti zaŋ takɔbi ŋmahi ya. Di ni ti din ya kaman toli la. Nabimiya kaman toli la, ka nabiya kaman sakɔri la.

¹⁶Yi chɛ ka yi kɔhigɔriba galisi gari saŋmarisi bɛn be zuɣusaa ŋɔ. Toliga fuɣisiya ka yiɣi chaŋ.

¹⁷A tiŋguliba ŋmanila sakɔri, ka a zaligubaŋdiba ŋmani toli bɛn galisi ni yi tabili gariche di ni maha pam dahin’ shɛli, ka wuntaŋ’ ti nyee, ka bɛ yiɣi chaŋ, ka so bi mi bɛ ni chaŋ luɣ’ shɛl’ la.

¹⁸Nyin’ Asiria naa, a piɛguliba gbihiya. A ninvuɣ’ zuɣuri ʒeei gom. A niriba wurimya be zoya zuɣu, ka so kani ŋun ni laɣim ba.

¹⁹ A daŋ maa nyɛla din ni ku nira, ka binshɛli din maari biɛrim mi kani. Bɛnkam zaa wum a yɛla, bɛ kpahirila bɛ nuhi. Dama bɛ ni ŋuni ka a lee bi niŋ a ninkuunsi din ka naabu ŋɔ?