Read Dagbani Habakuk 2 Bible Online

Habakuk 2 - Dagbani bible

Habakuk 2

¹“N ni zani n ni guli luɣ’ shɛli polo, ka tam n gooni zuɣu lihiri nya o ni yɛn yɛli ma shɛm min’ o ni yɛn garigi shɛm zaŋ chaŋ n fabila polo.”

²Di saha ka Yawɛ daa garigi yɛli ma, “Sabimi a ni nya ʒii shɛli maa ka chɛ ka di yi zahira pa kuɣiparilana zuɣu, ka ŋun guura ni tooi karim li.[2]”

³ Dama ʒii maa saha na kparimi. Di yɛrila naabu saha yɛla, ka bi ŋmari ʒiri. Di yi ŋmanila di bi niŋdi yomyom, nyin’ kul guhim li. Biɛhiŋ kani, di ni niŋ, di ku yuui.

⁴ Nyama, karimbaannima! Bɛ suhuri ni tɛha bi tuhi, amaa wuntizɔriba ni bela bɛ yɛda niŋbu zuɣu.

⁵Din pahi nyɛla, buni nyɛla din yɔhindi nira. Karimbaannim’ ku be. Bɛ yɛla bɛ lɔna kaman kpiimba biɛhigu shee la. Bɛ ŋmanila kum, bɛ bi tiɣira. Bɛ laɣim zuliya kam leei bɛ niriba, bɛ zaŋ niriba zaa lee bɛmaŋmaŋ’ niriba.

⁶Sokam ni mali niriba ŋɔ ansarisi, ka salindi salima maani ba ansarisi yɛra, “Mbusim be yinim’ bɛn laɣisi binshɛŋa din pa yi dini duhi ŋɔ zuɣu. Yi yɛn deeri binyara yi sandiriba sani sɔŋdi yi sani hal ti paai bɔ saha?”

⁷Yi bi mi ni yi sandiriba maa ni ti yiɣisi libigi ya, ka bɛn ni chɛ ka yi ni sɔhigi yiɣisi? Di saha ka yi leei bɛ ni yɛn ʒe ninvuɣ’ shɛba.

⁸Yi ni daa ŋme n-nyaŋ zuliya pam ka di bɛ nɛma la zuɣu, bɛ ni ninvuɣ’ shɛb’ bɛn kpalim gba ni ti ŋmɛn ya ka di yi nɛma, yi ni daa ku ninvuɣ’ shɛb’ mini yi ni daa chɛ ka damli shɛli dam dunia ni fɔntinsi ni n-tabili bɛnkam zaa be di ni la zuɣu.

⁹Mbusim be yinim’ bɛn doli zaɣ’ biɛɣu tumbu soli bo buni niŋ yi yinsi, ka te yi tɛri luɣ’ shɛŋa din du pam shee ni barina di paai ya ŋɔ zuɣu.

¹⁰Yi daa ku niriba pam bo vi niŋ yi yiŋa. Yi kɔŋ yi nyɛviya.

¹¹Kuɣ’ shɛŋa din be dukpina ni ni kuhi bahi ya na, ka dapua din be dari ni garigi saɣi.

¹²Mbusim be yinim’ bɛn ku niriba me tiŋ’ zali, ka tum tuumbiɛri zali fɔntiŋ’ ŋɔ zuɣu.

¹³Pa Yawɛ ŋun nyɛ Tɔbbihi Naa ŋɔ n-chɛ ka niriba tumdi tuma ka buɣim diri li, ka niriba diri wahala yol’ la?

¹⁴ Amaa Yawɛ jilima baŋsim ni ti pali dunia ŋɔ kaman kom ni pali teeku shɛm la.

¹⁵Mbusim be yinim’ bɛn chɛ ka yi ʒiʒiinitab’ nyuri yi suhuyiɣisili dam, ka yi kul boori yi lɔɣu pahiri hal ka bɛ ti nyu m-buɣi ni di chɛ ka yi nya bɛ zaɣim la zuɣu.

¹⁶Yi ni di vi pam, ka pa ni jilima. Yimaŋmaŋ’ gba nyumiya ka chani ʒiɛhira. Yawɛ nudirigu ni pipia la ni paai ya, ka yi jilima ti leei vi.

¹⁷Yi ni daa niŋ Lɛbanɔn zaɣ’ biɛ’ shɛl’ la ni labi lu yi zuɣu. Biŋkɔbiri kubu la ni gbaai ya dabiɛm, yi ni daa ku ninsalinima mini yi ni daa tahi damli shɛli na dunia ni ni tinsi ni ni bɛnkam be di ni la zuɣu.

¹⁸Binnani bukaata lee nyɛ dini? Ŋun mal’ li maa ni kul mal’ li shɛm ka di yɛn be, di nyɛla bɛ ni dooi bini mali binnan’ shɛli, di nyɛla ʒiri karimba. Dama ŋun mal’ li maa niŋ o ni mali binshɛli maa naani hal o ni mali binshɛli maa ni nyɛ binnani din ku tooi tɔɣisi yɛtɔɣa maa zaa yoli.

¹⁹Mbusim be yinim’ bɛn yɛri dari, “Neemiya gom ni!” Bee n-yɛri kuɣili din fo n-doya, “Yiɣisim’ zan’ a tolitoli!” ŋɔ zuɣu. Di ni tooi wuhi so binshɛli? Nyama, salima mini anzinfa ka bɛ zaŋ mal’ li, ka di bi vuhiri hal baabiɛla.

²⁰Amaa Yawɛ bela o jɛmbu duu din be kasi puuni, chɛliya ka dunianim’ zaa fo o tooni.