Read Dagbani Habakuk 3 Bible Online

Habakuk 3 - Dagbani bible

Habakuk 3

¹Anabi Habakuk wunsuhigu. Di dolila Shigiɔnɔt[3] ni nyɛ shɛm.

²“Yawɛ, n wum a yuli ni du shɛm yɛla. Yawɛ, ka a tuma chɛ ka dabiɛm gbaai ma. Tummi li ti ʒiɛmani ŋɔ ni yaha, ka chɛ ka ti baŋ li ti ʒiɛmani ŋɔ ni; a suhuyiɣisili saha, teemi nambɔzɔbo yɛla.

³Naawuni yila Tɛman na. Naawuni ŋun be kasi ŋɔ yila Paran Zoli zuɣu na. Ka o jilima pili zuɣusaa. Ka o paɣibu pali dunia zaa.

⁴O neesim bemi kaman wuntaŋa, ka neesim bɔba yiri o nuhi ni na, nimaani ka o yiko sɔɣiya.

⁵O daa chɛ ka dɔro be o tooni chana, ka alɔbo doli nyaaŋa.

⁶Ka o daa zani, ka dunia dam. Ka o daa lihi, ka niriba ni sɔhira. Ka kurimbuni ha zoya la wurim, ka o kurimbuni ha daboya din nyɛ o so’ kurisi la firi.

⁷N nya ka Kushan suɣa be muɣisigu ni, ka nya ka Midian tiŋgbɔŋ suɣa pateesanim’ sɔhira.

⁸Yawɛ, mɔɣa zuɣu ka a suhu daa yiɣisi bahi la bee kulibɔna zuɣu ka a suhu daa yiɣisi bahi bee teeku zuɣu ka a suhu daa yiɣisi bahi saha shɛli a ni daa kpe a nasara dibu chɛchɛbuŋ’ lɔɣu ni ka yuri vɔri li la?

⁹A guri a tɔbu, ka zali zaligu, ka piɛma pani di zuɣu. A zaŋ mɔɣa bɔɣi tiŋgbani.

¹⁰Zoya daa nya a ka sɔhigi. Kopaliga daa ŋme n-gari, ka teeku bulli duhi di kukoli. Wuntaŋ’ duhi di nuhi zuɣusaa,

¹¹ka goli daa kpalim zani di jilima shee; a piɛma neesim din daa gariti yomyom la min’ a kpani din daa nyaɣisira la zuɣu.

¹²A suhuyiɣisili puuni ka a daa no tiŋgbani. A sujee puuni ka a daa du n-tam zuliya shɛb’ zuɣu no ba.

¹³A daa yina ni a ti tilig’ a niriba, ka daa yina ni a ti tilig’ a ninvuɣ’ gahindili. Nyini n-ŋme wurim ninvuɣ’ biɛɣu yili, ka wurim di mɔpilli hal ti tabili di tanzaa.

¹⁴Nyini n-daa zaŋ omaŋmaŋ’ piɛma to o tɔbbihi zuɣulana, bɛn daa kana kaman pɔhimʒiɛpiliŋga ni bɛ ti wurim ti, ka bɛ pulaantali be kaman bɛn mali shili ni bɛ ku tarimba bɛn sɔɣi la.

¹⁵Nyini n-zaŋ a yuri siɣi teeku ni, ka fuɣifuɣi pani di ko’ titali zuɣu.

¹⁶Ka n daa wum di yɛla, ka n ni sɔhira, ka n naŋgbampiba ŋmɛri tab’ di vuri zuɣu, ka n kɔba ni chɔɣisi ka n naba sɔhira. N kul yɛn shinimi ka guhiri dahin’ shɛli mbusim ni ti yɛn lu ninvuɣ’ shɛb’ bɛn kana ti liri ti maa zuɣu.

¹⁷Hal fiig tihi ni bi pum puma, ka wain tihi bi wali, ka olivi tihi bi wali, ka puri ni bindira bi niŋ, ka biŋkɔbbaligu lan ka buzɔna ni, ka niɣi lan ka naɣikpahi ni maa zaa yoli,

¹⁸n ni mali suhupiɛlli Yawɛ sani. N ni mali suhupiɛlli Naawuni ŋun nyɛ n tiligira ŋɔ sani.

¹⁹ Yawɛ ŋun nyɛ n Duuma ŋɔ n-nyɛ n kpiɔŋ. O chɛ ka n naba bemi kaman woliga naba la, ka chɛ ka m be zoya zuɣu chana.” Di nyɛla kaman baansi toondana ni zaŋ biŋkumda din mali mihi n-yil’ li shɛm.