Read Dagbani Zɛfania 1 Bible Online

Zɛfania 1 - Dagbani bible

Zɛfania 1

¹ Naawuni ni daa yɛli Kushi bia Zɛfania yɛtɔɣ’ shɛŋa Juda Naa Amɔn bia Naa Jɔsia ʒiɛman ni. Zɛfania yaannim’ n-daa nyɛ: Gɛdalia mini Amaria ni Naa Hɛzɛkia.

²Yawɛ yɛliya, “N ni ku binshɛɣukam din be dunia ni zaa.

³N ni ku ninsalinim’ mini biŋkɔbiri zaa, ka ku noonsi bɛn yiɣiri zuɣusaa ŋɔ mini teeku ni zahim, ka chɛ ka ninvuɣ’ biɛri tuui; n ni ku ninsalinim’ zaa dunia yili.” Yawɛ n-yɛli lala maa.

⁴“N ni darigi Judanim’ mini Jɛrusalɛmnim’ zaa tibili, ka kpihim Baal tuma din kpalim mini buɣa maligumaaniba yuya kpe,

⁵ka kpihim ninvuɣ’ shɛb’ bɛn gbaani mɔpila zuɣu n-jɛmdi wuntaŋ’ mini goli ni saŋmarisi la ni ninvuɣ’ shɛb’ bɛn gbaani pɔri Yawɛ, amaa ka lan pɔri buɣili Milikom[1] ŋɔ

⁶ni ninvuɣ’ shɛb’ bɛn ŋmaligi ka chɛ Yawɛ dolibu ka bi lan jɛmd’ o bee m-bɔhir’ o binshɛli yɛla la birili.”

⁷Fomiya ti Duuma Yawɛ tooni, d amaa Yawɛ dabisili la miriya. Yawɛ niŋla sara maligu shili, o mal’ o ni boli ninvuɣ’ shɛba ka bɛ be kasi.

⁸Yawɛ yɛliya, “N sara maligu dabisili maa dali, n ni ti darigi kpambaliba mini nabihi ni ninvuɣ’ shɛb’ bɛn yɛri tinduya ni binyɛra la tibili.

⁹Dindali maa n ni ti darigi bɛnkam zaa kpahi yaɣi dunɔbia zuɣu mini bɛnkam zaŋ damli dambu ni ŋarili soya bo nɛma pali bɛ dan’ yiŋ’ la tibili.”

¹⁰Yawɛ yɛliya, “Dindali maa, yi ni ti wum kuŋa Zahim Dunɔdal’ la gbini, ka wum fabila yiya pala la ni, ka wum vuri pam daboya zuɣu.

¹¹Yinim’ bɛn be tiŋ’ maa vinvamli ni, fabilimiya, dama kɔhigɔriba la zaa kpiya, ka ninvuɣ’ shɛb’ bɛn zaa yi zahindi anzinfa sania zuɣu la kpi.

¹²“Di saha n ni ti zaŋ firilanim’ lihi Jɛrusalɛm puuni, ka darigi ninvuɣ’ shɛb’ bɛn baɣa ka shɛli ni ka yɛri bɛ suhuri ni, ‘Yawɛ ku niŋ din viɛla bee din bie la tibili.

¹³Bɛ ni ti ʒe bɛ daazichi ka bɛ yiya wurim. Hal bɛ ni mɛri yiya ŋɔ zaa yoli, bɛ ku kpe di ni. Hal bɛ ni sari wain tihi ŋɔ zaa yoli, bɛ ku nyu di wain.”

¹⁴Yawɛ dabisi’ titali la miriya. Di miriya, ka kanna yomyom. Ka Yawɛ dabisili maa kandina ni ti mali suhusaɣiŋgu pam, ka tɔbbihi ni ti ŋme tɔbuchiriga dindali maa.

¹⁵Dindali maa ni ti nyɛla suhuyiɣisili dabisili; di ni ti nyɛla nandahima mini biɛrim dabisili. Di ni ti nyɛla saɣiŋgu mini dabari zalibu dabisili, ka ni ti nyɛla zibisim mini bumbɔni dabisili. Di ni ti nyɛla sagbana mini zibisim titali dabisili.

¹⁶Di ni ti nyɛla kikahi piɛbbu mini tɔbu zambu bubu dabisili din yɛn lu bɛ ni me goondahi gili fɔntin’ shɛŋa mini bɛn wɔɣila din du pam zuɣu.

¹⁷Yawɛ yɛliya, “N ni chɛ ka muɣisigu ŋɔ paai niriba ka bɛ ti chani kaman zoomba la, bɛ ni tum alahichi man’ Yawɛ sani zuɣu. Bɛ ʒim ni yi n-zɔri kaman kom la. Ka bɛ niŋgbuna ti dɔni tiŋgban’ ni pooi.”

¹⁸Bɛ daanzinfa bee bɛ salima ti ku tooi tiligi ba Yawɛ suhuyiɣisili dabisili maa dali. O suhuyiɣisili buɣim ni ti di dunia ŋɔ zaa. Dama o ni ti chɛ ka dunia ŋɔ binshɛɣukam naai naari biɛɣu.