Read Dagbani Zakaria 11 Bible Online

Zakaria 11 - Dagbani bible

Zakaria 11

¹Lɛbanɔn, yoom’ a dunoya ka buɣim tooi di a sida tihi[4] luhi.

²Tihi din vari kul sabigi sahakam, fabilimiya, dama sida tihi luya; ti’ suma la zaa bahi yoli! Bashan oki tihi, fabilimiya, dama bɛ ŋma nyɔŋ tihi la zaa luhi!

³Wummiya piɛguliba fabila mini bɛ kuhigu; bɛ kɔŋ bɛ jilima! Wummiya gbuɣima kuhigu; dama nyɔŋ din dolisi Jɔɔdɛn Mɔɣili la saɣimya!

⁴Yawɛ ŋun nyɛ n Naawuni ŋɔ yɛliya, “Zanimi piɛgul’[5] zaani n-gul’ piɛ’ shɛb’ bɛ ni yɛn ku ŋɔ.

⁵Ninvuɣ’ shɛb’ bɛn da ba ku ba mi bi nya tibidarigibo; ka bɛn kɔhi bɛ nimdi mi yɛli, ‘Ti paɣiri Naawuni! Ti leei bundaannima.’ Hal piɛri maa maŋmaŋ’ piɛguliba maa daa bi zo ba nambɔɣu.”

⁶(Yawɛ yɛliya, “N ku lan zo dunia ŋɔ nim’ nambɔɣu. Mmaŋmaŋ’ ni zaŋ bɛ zaa yinoyino niŋ bɛ ʒiʒiinitab’ nuu ni, ka lan zaŋ ba yinoyino niŋ nanim’ fukumsi ni; ka bɛ nahim dunia tiŋgbani ŋɔ, ka n ku fa so bɛ nuu ni bahi.”)

⁷Ka bɛn daa dari piɛri ŋ-ŋmaligiri kɔhiri bu ma paa, ka n leei piɛ’ shɛb’ bɛ ni daa yɛn ku gula. Ka n daa bo jaaŋgbɛh’ ayi m-boli zaɣ’ yini yuli “anfaani,” ka boli din pah’ ayi mi yuli “naŋgban’ yini.” Ka n daa leei piɛri maa gula.

⁸Ka n nyee daa ti nyɔni piɛguliba ata shɛb’ bɛn daa je ma, ka n kari ba gol’ yini puuni.

⁹Ka n daa ti yɛli piɛri maa, “N ku lan nyɛ yi gula. Yi ni bɛn yɛn kpi, kpima; ka bɛn yɛn bahi yoli, bahi yoli; ka chɛ bɛn kpalim ka bɛ ŋmaligi ŋub’ taba.”

¹⁰Ka n daa kabi jaaŋgbe’ shɛli din yuli booni “Anfaani” la ni n lɔrigi Yawɛ ni daa lo zuliya kam alikauli shɛl’ la.

¹¹Ka alikauli maa daa shiri lɔrigi dindali maa. Ka bɛn daa dari piɛri maa ŋ-ŋmaligiri kɔhiri la daa lihiri ma nti baŋ ni Yawɛ n-wuhiri ba shɛli n ni niŋ shɛm maa puuni.

¹²Ka n daa yɛli ba, yi yi nya ka di simdi, yin’ yomiya ma n tuma yɔri. Ka yi yi ku yo ma, yin’ maliya li. Ka bɛ daa bo anzinfa laɣibaligu pihita yo ma.

¹³Ka Yawɛ daa yɛli ma, “Zaŋm’ li ti niŋ Yawɛ liɣiri pɔŋ ni.” Bɛ ni daa zali n daa shɛm m-bala. Ka n daa zaŋ anzinfa laɣibaligu pihita maa niŋ Yawɛ jɛmbu duu liɣiri ni.

¹⁴Ka n daa lan kab’ jaaŋgbe’ shɛli din pah’ ayi ka di yuli booni Naŋgban’ yini la, ka Juda mini Izraɛl naŋgbanyini biɛhigu la daa saɣim.

¹⁵Ka Yawɛ daa yɛli ma, “Zaŋm’ piɛgul’ so ŋun ka buchi nɛma pumpɔŋɔ.

¹⁶N yɛn bola piɛgul’ so tiŋgbɔŋ ŋɔ ni ŋun baɣa ku be n piɛri bɛn be barina ni maa bee n-lihiri bɔri bɛn bɔrigi shee bee n-tibiri bɛn nya dansi bee n-dihiri bɛn mal’ alaafee. Amaa o ni gahindila bɛ ni piɛ’ kara ŋ-ŋubiri dariti tɔhiri bɛ takarifiɛma.

¹⁷Mbusim be piɛgul’ so ŋun chɛ piɛri bahi maa zuɣu! Bɛ ni zaŋ sua n-chɛ o bɔɣu tabil’ o nudirigu nini. Ka o bɔɣu maa kpi, ka o nudirigu nini maa gba zom zaa.