Read Dagbani Zakaria 12 Bible Online

Zakaria 12 - Dagbani bible

Zakaria 12

¹Yawɛ ni yɛli shɛm zaŋ chaŋ Izraɛlnim’ polo m-bɔŋɔ: “Yawɛ ŋun nam zuɣusaa mini dunia ŋɔ ka ti daadam nyɛvil’ la yɛliya,

²‘N ni chɛ ka Jɛrusalɛm be kaman wain pipia la, ka zuliya kam bɛn gil’ li nyu li n-jeeni kaman danyuriba bɛn nyu m-buɣ’ la. Ka bɛ yi ti teei gili Jɛrusalɛm, bɛ ni teei gili Juda tinsi la gba.

³Dindali maa, n ni ti chɛ ka Jɛrusalɛm be kaman kuɣ’ tibisili la, ka zuliya shɛli niriba bɛn ti bɔri ni bɛ kpuɣ’ li ni nya yɛlli. Ka dunia ŋɔ zuliya kam ni ti niŋ naŋgban’ yini kana ni bɛ ti liri li.

⁴Dindali maa, n ni ti kpɛhi bɛ yuri dabiɛm, ka kpɛhi bɛn bari ba mi yinyari. Amaa n ni ti guli Judanima, ka chɛ ka bɛ dimnim’ yuri zom.

⁵Ka Judanim’ ni ti ŋmaligi yɛli bɛmaŋa, ‘Jɛrusalɛmnim’ malila kpiɔŋ Yawɛ ŋun nyɛ Tɔbbihi Naa, ka nyɛ bɛ Naawuni ŋɔ sani.’ ”

⁶Dindali maa, n ni ti chɛ ka Judanim’ be kaman buɣimniɛm duɣu din be daduli buɣim puuni la, ka lan be kaman buɣim mokpalli din be kawaan’ gban’ kuma puu ni la. Bɛ ni di niriba bɛn gili ba n-kpa nudirigu mini nuzaa polo, amaa ka Jɛrusalɛmnim’ bɛn’ kul ni be alaafee ni.

⁷Man’ Yawɛ ni daŋ tila Judanim’ nasara, din ni chɛ ka Naa Dauda zuliya mini Jɛrusalɛmnim’ ni yɛn nya jilima shɛli ku gari Judanim’ dini.

⁸Dindali maa, Yawɛ ni ti guli bɛn be Jɛrusalɛm puuni, ka hal bɛ ni ninvuɣ’ gbarima ni ti mali kpiɔŋ kaman Dauda la. Ka Dauda zuliya maa ni ti gari tooni m-be kaman Yawɛ malaika la bee Naawuni maŋmaŋ’ la m-mali ba chana.

⁹Dindali maa, n ni ti ku zuliya shɛb’ bɛn zaa lo nia ni bɛ liri Jɛrusalɛmnima.

¹⁰Ka n ni ti zaŋ nambɔzɔbo mini wunsuhigu shia n-niŋ Dauda zuliya mini Jɛrusalɛmnim’ ni. Ka bɛ ti lihi bɛ ni daa zaŋ kpani kuhi so la, ka fabil’ o zuɣu kaman ninvuɣ’ shɛb’ bɛn fabindi bɛ bi’ gaŋ’ kalinsi zuɣu. Bɛ ni ti fabili pam kaman ninvuɣ’ shɛb’ bɛn bidib’ tuuli kpi.

¹¹Dindali maa, fabila ni ti galisi Jɛrusalɛm kaman bɛ ni daa fabili Hadadirimɔn[6] zuɣu Mɛgido vinvamli ni shɛm la.

¹²Tiŋgbɔŋ maa ni nim’ ni ti fabili. Daŋ kam puuni niriba ni ti fabili kɔŋkɔba. Dauda daŋ puuni niriba dɔbba ti yɛn bela bɛ ko fabinda, ka bɛ paɣiba be bɛ ko fabinda. Ka Neetan daŋ puuni niriba dɔbba ti be bɛ ko fabinda, ka bɛ paɣiba be bɛ ko fabinda.

¹³Ka Lɛvi zuliya puuni niriba ti be bɛ ko fabinda, ka bɛ paɣiba be bɛ ko fabinda. Ka Shimɛi daŋ puuni niriba ti be bɛ ko fabinda, ka bɛ paɣiba be bɛ ko fabinda.

¹⁴Ka daŋ shɛŋa din kpalim zaa puuni niriba dɔbba ti be bɛ ko fabinda, ka bɛ paɣiba gba be bɛ ko fabinda.